ഭാര്യയെ 'കൊന്നിട്ട്' പോലും അകത്തായില്ല; മങ്ങാട്ട് കവലയിലെ ഓപ്പറേഷന് പിന്നിലെ ഗൂഡാലോചന പുറത്തു പറഞ്ഞ് പാര്‍ട്ടിയെ വെട്ടിലാക്കുമെന്ന ഭീഷണിയുമായി 'കൊലപ്പുള്ളി'; പ്രോസിക്യൂഷന്‍ സഹായത്താല്‍ മുന്‍കൂര്‍ ജാമ്യം ലക്ഷ്യം; ഷാജന്‍ സ്‌കറിയയെ ആക്രമിച്ചയാള്‍ ഒളിച്ചിരിക്കുന്നത് സിപിഎം ഉന്നതന്റെ സംരക്ഷണയില്‍; മറുനാടനെ തീര്‍ക്കാന്‍ എത്തിയവര്‍ എവിടെ?
ഇടുക്കി: ഷാജന്‍ സ്‌കറിയയെ വണ്ടി ഇടിച്ച് കൊല്ലാന്‍ ശ്രമിച്ച കേസിലെ പ്രതിയെ സംരക്ഷിക്കാനുള്ള നീക്കം സജീവം. ഇടുക്കിയിലെ പ്രമുഖ നേതാവിന്റെ സംരക്ഷണയില്‍ ആണ് ഇയാള്‍. അക്രമിയെ പിടിക്കാന്‍ പോലീസ് മതിയായ ഇടപെടല്‍ നടത്തുന്നില്ലെന്ന പരാതി സജീവമാണ്. തൊടുപുഴ സ്മിതാ ആശുപത്രിയിലാണ് ഷാജന്‍ സ്‌കറിയ ചികില്‍സയിലുള്ളത്. ആരോഗ്യ നില പൂര്‍ണ്ണ തൃപ്തികരമാണ്. സിപിഎം സൈബര്‍ ഗുണ്ടകള്‍ സോഷ്യല്‍ മീഡിയയയില്‍ പരസ്യ വെല്ലുവിളി തുടരുകയാണ്. തന്നെ അറസ്റ്റു ചെയ്ത് ജയിലില്‍ അടച്ചാല്‍ സംഭവത്തിലെ ഗൂഡാലോചന പുറത്തു പറയുമെന്ന് മുഖ്യപ്രതി വെല്ലുവിളി നടത്തിയിട്ടുണ്ട്. ഈ സാഹചര്യത്തില്‍ പ്രോസിക്യൂഷന്‍ സഹായത്തോടെ മുന്‍കൂര്‍ ജാമ്യത്തിനും ഇയാള്‍ ശ്രമിച്ചേക്കും.
മറുനാടന്‍ മലയാളി എഡിറ്റര്‍ ഷാജന്‍ സക്റിയയെ ആക്രമിച്ചത് സിപിഎം പിന്തുണയുള്ള വാട്ടര്‍ അതോറിട്ടി കരാറുകാരന്റെ നേതൃത്വത്തിലെ ഡിവൈഎഫ്ഐ ഗുണ്ടകളാണെന്ന് വ്യക്തമായിരുന്നു. ഷാജന്‍ സ്‌കറിയയ്ക്കെതിരായ ഗൂഡാലോചനയില്‍ വ്യക്തമായ പദ്ധതി തയ്യാറാക്കലും നടന്നു. പഠിക്കുന്ന സമയത്ത് കെ എസ് യുവായിരുന്നു ആക്രമണത്തിന് നേതൃത്വം നല്‍കിയ ക്വാറി മാഫിയക്കാരന്‍. ഭാര്യയുടെ മരണം കൊലപാതകമാണെന്ന സംശയം ഉയര്‍ന്നിരുന്നു. എന്നാല്‍ കേസ് അന്വേഷണം എല്ലാ അര്‍ത്ഥത്തിലും അട്ടിമറിക്കപ്പെട്ടു. ഭാര്യയുടെ മരണത്തിന് പിന്നിലെ ദുരൂഹത ഇപ്പോഴും തുടരുന്നു. ഇതോടെ ഇയാള്‍ സിപിഎമ്മുകാരനായി. സിപിഎമ്മിന് വേണ്ടി എന്തും ചെയ്യുന്ന ക്വാറി ഉടമയുമായി.
