'ഇത് ഓരോ വ്യക്തിയുടെയും വോട്ട് സംരക്ഷിക്കാനുള്ള പോരാട്ടം..'; ഇരുട്ടിനെ വെളിച്ചമാക്കി 16 ദിവസത്തെ മഹാറാലിക്ക് ഒരുങ്ങി രാഹുൽ ഗാന്ധി; കാതങ്ങൾ താണ്ടി ജനങ്ങളെ ബോധവൽക്കരിക്കും; 'വോട്ട് അധികാർ യാത്ര'യ്ക്ക് നാളെ തുടക്കമാകുമ്പോൾ

പട്ന: വോട്ടർ പട്ടികയിൽ നിന്ന് ലക്ഷക്കണക്കിന് വോട്ടർമാരെ നീക്കം ചെയ്യുന്നതിലൂടെ 'വോട്ട് മോഷണം' നടത്തുന്നുവെന്ന ആരോപണവുമായി കോൺഗ്രസ് നേതാവ് രാഹുൽ ഗാന്ധി മുന്നോട്ട് വന്നത് രാജ്യത്തെ തന്നെ ഒന്നടങ്കം ഞെട്ടിപ്പിച്ച സംഭവമായിരുന്നു. ഇപ്പോഴിതാ, രാഹുൽ ഗാന്ധി നയിക്കുന്ന 'വോട്ട് അവകാശ യാത്ര' ബിഹാറിൽ ആരംഭിക്കുകയാണ്. 16 ദിവസം നീണ്ടുനിൽക്കുന്ന ഈ യാത്ര ബിഹാറിലെ 20-ൽ അധികം ജില്ലകളിലൂടെ സഞ്ചരിച്ച് 1300 കിലോമീറ്ററിലധികം ദൂരം പിന്നിടും. വോട്ടർ പട്ടിക പരിഷ്കരണത്തിലെ ക്രമക്കേടുകൾക്കെതിരെയും ജനാധിപത്യ അവകാശ സംരക്ഷണത്തിനായുള്ള ജനകീയ മുന്നേറ്റമായാണ് യാത്രയെ വിലയിരുത്തുന്നത്.

സസാരത്ത് നിന്നാണ് യാത്രയ്ക്ക് തുടക്കം കുറിക്കുന്നത്. സെപ്റ്റംബർ ഒന്നിന് പട്നയിൽ നടക്കുന്ന മഹാറാലിയോടെ യാത്രയ്ക്ക് സമാപനമാകും. യാത്രയുടെ ഉദ്ഘാടന ചടങ്ങിൽ ബിഹാർ പ്രതിപക്ഷ നേതാവ് തേജസ്വി യാദവ്, വിവിധ ഇടതുപക്ഷ പാർട്ടികളുടെ നേതാക്കൾ തുടങ്ങിയ പ്രമുഖർ പങ്കെടുക്കും.

"ഒരു വ്യക്തി, ഒരു വോട്ട്" എന്ന അടിസ്ഥാന ജനാധിപത്യ അവകാശത്തെ സംരക്ഷിക്കാനുള്ള പോരാട്ടമാണിതെന്ന് രാഹുൽ ഗാന്ധി എക്സിൽ കുറിച്ചു. ഭരണഘടനയെ സംരക്ഷിക്കാൻ ബിഹാറിന്റെ ജനങ്ങളോടൊപ്പം അണിചേരുമെന്നും അദ്ദേഹം പ്രസ്താവനയിൽ പറയുന്നു.

ഈ വർഷം നിയമസഭാ തെരഞ്ഞെടുപ്പ് നടക്കുന്ന ബിഹാറിൽ വോട്ടർ പട്ടിക പരിഷ്കരണം വലിയ വിവാദങ്ങൾക്ക് ഇടയാക്കിയിരുന്നു. ഏകദേശം 65 ലക്ഷം വോട്ടർമാരെ പട്ടികയിൽ നിന്ന് ഒഴിവാക്കിയെന്നാണ് റിപ്പോർട്ടുകൾ. ഇവരുടെ പേരുകൾ പട്ടികയിൽ നിന്ന് ഒഴിവാക്കിയ കാരണങ്ങൾ പ്രസിദ്ധീകരിക്കണമെന്ന് സുപ്രീം കോടതി തിരഞ്ഞെടുപ്പ് കമ്മീഷന് നിർദ്ദേശം നൽകിയിരുന്നു. ഈ വിഷയങ്ങൾക്കെതിരെ ശക്തമായ പ്രതിഷേധം ഉയർത്തിയാണ് രാഹുൽ ഗാന്ധിയുടെ യാത്ര.

