ഏകദേശം 80 കിലോമീറ്റർ വേഗതയിൽ പാഞ്ഞുകൊണ്ടിരുന്ന ട്രെയിൻ; ഒരു വളവ് തിരിഞ്ഞതും അതി ഭീകരമായ ശബ്ദം; പാളത്തിലൂടെ ശക്തമായി കുലുങ്ങി ആടിയുലഞ്ഞ് എൻജിൻ; ആകെ പരിഭ്രാന്തരായി നിലവിളിച്ച് യാത്രക്കാർ; ചിലരുടെ തലപൊട്ടി ചോര വരുന്ന അവസ്ഥ; ലോക്കോ പൈലറ്റിന്റെ ചെറിയൊരു അശ്രദ്ധയിൽ സംഭവിച്ചത്

സാൻ ഫ്രാൻസിസ്കോ: സാൻ ഫ്രാൻസിസ്കോയിൽ ഓടിക്കൊണ്ടിരുന്ന ഒരു പാസഞ്ചർ ട്രെയിൻ ശക്തമായി കുലുങ്ങി യാത്രക്കാർക്കിടയിൽ പരിഭ്രാന്തി സൃഷ്ടിച്ച സംഭവത്തിൽ, ട്രെയിൻ ഓപ്പറേറ്റർ ഉറങ്ങിപ്പോയതാണ് കാരണമെന്ന് അന്വേഷണത്തിൽ കണ്ടെത്തൽ. കഴിഞ്ഞ സെപ്റ്റംബർ 24-ന് രാവിലെ 8:37-നാണ് സംഭവം നടന്നത്. സാൻ ഫ്രാൻസിസ്കോ മുനിസിപ്പൽ ട്രാൻസ്പോർട്ട് ഏജൻസിയുടെ (SFMTA) ഡ്രൈവർ അല്പനേരം ഉറങ്ങിപ്പോയതിനെ തുടർന്നാണ് ഏകദേശം 80 കിലോമീറ്റർ വേഗതയിൽ സഞ്ചരിച്ചിരുന്ന ട്രെയിൻ വളവ് തിരിയുന്നതിനിടെ നിയന്ത്രണം വിട്ട് കുലുങ്ങിയതെന്ന് സിസിടിവി ദൃശ്യങ്ങളിൽ വ്യക്തമായിട്ടുണ്ട്.

സംഭവത്തിന്റെ സിസിടിവി ദൃശ്യങ്ങൾ പുറത്തുവന്നതോടെയാണ് അപകടത്തിന്റെ വ്യാപ്തി പുറത്തറിയുന്നത്. ദൃശ്യങ്ങളിൽ, വളവ് തിരിയും മുമ്പായി ട്രെയിൻ ഡ്രൈവറുടെ കണ്ണ് അടയുന്നതും തല ഒരു വശത്തേക്ക് ചരിയുന്നതും കാണാം. ഇത് യാത്രക്കാർക്കിടയിൽ വലിയ ഭീതി പരത്തി. ട്രെയിൻ ശക്തമായി കുലുങ്ങിയതോടെ നിരവധി യാത്രക്കാർ ട്രെയിനിന്റെ ചുവരുകളിലേക്ക് ഇടിച്ചുവീഴുകയും നിലത്ത് തെന്നി വീഴുകയുമായിരുന്നു. ഷെഡ്യൂൾ ചെയ്ത സ്റ്റോപ്പ് കഴിഞ്ഞതിന് ശേഷം അല്പം മുന്നോട്ട് പോയാണ് ട്രെയിൻ പെട്ടെന്ന് നിർത്തിയത്. ഭാഗ്യവശാൽ, ഈ സംഭവത്തിൽ ആർക്കും ഗുരുതരമായ പരിക്കേൽക്കുന്നതായി റിപ്പോർട്ട് ചെയ്യപ്പെട്ടിട്ടില്ല.

യാത്രക്കാർ പരിഭ്രാന്തരായപ്പോൾ, ഡ്രൈവർ അവരോട്, "സമാധാനമായിരിക്കൂ... നമ്മൾ എവിടെയും ഇടിച്ചിട്ടില്ല, അപകടമില്ല" എന്ന് ആവർത്തിച്ചു പറയുകയും ക്ഷമ ചോദിക്കുകയും ചെയ്തു. സംഭവം നടന്നയുടൻ സ്ഥലത്തെത്തിയ പാരാമെഡിക്കൽ സംഘം യാത്രക്കാർക്ക് പ്രാഥമിക ശുശ്രൂഷ നൽകി.

സാൻ ഫ്രാൻസിസ്കോ മുനിസിപ്പൽ ട്രാൻസ്പോർട്ട് ഏജൻസി (SFMTA) സംഭവത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്. നവംബർ 10-ന് പുറത്തിറക്കിയ ഔദ്യോഗിക പ്രസ്താവനയിൽ, ഡ്രൈവറുടെ ക്ഷീണമാണ് അപകടത്തിന് കാരണമെന്ന് ഏജൻസി സ്ഥിരീകരിച്ചു. ട്രെയിനിന്റെ ബ്രേക്കുകൾ, ട്രാക്കുകൾ, മറ്റ് സാങ്കേതിക സംവിധാനങ്ങൾ എന്നിവയെല്ലാം വിശദമായി പരിശോധിച്ചെങ്കിലും അവയിൽ യാതൊരുവിധ പ്രശ്നങ്ങളും കണ്ടെത്തിയിട്ടില്ല.

ഈ സംഭവത്തെത്തുടർന്ന്, ഡ്രൈവറെ ഡ്രൈവിംഗ് ചുമതലകളിൽ നിന്ന് മാറ്റി നിർത്തിയിരിക്കുകയാണ്. കൂടുതൽ നടപടികൾക്കായി അദ്ദേഹത്തെ "നോൺ-ഡ്രൈവിംഗ് സ്റ്റാറ്റസി" ലേക്ക് മാറ്റിയിരിക്കുന്നതായി ട്രാൻസ്‌പോർട് ഡയറക്ടർ ജൂലി കിർഷ്ബാം അറിയിച്ചു. "ഇതൊരു ഭയാനകമായ അനുഭവമായിരുന്നു എന്ന് ഞങ്ങൾക്കറിയാം. യാത്രക്കാരുടെ സുരക്ഷയാണ് ഞങ്ങളുടെ പ്രഥമ പരിഗണന," അവർ പ്രസ്താവനയിൽ കൂട്ടിച്ചേർത്തു.

ഇത്തരം സംഭവങ്ങൾ ആവർത്തിക്കാതിരിക്കാൻ വേണ്ട നടപടികൾ സ്വീകരിക്കുന്നതായും ഏജൻസി അറിയിച്ചു. ക്ഷീണം നിയന്ത്രിക്കുന്നതിനെക്കുറിച്ചുള്ള പരിശീലന പരിപാടികൾ കൂടുതൽ ശക്തമാക്കിയതായും, ചില ഭാഗങ്ങളിൽ ട്രെയിനിന്റെ വേഗത യാന്ത്രികമായി പരിമിതപ്പെടുത്തുന്ന സോഫ്റ്റ്‌വെയർ വികസിപ്പിക്കുന്നതിനായി നിർമ്മാതാക്കളുമായി ചേർന്ന് പ്രവർത്തിക്കുകയാണെന്നും ട്രാൻസ്‌പോർട്ട് അധികൃതർ കൂട്ടിച്ചേർത്തു.