ട്രംപിന്റെ നയങ്ങൾ തിരിച്ചടിയാകുന്നു; ദുരന്തനിവാരണ ഏജൻസികളുടെ ഫണ്ട് വെട്ടിക്കുറച്ചതോടെ പ്രകൃതിക്ഷോഭങ്ങളെ നേരിടാനാവാതെ അമേരിക്ക പ്രതിസന്ധിയിൽ; വരാനിരിക്കുന്നത് വൻ ദുരന്തമെന്ന് വിദഗ്ധരുടെ മുന്നറിയിപ്പ്

വാഷിംഗ്ടൺ: പ്രകൃതിദുരന്തങ്ങളെ നേരിടാനുള്ള അമേരിക്കയുടെ ശേഷി അപകടകരമായ രീതിയിൽ കുറയുന്നതായി റിപ്പോർട്ട്. പ്രസിഡന്റ് ഡൊണാൾഡ് ട്രംപിന്റെ രണ്ടാം ഊഴത്തിലെ ആദ്യ വർഷം കാലാവസ്ഥാ ശാസ്ത്രത്തിനും ദുരന്തനിവാരണ ഏജൻസികൾക്കും മേൽ നടത്തിയ കടന്നുകയറ്റങ്ങൾ രാജ്യത്തെ വലിയ പ്രതിസന്ധിയിലാക്കിയെന്ന് അന്താരാഷ്ട്ര മാധ്യമമായ 'ദി ഗാർഡിയൻ' റിപ്പോർട്ട് ചെയ്യുന്നു. ഫെഡറൽ ഏജൻസികളിലെ കൂട്ടപിരിച്ചുവിടലുകളും ബജറ്റ് വെട്ടിക്കുറയ്ക്കലുകളും കാരണം വരാനിരിക്കുന്ന പ്രകൃതിക്ഷോഭങ്ങളെ നേരിടാൻ രാജ്യം സജ്ജമല്ലെന്നാണ് വിദഗ്ധരുടെ മുന്നറിയിപ്പ്.

തകരുന്ന സുരക്ഷാ കവചങ്ങൾ ദുരന്ത നിവാരണ പ്രവർത്തനങ്ങളെ ഏകോപിപ്പിക്കുന്ന ഫെഡറൽ എമർജൻസി മാനേജ്‌മെന്റ് ഏജൻസി (FEMA), കാലാവസ്ഥാ പ്രവചനങ്ങളുടെ ആഗോള കേന്ദ്രമായ നാഷണൽ ഓഷ്യാനിക് ആൻഡ് അറ്റ്‌മോസ്ഫെറിക് അഡ്മിനിസ്‌ട്രേഷൻ (NOAA) എന്നിവയാണ് ട്രംപിന്റെ നയങ്ങളുടെ പ്രധാന ഇരകൾ. കാലാവസ്ഥാ വ്യതിയാനത്തെക്കുറിച്ചുള്ള പഠനങ്ങളെയും ഡാറ്റകളെയും തള്ളിക്കളയുന്ന ട്രംപ് ഭരണകൂടം, ഈ ഏജൻസികളുടെ ഫണ്ട് വൻതോതിൽ വെട്ടിക്കുറച്ചു.

കഴിഞ്ഞ വർഷം അമേരിക്കയിൽ മൂന്ന് കാറ്റഗറി 5 ചുഴലിക്കാറ്റുകളും കടുത്ത ഉഷ്ണതരംഗവും കാട്ടുതീയും നാശം വിതച്ചിരുന്നു. ഇതിനിടയിലാണ് ദുരന്ത മുന്നറിയിപ്പ് നൽകാനുള്ള സംവിധാനങ്ങൾ പോലും അവതാളത്തിലായത്. അലാസ്കയിൽ തകരാറിലായ കാലാവസ്ഥാ ബലൂൺ നെറ്റ്‌വർക്കുകൾ കൃത്യസമയത്ത് മുന്നറിയിപ്പ് നൽകുന്നതിൽ പരാജയപ്പെട്ടത് ഇതിന്റെ ഉദാഹരണമാണ്. ടെക്സാസിലെ ഗ്വാഡലൂപ്പ് നദിയിലുണ്ടായ പ്രളയത്തിൽ 135 പേർ മരിച്ചപ്പോൾ, ഫെഡറൽ രക്ഷാസേനയെ അയക്കാൻ ഭരണകൂടം 72 മണിക്കൂറിലധികം വൈകിയതും വലിയ വിമർശനങ്ങൾക്ക് ഇടയാക്കി.