ഇതിനൊപ്പമാണ് വാട്ടര്‍ അതോറിട്ടിയിലെ കരാറുകാരനായും ബോണസ് കിട്ടിയത്. ഈ വ്യക്തിയെയാണ് ഷാജന്‍ സ്‌കറിയയെ ആക്രമിക്കാന്‍ സിപിഎം ചുമതലപ്പെടുത്തിയത്. ഥാറില്‍ ചെയ്സിംഗും കാറിടിച്ച് മറിക്കാനുള്ള ശ്രമവുമെല്ലാം ഇയാളുടെ നേതൃത്വത്തിലാണ് നടന്നത്. ക്വാറി മാഫിയയാണ് ഇതിന് പിന്നിലെന്ന് ഭാവിയില്‍ വിശദീകരിക്കാനുള്ള ശ്രമം കൂടിയായി ഇതിനെ കാണാം. നിയമ വഴിയില്‍ ഷാജന്‍ സ്‌കറിയയെ ഒന്നും ചെയ്യാനാകില്ലെന്ന് മനസ്സിലാക്കി ചിലര്‍ നടത്തിയ ഗൂഡാലോചനയാണ് ഇതെല്ലാം. ഇതിന് പിന്നില്‍ പ്രവര്‍ത്തിച്ച പ്രതിയെ എത്രയും വേഗം പിടിക്കുമെന്നാണ് പോലീസ് പറയുന്നത്. എന്നാല്‍ ഗൂഡാലോചനയിലേക്ക് അന്വേഷണം പോകുമോ എന്നതാണ് നിര്‍ണ്ണായകം. ടിപി ചന്ദ്രശേഖരനെ കൊന്നവരെ പിടിച്ചു. പക്ഷേ കൊല്ലിച്ചവരെ പിടിച്ചില്ല. ഇതിന് സമാനമായ അട്ടിമറി ഈ കേസിലും ഉണ്ടാകുമോ എന്നതാണ് ഉയരുന്ന ചോദ്യം.
ഈ ആക്രമണത്തിന് നിയോഗിച്ച വ്യക്തിയുടെ പേരില്‍ 'കൊലപ്പുള്ളി'യ്ക്ക് സമാനമായ വീട്ടുപേരാണുള്ളത്. എന്തും ആരേയും ചെയ്യാന്‍ മടിക്കാത്ത ക്വാറി ഉടമയാണ് ഷാജന്‍ സ്‌കറിയയേയും ആക്രമിച്ചത്. സിപിഎം സംസ്ഥാന സെക്രട്ടറി എംവി ഗോവിന്ദന്‍ അടക്കമുള്ളവരുമായി ഇയാള്‍ക്ക് അടുത്ത ബന്ധമുണ്ട്. ഇടുക്കിയിലെ സിപിഎമ്മിന് എല്ലാവിധ സഹായവും ചെയ്യുന്ന ഇയാള്‍ ചില മാധ്യമ പ്രവര്‍്ത്തകരുടേയും ഉറ്റ സുഹൃത്താണ്. സിപിഎം പകയ്ക്കൊപ്പം ചില മാധ്യമ ഗൂഡാലോചനകളും ഇതിന് പിന്നിലുണ്ടെന്നാണ് സൂചന. കാടുകളില്‍ കൈവയ്ക്കുന്ന ക്വാറി ഉടമയെ ക്വട്ടേഷന്‍ ഏല്‍പ്പിച്ചത് പാര്‍ട്ടിയാണെന്നതും വ്യക്തമാണ്. മൊബൈല്‍ ഫോണ്‍ പരിശോധനകള്‍ അടക്കം നടത്തിയാല്‍ ഇതിന്റെ യഥാര്‍ത്ഥ വസ്തുത പുറത്തു വരും. പക്ഷേ ആറു പേരെ മാത്രം പിടിച്ച് വ്യക്തിപരമായ ഗൂഡാലോചനയും പകയും ചാര്‍ത്തി കേസൊതുക്കാനാകും ശ്രമിക്കുക എന്നതും വ്യക്തമാണ്.
ഒരു വിവാഹചടങ്ങില്‍ പങ്കെടുത്ത് മടങ്ങുംവഴി ഇടുക്കി മങ്ങാട്ട് കവലയിലാണ് ആക്രമണം നടന്നത്. പരിക്കേറ്റ ഷാജന്‍ സ്‌കറിയയെ ജില്ലാ ആശുപത്രിയില്‍ പ്രവേശിപ്പിച്ചു. പൊലീസാണ് ഷാജന്‍ സ്‌കറിയയെ ആശുപത്രിയിലെത്തിച്ചത്. പരിക്ക് ഗുരുതരമല്ല. ഷാജന്റെ വിശദമായ മൊഴി രേഖപ്പെടുത്തിയ ശേഷം കേസെടുക്കുമെന്ന് പൊലീസ് അറിയിച്ചു.