ഇനിയെങ്കിലും കുറച്ച് സമാധാനം ലഭിക്കുമെന്ന് കരുതിയ ആ മനുഷ്യൻ; ഡെസ്കിലെ ജോലികൾ ചെയ്ത് പോകവേ വിധി അദ്ദേഹത്തെ തേടിയെത്തിയത് യുദ്ധത്തിന്റെ രൂപത്തിൽ; വീണ്ടും നടുക്കടലിലെ ദൗത്യത്തിന് പുറപ്പെട്ട ഇന്ത്യൻ എൻജിനീയറുടെ അവസ്ഥ അതിദയനീയം; കരഞ്ഞ് തളർന്ന് കുടുംബം

മുംബൈ/ബസറ: പശ്ചിമേഷ്യയിൽ യുദ്ധസമാനമായ സാഹചര്യം നിലനിൽക്കെ, ഇറാഖിലെ ബസറ തുറമുഖത്തിന് സമീപം എണ്ണക്കപ്പലിന് നേരെ നടന്ന മിസൈൽ ആക്രമണത്തിൽ ഇന്ത്യൻ അഡീഷണൽ ചീഫ് എൻജിനീയർ കൊല്ലപ്പെട്ടു. മുംബൈ കാന്തിവ്ലിയിൽ താമസിക്കുന്ന ദേവനന്ദൻ പ്രസാദ് സിങ് (54) ആണ് മരിച്ചത്. മാർഷൽ ഐലൻഡ്‌സ് പതാകയുള്ള 'എംടി സേഫ്‌സീ വിഷ്ണു' (MT Safesea Vishnu) എന്ന കപ്പലിന് നേരെ ബുധനാഴ്ചയായിരുന്നു ആക്രമണം ഉണ്ടായത്.

ഖോർ അൽ സുബൈർ തുറമുഖത്ത് കപ്പൽ നങ്കൂരമിട്ടിരിക്കെയായിരുന്നു അപ്രതീക്ഷിതമായി ആക്രമണം ഉണ്ടായത്. കപ്പലിൽ സ്ഫോടനമുണ്ടായതിനെ തുടർന്ന് ദേവനന്ദന് ഗുരുതരമായി പരിക്കേറ്റു. ഉടൻ തന്നെ അദ്ദേഹത്തെ ബസറയിലെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ആക്രമണം നടന്നയുടൻ കപ്പലിലുണ്ടായിരുന്ന മറ്റ് ജീവനക്കാർ കടലിലേക്ക് ചാടി രക്ഷപ്പെടുകയായിരുന്നു. ഇവരെ പിന്നീട് ഇറാഖ് കോസ്റ്റ് ഗാർഡ് രക്ഷപ്പെടുത്തി സുരക്ഷിത സ്ഥാനങ്ങളിലെത്തിച്ചു. 16 ഇന്ത്യക്കാരും 12 ഫിലിപ്പീൻസ് സ്വദേശികളുമുൾപ്പെടെ 28 ജീവനക്കാരാണ് കപ്പലിലുണ്ടായിരുന്നത്. ദേവനന്ദൻ ഒഴികെയുള്ള മറ്റെല്ലാവരും സുരക്ഷിതരാണെന്ന് അധികൃതർ അറിയിച്ചു.

ദേവനന്ദന്റെ മരണത്തിന് പിന്നാലെ കപ്പൽ കമ്പനിക്കെതിരെ ഗുരുതര ആരോപണങ്ങളുമായി കുടുംബം രംഗത്തെത്തി. കഴിഞ്ഞ 25 വർഷമായി കപ്പലിൽ ജോലി ചെയ്തിരുന്ന പരിചയം ദേവനന്ദനുണ്ടായിരുന്നെങ്കിലും, കഴിഞ്ഞ ഏഴുവർഷമായി അദ്ദേഹം കരയിൽ (Desk Job) ജോലി ചെയ്യുകയായിരുന്നു. എന്നാൽ കമ്പനിയുമായുള്ള കരാറിലെ നിബന്ധനകൾ ചൂണ്ടിക്കാട്ടി അദ്ദേഹത്തെ നിർബന്ധപൂർവ്വം വീണ്ടും കപ്പലിലേക്ക് അയച്ചതാണെന്ന് ബന്ധുക്കൾ ആരോപിക്കുന്നു.

ഫെബ്രുവരി 28-നായിരുന്നു അദ്ദേഹം വീണ്ടും കപ്പലിൽ ജോലിയിൽ പ്രവേശിച്ചത്. ഇറാനുനേരെ യുഎസും ഇസ്രായേലും ആക്രമണം തുടങ്ങുന്നതിന് വെറും മൂന്ന് ദിവസം മുൻപായിരുന്നു ഇത്. മേഖലയിൽ സംഘർഷം പുകയുന്ന സാഹചര്യത്തിൽ കപ്പൽ യാത്ര അപകടകരമാണെന്ന് അറിഞ്ഞിട്ടും കമ്പനി അദ്ദേഹത്തെ അയക്കുകയായിരുന്നുവെന്ന് കുടുംബം ആരോപിച്ചു.

ഇറാൻ-ഇസ്രായേൽ സംഘർഷം രൂക്ഷമായതോടെ പേർഷ്യൻ ഗൾഫ് മേഖലയിലെ കപ്പൽ ഗതാഗതം അതീവ അപകടാവസ്ഥയിലായിരിക്കുകയാണ്. ഈ സാഹചര്യത്തിൽ ഇന്ത്യൻ ജീവനക്കാരുടെ സുരക്ഷയെക്കുറിച്ച് വലിയ ആശങ്കയാണ് ഉയരുന്നത്. ദേവനന്ദന്റെ മൃതദേഹം എത്രയും വേഗം നാട്ടിലെത്തിക്കാനുള്ള ശ്രമങ്ങൾ മുംബൈയിലെ വിദേശകാര്യ മന്ത്രാലയത്തിന്റെ സഹായത്തോടെ നടന്നുവരികയാണ്. ദീർഘകാലമായി മുംബൈയിൽ സ്ഥിരതാമസമാക്കിയ ദേവനന്ദന്റെ മരണം അദ്ദേഹത്തിന്റെ സഹപ്രവർത്തകർക്കിടയിലും വലിയ നടുക്കമുണ്ടാക്കിയിട്ടുണ്ട്.

ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ലെങ്കിലും, മേഖലയിലെ സായുധ സംഘങ്ങളുടെ ഇടപെടലാണോ ഇതിന് പിന്നിലെന്ന് ഇറാഖ് അധികൃതർ അന്വേഷിച്ചു വരികയാണ്. ഇന്ത്യൻ എംബസി വിഷയത്തിൽ കൃത്യമായി ഇടപെടുന്നുണ്ടെന്ന് സർക്കാർ വൃത്തങ്ങൾ അറിയിച്ചു.