'കുട്ടികള്ക്കും മുതിര്ന്നവര്ക്കും പനിയും ശ്വാസംമുട്ടലും; ഇന്ധനം പോലും ഐസായി മാറുന്ന കൊടുംതണുപ്പ്! ഫിന്ലന്ഡിലെ മഞ്ഞില് കുടുങ്ങി ബ്രിട്ടീഷ് വിനോദസഞ്ചാരികളടക്കം ആയിരങ്ങള്; ഹോട്ടലുകളില് നിന്ന് പുറത്താക്കപ്പെട്ടു, വിമാനമില്ല, ബസ്സില്ല! യൂറോപ്പിനെ വിറപ്പിക്കുന്ന ശൈത്യതരംഗത്തിന്റെ ഞെട്ടിക്കുന്ന ദൃശ്യങ്ങള്
ഹെല്സിങ്കി: അതിശൈത്യത്തില് വിറങ്ങലിച്ച് ഫിന്ലന്ഡിലെ ലാപ്ലാന്റ്. കഠിനമായ മഞ്ഞുവീഴ്ചയെത്തുടര്ന്ന് വിമാനങ്ങള് കൂട്ടത്തോടെ റദ്ദാക്കിയതോടെ ആയിരക്കണക്കിന് ബ്രിട്ടീഷ് വിനോദസഞ്ചാരികളാണ് ഇവിടെ കുടുങ്ങിക്കിടക്കുന്നത്. തങ്ങളുടെ ജീവിതത്തിലെ ഏറ്റവും വലിയ 'ദുസ്വപ്ന'ത്തിലൂടെയാണ് തങ്ങള് കടന്നുപോകുന്നതെന്ന് വിനോദസഞ്ചാരികള് മാധ്യമങ്ങളോട് പ്രതികരിച്ചു. കിറ്റില (Kittila) എയര്പോര്ട്ടിലെ താപനില നിലവില് -37°C ആണ്. എന്നാല് വരും മണിക്കൂറുകളില് ഇത് -40°C ലേക്ക് കൂപ്പുകുത്തുമെന്നാണ് കാലാവസ്ഥാ നിരീക്ഷണ കേന്ദ്രം നല്കുന്ന മുന്നറിയിപ്പ്. അതിശൈത്യം കാരണം വിമാനങ്ങളിലെ ഐസ് നീക്കം ചെയ്യുന്നതിനോ (De-icing), ഇന്ധനം നിറയ്ക്കുന്നതിനോ കഴിയാത്ത സാഹചര്യമാണ് നിലവിലുള്ളത്.
ലണ്ടന്, മാഞ്ചസ്റ്റര്, പാരീസ്, ആംസ്റ്റര്ഡാം എന്നിവിടങ്ങളിലേക്കുള്ള സര്വീസുകള് നിലച്ചു. കുട്ടികളും പ്രായമായവരും ഉള്പ്പെടെയുള്ള നൂറുകണക്കിന് കുടുംബങ്ങള് എയര്പോര്ട്ടിലും ഹോട്ടലുകളിലുമായി കുടുങ്ങിക്കിടക്കുകയാണ്. ശക്തമായ കാറ്റും റോഡിലെ മഞ്ഞും കാരണം ബസ് സര്വീസുകളും ദുഷ്കരമായിരിക്കുകയാണ്. എയര്ലൈനുകള് യാത്രക്കാരെ മറ്റ് വിമാനത്താവളങ്ങളില് എത്തിക്കാന് ശ്രമിക്കുന്നുണ്ടെങ്കിലും കാലാവസ്ഥ വലിയ വെല്ലുവിളിയാണ്.
ബ്രിട്ടനില് നിന്നുള്ള ബെക്കി വീവര് എന്ന യുവതി തന്റെ കുടുംബത്തിന്റെ ദുരവസ്ഥ വിവരിച്ചത് ഇങ്ങനെയാണ്: 'ഇന്നലെ മടങ്ങേണ്ടതായിരുന്നു, പക്ഷേ ഇതുവരെ ഒരു വിവരവുമില്ല. നാട്ടില് ജോലിയും വളര്ത്തുമൃഗങ്ങളും ഒക്കെയായി ഒരുപാട് കാര്യങ്ങള് ചെയ്യാനുണ്ട്. ഇവിടെ മരവിക്കുന്ന തണുപ്പില് എപ്പോള് മടങ്ങാനാകുമെന്ന് അറിയാതെ ഇരിക്കുകയാണ് ഞങ്ങള്.'
