ഗാസ-ഇസ്രയേല്‍ വെടിനിര്‍ത്തല്‍ ചര്‍ച്ചകളിലെ പുരോഗതി സാധ്യത വര്‍ധിപ്പിച്ചു; സമാധാനത്തിനുള്ള നൊബേല്‍ സമ്മാനം ട്രംപിന്? വാതുവെപ്പ് സ്ഥാപനങ്ങളുടെ പ്രവചനത്തില്‍ യു എസ് പ്രസിഡന്റ് മുന്നില്‍; പിന്തുണ ആവര്‍ത്തിച്ച് നെതന്യാഹു
വാഷിംഗ്ടണ്‍: ഗാസ-ഇസ്രയേല്‍ സംഘര്‍ഷത്തില്‍ നിര്‍ണ്ണായക വെടിനിര്‍ത്തല്‍ കരാറിന് വഴിയൊരുക്കിയ പശ്ചാത്തലത്തില്‍ യു.എസ് പ്രസിഡന്റ് ഡൊണാള്‍ഡ് ട്രംപിന് സമാധാനത്തിനുള്ള നൊബേല്‍ സമ്മാനം ലഭിക്കാനുള്ള സാധ്യത വര്‍ദ്ധിച്ചതായി ലണ്ടനിലെ വാതുവെപ്പ് സ്ഥാപനങ്ങളുടെ പ്രവചനം. ട്രംപിന്റെ ഇടനിലയില്‍ ഇരുപക്ഷവും വെടിനിര്‍ത്തലിനും ബന്ദികളെ മോചിപ്പിക്കുന്നതിനും സമ്മതിച്ചതിനെത്തുടര്‍ന്നാണ് ഈ വിലയിരുത്തലുകള്‍ വന്നിരിക്കുന്നത്.
ലണ്ടനിലെ പ്രമുഖ വാതുവെപ്പ് സ്ഥാപനമായ ലാഡ്‌ബ്രോക്‌സ്, ട്രംപിന് 5/2 എന്ന അനുപാതത്തില്‍ നൊബേല്‍ സമ്മാനത്തിനുള്ള സാധ്യത പ്രവചിച്ചിട്ടുണ്ട്. സൂഡാനിലെ എമര്‍ജന്‍സി റെസ്‌പോണ്‍സ് റൂംസിനൊപ്പമാണ് ട്രംപ് ഈ സ്ഥാനം പങ്കിടുന്നത്. വെള്ളിയാഴ്ച നടക്കുന്ന സമ്മാന പ്രഖ്യാപനത്തിന് മുന്നോടിയായാണ് ഈ പ്രവചനം. ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവും ട്രംപിന് സമ്മാനം ലഭിക്കണമെന്ന് അഭിപ്രായപ്പെട്ടിട്ടുണ്ട്.
രണ്ടു വര്‍ഷത്തോളം നീണ്ടുനിന്നതും ലക്ഷക്കണക്കിന് ആളുകളുടെ മരണത്തിനിടയാക്കിയതുമായ സംഘര്‍ഷം അവസാനിപ്പിക്കാന്‍ ഒരുങ്ങുന്നതിന്റെ ആദ്യ ഘട്ടമായാണ് ഈ കരാറിനെ വിലയിരുത്തുന്നത്. കരാര്‍ പൂര്‍ണ്ണമായി നടപ്പിലാക്കുകയാണെങ്കില്‍, ഇത് ഏതൊരു മുന്‍കാല ശ്രമങ്ങളെക്കാളും ഇരുപക്ഷത്തെയും സമാധാനത്തിലേക്ക് അടുപ്പിക്കും.
ഒക്ടോബര്‍ 9, 2025-ന് രാവിലെയാണ് ഈ വാര്‍ത്ത പുറത്തുവന്നത്. സമ്മാന പ്രഖ്യാപനത്തിന് മണിക്കൂറുകള്‍ മാത്രം ബാിരിക്കെ, ട്രംപ് ഈ പുരസ്‌കാരം നേടുമോ എന്ന് ലോകം ഉറ്റുനോക്കുന്നു. 2025-ലെ സമാധാനത്തിനുള്ള നൊബേല്‍ സമ്മാനം ലഭിക്കുന്ന വ്യക്തിയെക്കുറിച്ച് നോര്‍വീജിയന്‍ നൊബേല്‍ കമ്മിറ്റി തിങ്കളാഴ്ച യോഗം ചേര്‍ന്ന് തീരുമാനമെടുത്തിരുന്നു. എന്നിരുന്നാലും, ട്രംപ് ഇടപെട്ട് നേടിയ ഈ ചരിത്രപരമായ കരാറിന്റെ പശ്ചാത്തലത്തില്‍ കമ്മിറ്റിക്ക് അവസാന നിമിഷത്തില്‍ മാറ്റങ്ങള്‍ വരുത്താന്‍ സാധ്യതയുണ്ട്. ട്രംപ് ഇസ്രായേലിലേക്ക് ഉടന്‍ യാത്ര തിരിക്കുമെന്നും റിപ്പോര്‍ട്ടുകളുണ്ട്.