ആളുകൾ ഒന്ന് കൂടിയാൽ ഭയങ്കര 'ഗമ'; വെള്ളത്തിലൂടെ പതിയെ നീങ്ങി സ്റ്റൈൽ; കാഴ്ചക്കാരെ കൈയ്യിലെടുക്കാനും ഇവൻ ബെസ്റ്റാ; പക്ഷെ..ആശാന്റെ വീക്നെസ് മറ്റൊന്ന്; 'റെഗ്ഗി' ആള് ചില്ലറക്കാരനല്ല

സ്ട്രാറ്റ്‌ഫോർഡ്: സ്ട്രാറ്റ്‌ഫോർഡിലെ ടൗൺ ബേയിൽ വിനോദസഞ്ചാരികളുടെയും നാട്ടുകാരുടെയും പ്രിയങ്കരനായിരുന്ന 'റെഗ്ഗി' എന്ന കറുത്ത അരയന്നത്തെ നഗരത്തിലെ ജലാശയങ്ങളിൽ നിന്ന് മാറ്റി. തദ്ദേശീയ അരയന്നങ്ങളെ ആക്രമിക്കുകയും അവയുടെ ജീവിതത്തെ ബാധിക്കുകയും ചെയ്തതിനെ തുടർന്നാണ് ഈ നടപടി. 'മിസ്റ്റർ ടെർമിനേറ്റർ' എന്ന് വിളിപ്പേരുണ്ടായിരുന്ന ഈ അരയന്നത്തെ സെപ്റ്റംബർ 30-ന് പിടികൂടി താൽക്കാലിക സുരക്ഷാ കേന്ദ്രത്തിലേക്ക് മാറ്റി.

ഏകദേശം ഒൻപത് മാസം മുൻപാണ് ഈ കറുത്ത അരയന്നം സ്ട്രാറ്റ്‌ഫോർഡിൽ എത്തുന്നത്. ആകർഷകമായ നിറം കാരണം ഇത് പെട്ടെന്ന് തന്നെ ശ്രദ്ധ നേടി. നഗരത്തിൽ 40 വർഷത്തിലേറെയായി അരയന്നങ്ങളെ സംരക്ഷിച്ചു വരുന്ന സിറിൽ ബെന്നിസിന്റെ അഭിപ്രായത്തിൽ, വില്യം ഷേക്സ്പിയറിനെ കാണാനെത്തുന്നതിനെക്കാൾ കൂടുതൽ ആളുകൾ ഈ അരയന്നത്തെ കാണാനെത്തിയിരുന്നു. തുടക്കത്തിൽ 'റെഗ്ഗി' എന്ന പേരിൽ അറിയപ്പെട്ടിരുന്ന ഇത്, പിന്നീട് ആക്രമണ സ്വഭാവം കാരണം 'മിസ്റ്റർ ടെർമിനേറ്റർ' എന്ന് അറിയപ്പെട്ടു.

തദ്ദേശീയരായ നിശബ്ദ അരയന്നങ്ങളുടെ കൂടുകെട്ടലിനും അവരുടെ അതിർത്തി ക്രമീകരണങ്ങളിലും റെഗ്ഗി ഇടപെടാൻ തുടങ്ങി. ഒരു അരയന്ന കുടുംബത്തിന് നേരെ ആക്രമണം നടത്തിയെന്നും, ആൺ അരയന്നത്തെയും കുഞ്ഞുങ്ങളെയും ഓടിച്ച് പെൺ അരയന്നത്തിന്റെ നിയന്ത്രണ മേഖല പിടിച്ചെടുക്കാൻ ശ്രമിച്ചെന്നും റിപ്പോർട്ടുകളുണ്ട്. ചില നിശബ്ദ അരയന്നങ്ങളെ വെള്ളത്തിൽ മുക്കി കൊല്ലാനും ശ്രമിച്ചതായി പറയപ്പെടുന്നു.

നഗരത്തിലെ ഏകദേശം 60 തദ്ദേശീയ അരയന്നങ്ങളുടെ സുരക്ഷയെയും സ്വാഭാവിക പെരുമാറ്റത്തെയും റെഗ്ഗിയുടെ ഇടപെടൽ ബാധിച്ചതോടെ അധികൃതർ ആശങ്കയിലായി. മറ്റ് അരയന്നങ്ങളുടെ ക്ഷേമത്തിന് ഭീഷണിയായതിനാൽ റെഗ്ഗിയെ നഗരത്തിലെ ജലാശയങ്ങളിൽ തുടരാൻ അനുവദിക്കരുതെന്ന് ബെന്നിസും പ്രാദേശിക അധികൃതരും തീരുമാനിക്കുകയായിരുന്നു. റെഗ്ഗിയെ ശാന്തനാക്കി മാറ്റുന്ന പ്രക്രിയ ശ്രമകരമായിരുന്നുവെന്ന് ബെന്നിസ് സൂചിപ്പിച്ചു. ഡാവിഷ് വാട്ടർഫൗൾ സെന്ററിലേക്ക് മാറ്റാനാണ് നിലവിൽ ഉദ്ദേശിക്കുന്നത്. വിനോദസഞ്ചാരികളുടെ ഇഷ്ടതോഴനായിരുന്നെങ്കിലും, അരയന്നങ്ങളുടെ സംരക്ഷണമാണ് ഈ സാഹചര്യത്തിൽ പ്രധാനമെന്ന് അധികൃതർ വ്യക്തമാക്കി.