വിദേശത്ത് മഞ്ഞില് കുടുങ്ങിയത് മാത്രമല്ല, നാട്ടിലെ വീട്ടിലെ അവസ്ഥയും പരിതാപകരമാണെന്നാണ് വിനോദസഞ്ചാരിയായ ബെക്കി വീവര് പറയുന്നത്. കെന്റിലും സസെക്സിലുമായി മുപ്പതിനായിരത്തോളം വീടുകളില് നിലവില് കുടിവെള്ള വിതരണം തടസ്സപ്പെട്ടിരിക്കുകയാണ്. ഇതില് ബെക്കിയുടെ വീടും ഉള്പ്പെടുന്നു. 'കാര്യങ്ങള് ഒന്നിനുപിറകെ ഒന്നായി വഷളായിക്കൊണ്ടിരിക്കുകയാണ്' - അവര് നിസ്സഹായാവസ്ഥ വെളിപ്പെടുത്തി.
ബ്രിട്ടനിലെ ബര്മിംഗ്ഹാമില് നിന്നുള്ള മാര്ക്ക് ആബിയും കുടുംബവും സമാനമായ അവസ്ഥയിലാണ്. ഭാര്യ എമ്മയ്ക്കും മൂന്ന് മക്കള്ക്കുമൊപ്പം കിറ്റില വിമാനത്താവളത്തില് എന്തുചെയ്യണമെന്നറിയാതെ നില്ക്കുകയാണ് ഇദ്ദേഹം. ഹോട്ടലിലെ താമസം അവസാനിച്ചതിനാല് ഇന്ന് രാത്രി എവിടെ കഴിയുമെന്ന കാര്യത്തില് ഇവര്ക്ക് ഉറപ്പില്ല. വിമാനക്കമ്പനിയുമായി ബന്ധപ്പെട്ടെങ്കിലും ഒരു മണിക്കൂര് ദൂരെയുള്ള താമസസൗകര്യം മാത്രമേ ലഭ്യമാകൂ എന്നാണ് മറുപടി ലഭിച്ചത്. കുടുംബാംഗങ്ങള്ക്ക് പനിയും ജലദോഷവും ബാധിച്ചത് ദുരിതം ഇരട്ടിയാക്കുന്നു.
താമസിച്ചിരുന്ന ഹോട്ടലുകളില് നിന്ന് ചെക്ക്-ഔട്ട് ചെയ്ത പലര്ക്കും പുതിയ താമസസൗകര്യം കണ്ടെത്താന് കഴിയുന്നില്ല. മൈനസ് 40 ഡിഗ്രി തണുപ്പില് പലര്ക്കും പനിയും ശ്വാസകോശ സംബന്ധമായ അസ്വസ്ഥതകളും അനുഭവപ്പെടുന്നുണ്ട്. കിറ്റിലയില് നിന്ന് നേരിട്ട് വിമാനമില്ലാത്തതിനാല്, പലരെയും കിലോമീറ്ററുകള് അകലെയുള്ള ഔലു (Oulu) പോലുള്ള നഗരങ്ങളിലേക്ക് ബസ് മാര്ഗ്ഗം കൊണ്ടുപോയി അവിടെ നിന്ന് ഹെല്സിങ്കി വഴി നാട്ടിലെത്തിക്കാനുള്ള ശ്രമത്തിലാണ് എയര്ലൈനുകള്. ഫിന്ലന്ഡിന്റെ പൊതുമാധ്യമമായ 'Yle' റിപ്പോര്ട്ട് ചെയ്യുന്നത് പ്രകാരം, കഴിഞ്ഞ വെള്ളിയാഴ്ച മുതല് ഇതുവരെ 23-ഓളം വിമാന സര്വീസുകളാണ് റദ്ദാക്കിയത്. ഇതില് 15 എണ്ണവും വിദേശ രാജ്യങ്ങളിലേക്കുള്ളവയായിരുന്നു. നോര്വേ, സ്വീഡന്, ഫിന്ലന്ഡ് എന്നീ രാജ്യങ്ങളിലായി വ്യാപിച്ചുകിടക്കുന്ന ലാപ്ലാന്റ് മേഖലയില് സമീപകാലത്തെ ഏറ്റവും കഠിനമായ ശൈത്യമാണ് ഇപ്പോള് അനുഭവപ്പെടുന്നത്.
