തിരുവല്ലയിലെ ഒരു സ്വകാര്യ ബാങ്ക് പൊട്ടിയിട്ടും അവിടെ നിക്ഷേപിച്ചിരുന്ന രണ്ടര കോടി രൂപ നഷ്ടമായി; വെള്ളപ്പൊക്കത്തിലും പണം പോയി; ശബരിമല സ്വര്ണ്ണക്കൊള്ള: തന്ത്രിയുടെ നഷ്ടമായ നിക്ഷേപത്തില് അന്വേഷണം; കുറ്റപത്രം വൈകുന്നത് പ്രതികളെ സഹായിക്കാനോ?
തിരുവനന്തപുരം: ശബരിമല സ്വര്ണ്ണക്കൊള്ളക്കേസിലെ അന്വേഷണം തന്ത്രി കണ്ഠരര് രാജീവരിലുള്പ്പെടെയുള്ള ഉന്നതരിലേക്ക് നീളുന്നുണ്ടെങ്കിലും, പോലീസ് നടപടികളിലെ മെല്ലെപ്പോക്ക് പ്രതികള്ക്ക് തുണയാകുന്നു. കേസില് എസ്.ഐ.ടി ഉടന് കുറ്റപത്രം നല്കില്ലെന്നാണ് സൂചന. ഇതോടെ പ്രധാന പ്രതികള്ക്കെല്ലാം ജാമ്യം ലഭിക്കാനുള്ള വഴിയൊരുങ്ങുകയാണ്.
രണ്ടര കോടിയുടെ നിക്ഷേപം പോയിട്ടും പരാതിയില്ലാതെ തന്ത്രി അറസ്റ്റിലായ തന്ത്രി കണ്ഠരര് രാജീവരുടെ സാമ്പത്തിക ഇടപാടുകളില് വന് ദുരൂഹതയാണ് അന്വേഷണസംഘം കണ്ടെത്തുന്നത്. തിരുവല്ലയിലെ ഒരു സ്വകാര്യ ബാങ്ക് പൊട്ടിയിട്ടും അവിടെ നിക്ഷേപിച്ചിരുന്ന രണ്ടര കോടി രൂപ നഷ്ടമായതില് തന്ത്രി ഇതുവരെ പരാതി നല്കിയിട്ടില്ല.
ചോദ്യം ചെയ്യലില് വെള്ളപ്പൊക്കത്തില് പണം നഷ്ടമായ കാര്യം പറഞ്ഞ തന്ത്രി, ബാങ്ക് നിക്ഷേപത്തെക്കുറിച്ച് എസ്.ഐ.ടിയോട് മൗനം പാലിച്ചു. സ്വര്ണ്ണക്കൊള്ളയിലെ മുഖ്യപ്രതി ഉണ്ണികൃഷ്ണന് പോറ്റിയുമായുള്ള സാമ്പത്തിക ബന്ധങ്ങളിലേക്കാണോ ഈ തുക വിരല് ചൂണ്ടുന്നത് എന്നാണ് പോലീസ് പരിശോധിക്കുന്നത്.
ശാസ്ത്രീയ പരിശോധനയും കുറ്റപത്രത്തിലെ കാലതാമസവും ശ്രീകോവില് വാതിലിലെ സ്വര്ണ്ണത്തിന്റെ അളവ് കണ്ടെത്താന് വി.എസ്.എസ്.സി ശാസ്ത്രജ്ഞരുടെ മൊഴിയെടുക്കല് ആരംഭിച്ചിട്ടുണ്ട്. ശാസ്ത്രീയ പരിശോധനാ ഫലങ്ങള് താരതമ്യം ചെയ്ത് കൃത്യമായ വിവരങ്ങള് ലഭിക്കാന് ഇനിയും സമയമെടുക്കും.
ഈ പഴുത് ഉപയോഗിച്ച് കുറ്റപത്രം സമര്പ്പിക്കുന്നത് മാസങ്ങളോളം നീട്ടിക്കൊണ്ടുപോകാനാണ് എസ്.ഐ.ടിയുടെ നീക്കം. കുറ്റപത്രം വൈകുന്നത് വഴി പ്രതികള്ക്ക് സ്വാഭാവിക ജാമ്യം ലഭിക്കാനും കേസ് അട്ടിമറിക്കപ്പെടാനും സാധ്യതയുണ്ടെന്ന ആക്ഷേപം ഇതിനോടകം ഉയര്ന്നിട്ടുണ്ട്.
ഇ.ഡി ഇടപെടുന്നു; മുരാരി ബാബുവിന് പിന്നാലെ അതേസമയം, കേസില് കള്ളപ്പണ ഇടപാട് നടന്നെന്ന സൂചനയെത്തുടര്ന്ന് എന്ഫോഴ്സ്മെന്റ് ഡയറക്ടറേറ്റ് രംഗത്തെത്തിയിട്ടുണ്ട്. കഴിഞ്ഞ ദിവസം ജാമ്യം ലഭിച്ച് പുറത്തിറങ്ങിയ മുഖ്യപ്രതി മുരാരി ബാബുവിന്റെ മൊഴിയെടുക്കാനാണ് ഇ.ഡിയുടെ തീരുമാനം. പോലീസ് കുറ്റപത്രം നല്കാന് വൈകിയതോടെ മുരാരി ബാബുവിന് ജാമ്യം ലഭിച്ചത് വലിയ വിവാദമായിരുന്നു.
യഥാര്ത്ഥ സ്വര്ണ്ണക്കവര്ച്ചയുടെ വ്യാപ്തി മറച്ചുവെക്കാനും ഉന്നതരെ സംരക്ഷിക്കാനും അന്വേഷണം ബോധപൂര്വ്വം വൈകിപ്പിക്കുകയാണോ എന്ന ചോദ്യമാണ് ഇപ്പോള് ഭക്തര്ക്കിടയില് ഉയരുന്നത്.