സാമ്പത്തിക നഷ്ടം വർദ്ധിക്കുന്നു ദുരന്തങ്ങൾ തടയാനുള്ള ഫണ്ട് വെട്ടിക്കുറയ്ക്കുമ്പോഴും പ്രകൃതിക്ഷോഭങ്ങൾ മൂലമുണ്ടാകുന്ന സാമ്പത്തിക ബാധ്യത കുതിച്ചുയരുകയാണ്. 2025-ന്റെ ആദ്യ പകുതിയിൽ മാത്രം കാലാവസ്ഥാ ദുരന്തങ്ങൾ കാരണം 101 ബില്യൺ ഡോളറിന്റെ നഷ്ടമാണ് അമേരിക്കയ്ക്കുണ്ടായത്. 1980-ന് ശേഷമുള്ള ഏറ്റവും വലിയ നഷ്ടമാണിത്. എന്നാൽ, ഇത്തരം നഷ്ടങ്ങൾ കണക്കാക്കുന്ന ഡാറ്റാബേസ് പോലും മെയ് മാസത്തിൽ ഭരണകൂടം നിർത്തലാക്കി.

സംസ്ഥാനങ്ങൾക്ക് മേൽ അധികഭാരം "ഫെമ (FEMA) എന്ന പരീക്ഷണം പരാജയമാണ്, ഇത് സംസ്ഥാനങ്ങൾക്ക് വിട്ടുകൊടുക്കണം" എന്ന നിലപാടിലാണ് ട്രംപ്. ദുരന്തനിവാരണത്തിനുള്ള സാമ്പത്തിക ബാധ്യതയിൽ നിന്ന് കേന്ദ്രം പിന്മാറുന്നതോടെ സാമ്പത്തികമായി പിന്നാക്കം നിൽക്കുന്ന സംസ്ഥാനങ്ങളും ഗ്രാമങ്ങളും വലിയ ദുരിതത്തിലാകും. 1,00,000 ഡോളറിന് മുകളിലുള്ള ഏത് ദുരന്തനിവാരണ കരാറിനും ഹോംലാൻഡ് സെക്യൂരിറ്റി സെക്രട്ടറിയുടെ നേരിട്ടുള്ള അനുമതി വേണമെന്ന നിബന്ധന അടിയന്തര സാഹചര്യങ്ങളിലെ രക്ഷാപ്രവർത്തനത്തെ മന്ദഗതിയിലാക്കിയിട്ടുണ്ട്.

ശാസ്ത്രത്തിന് തിരിച്ചടി കാലാവസ്ഥാ ശാസ്ത്രത്തിൽ അമേരിക്കയ്ക്കുണ്ടായിരുന്ന ആഗോളാധിപത്യം അവസാനിക്കുന്ന കാഴ്ചയാണിന്ന്. ആയിരക്കണക്കിന് ശാസ്ത്രജ്ഞരും മെറ്റീരിയോളജിസ്റ്റുകളും ഏജൻസികളിൽ നിന്ന് പടിയിറങ്ങി. ഇത് അമേരിക്കയെ മാത്രമല്ല, യുഎസ് ഉപഗ്രഹങ്ങളെയും ഡാറ്റകളെയും ആശ്രയിക്കുന്ന മറ്റ് രാജ്യങ്ങളെയും ബാധിക്കും. സുനാമി മുന്നറിയിപ്പ് നൽകുന്ന സ്റ്റേഷനുകൾ പലതും ഓഫ്‌ലൈനായിക്കഴിഞ്ഞു.

ആഗോള കാലാവസ്ഥാ വ്യതിയാനം ഒരു മിഥ്യയാണെന്ന് വിശ്വസിക്കുന്ന ട്രംപ്, പാരിസ് ഉടമ്പടിയിൽ നിന്നുള്ള പിന്മാറ്റവും ക്ലീൻ എയർ ആക്റ്റിലെ മാറ്റങ്ങളും തുടർന്നു. ബ്രസീലിൽ നടന്ന ആഗോള കാലാവസ്ഥാ ഉച്ചകോടിയിൽ (COP) നിന്ന് അമേരിക്കൻ പ്രതിനിധികൾ വിട്ടുനിന്നത് ലോകരാജ്യങ്ങൾക്കിടയിൽ അമേരിക്കയെ ഒറ്റപ്പെടുത്തിയിരിക്കുകയാണ്.