അതേസമയം, വോട്ടർപട്ടികയിലെ ക്രമക്കേടുകൾ സംബന്ധിച്ചുള്ള വെളിപ്പെടുത്തലുകളെത്തുടർന്ന്, ബി.ജെ.പിക്ക് എതിരായ 'വോട്ട് കൊള്ള'ക്കെതിരെയുള്ള പ്രചാരണത്തിന് രാഹുൽ ഗാന്ധി പുതിയ വിഡിയോ പങ്കുവെച്ച് ഊന്നൽ നൽകി. ബോളിവുഡ് സിനിമകളെ അനുസ്മരിപ്പിക്കുന്ന 'ലാപതാ വോട്ട്' എന്ന പേരിലുള്ള വിഡിയോയാണ് അദ്ദേഹം സാമൂഹ്യമാധ്യമങ്ങളിൽ പങ്കുവെച്ചത്. 'മോഷണം ഇനി വേണ്ട, ജനം ഉണർന്നു' എന്ന അടിക്കുറിപ്പോടെയാണ് പ്രചാരണം ശക്തമാക്കിയിരിക്കുന്നത്.

"വോട്ട് മോഷണം എന്നത് നിങ്ങളുടെ അവകാശങ്ങളുടെ മോഷണമാണ്. വോട്ട് കൊള്ളക്കെതിരെ നമ്മുടെ ശബ്ദം ഉയർത്തുക. ഒരുമിച്ച് അവകാശങ്ങളെ സംരക്ഷിക്കാം," എന്ന അടിക്കുറിപ്പോടെയാണ് കോൺഗ്രസ് ഈ വിഡിയോ സാമൂഹ്യമാധ്യമങ്ങളിൽ പോസ്റ്റ് ചെയ്തത്. തന്റെ വോട്ട് നഷ്ടപ്പെട്ടെന്ന് പരാതിയുമായി ഒരാൾ പോലീസ് സ്റ്റേഷനിൽ എത്തുന്നിടത്താണ് വിഡിയോയുടെ തുടക്കം. ലക്ഷക്കണക്കിന് വോട്ടുകൾ ചോർന്നിട്ടുണ്ടെന്ന് പരാതിക്കാരൻ പോലീസുകാരെ അറിയിക്കുന്നു. ഞെട്ടലോടെ തങ്ങളുടെ വോട്ടും നഷ്ടപ്പെട്ടോ എന്ന് പോലീസ് പരസ്പരം നോക്കുന്നിടത്താണ് വിഡിയോ അവസാനിക്കുന്നത്.

ഒരു മിനിറ്റ് ദൈർഘ്യമുള്ള വിഡിയോയ്ക്ക് 'ലാപതാ വോട്ട്' എന്നാണ് തലക്കെട്ട് നൽകിയിരിക്കുന്നത്. കിരൺ റാവു സംവിധാനം ചെയ്ത 'ലാപതാ ലേഡീസ്' എന്ന സിനിമയുടെ ആശയത്തിൽ നിന്ന് പ്രചോദനം ഉൾക്കൊണ്ടാണ് ഈ വിഡിയോ തയ്യാറാക്കിയിരിക്കുന്നത്. വിഡിയോയിൽ 'ലാപതാ ലേഡീസ്' എന്നതിലെ 'ലേഡീസ്' എന്ന വാക്ക് മാറ്റി 'വോട്ട്' എന്ന് ചേർത്തിരിക്കുന്നു.

ഇതിനുമുമ്പും വോട്ട് കൊള്ളയുമായി ബന്ധപ്പെട്ട വിഡിയോകൾ കോൺഗ്രസ് പങ്കുവെച്ചിരുന്നു. ഒരു കുടുംബം പോളിംഗ് ബൂത്തിൽ പ്രവേശിക്കുമ്പോൾ, അവരുടെ വോട്ടുകൾ ഇതിനകം രേഖപ്പെടുത്തിയിട്ടുണ്ടെന്ന് രണ്ടുപേർ പറയുന്ന വിഡിയോ ഇതിന് ഉദാഹരണമാണ്. മേശപ്പുറത്ത് ഇരിക്കുന്ന ഒരു ഉദ്യോഗസ്ഥന് 'തിരഞ്ഞെടുപ്പ് മോഷണ കമ്മീഷൻ' എന്ന മുദ്രാവാക്യവുമായി വിരൽ ഉയർത്തി കാണിക്കുന്ന രണ്ടുപേരാണ് വ്യാജ വോട്ടുകൾ രേഖപ്പെടുത്തുന്നത് എന്ന് വിഡിയോയിൽ ചിത്രീകരിച്ചിരിക്കുന്നു. വോട്ടർമാരുടെ അവകാശങ്ങളെ സംരക്ഷിക്കുന്നതിനായി ശക്തമായ പ്രചാരണമാണ് കോൺഗ്രസ് ലക്ഷ്യമിടുന്നത്.