ഫിന്ലന്ഡിലെ ജനവാസം കുറഞ്ഞ വടക്കന് മേഖലയിലെ കിറ്റില എയര്പോര്ട്ട് സാധാരണയായി വിനോദസഞ്ചാരികളുടെ തിരക്ക് അനുഭവപ്പെടുന്ന ഇടമാണ്. മനോഹരമായ 'നോര്ത്തേണ് ലൈറ്റ്സ്' (Northern Lights) കാണാനും സ്കീയിംഗിനുമായി എത്തുന്നവരെ സ്വീകരിക്കുന്ന ഈ വിമാനത്താവളം ഇപ്പോള് ശ്മശാനമൂകമാണ്. സാധാരണയായി ശൈത്യകാലത്ത് ഇവിടെ മൈനസ് 14 ഡിഗ്രി സെല്ഷ്യസ് ആണ് താപനില ഉണ്ടാകാറുള്ളത്. ചില സമയങ്ങളില് ഇത് മൈനസ് 30 വരെ പോകാറുണ്ടെങ്കിലും, ഇത്തവണത്തെ മൈനസ് 40 ഡിഗ്രി കൊടും തണുപ്പ് ഫിന്ലന്ഡുകാരെ പോലും അമ്പരപ്പിച്ചിരിക്കുകയാണ്. ഫിന്നിഷ് മെറ്റീരിയോളജിക്കല് ഇന്സ്റ്റിറ്റ്യൂട്ടിന്റെ കണക്കുകൂട്ടലുകള് പ്രകാരം ഈ ശൈത്യതരംഗം വരും ദിവസങ്ങളിലും തുടരാനാണ് സാധ്യത.
യൂറോപ്പിലാകെ സ്തംഭനാവസ്ഥ:
അതിശക്തമായ മഞ്ഞുവീഴ്ചയെത്തുടര്ന്ന് ജര്മ്മനിയിലെ റെയില് ഗതാഗതം പൂര്ണ്ണമായും താറുമാറായി. വടക്കന് മേഖലയിലുടനീളം ട്രെയിന് സര്വീസുകള് റദ്ദാക്കി. രാജ്യത്തെ ഏറ്റവും ജനസംഖ്യയുള്ള നോര്ത്ത് റൈന് വെസ്റ്റ്ഫാലിയയില് (North Rhine-Westphalia) റോഡുകള് ഐസ് പാളികളാല് നിറഞ്ഞതോടെ സ്കൂളുകള്ക്ക് അവധി പ്രഖ്യാപിക്കുകയും ക്ലാസുകള് ഓണ്ലൈന് ആക്കുകയും ചെയ്തു. എസ്റ്റോണിയ, ലിത്വാനിയ എന്നിവിടങ്ങളില് അതിശക്തമായ ഹിമപാതത്തിന് (Blizzard) സാധ്യതയുള്ളതിനാല് അത്യാവശ്യമല്ലാത്ത യാത്രകളെല്ലാം ഒഴിവാക്കാന് സര്ക്കാര് നിര്ദ്ദേശിച്ചു. ലാത്വിയയിലും മഞ്ഞുവീഴ്ചയെത്തുടര്ന്ന് റെഡ് അലര്ട്ട് പ്രഖ്യാപിച്ചിരിക്കുകയാണ്. നോര്വേ, സ്വീഡന്, ഫിന്ലന്ഡ് രാജ്യങ്ങളിലായി വ്യാപിച്ചുകിടക്കുന്ന ലാപ്ലാന്റ് മേഖലയില് കുടുങ്ങിയ സഞ്ചാരികളെ സുരക്ഷിതമായി നാട്ടിലെത്തിക്കാനുള്ള ശ്രമങ്ങള് തുടരുകയാണ്. എങ്കിലും കാലാവസ്ഥ അനുകൂലമാകാതെ വിമാനങ്ങള് പറന്നുയരാന് കഴിയില്ലെന്നത് വലിയ ആശങ്കയായി തുടരുന്നു.