ഇതൊക്കെ നിയമവിരുദ്ധം; ആളുകളെ അനാവശ്യമായി ബുദ്ധിമുട്ടിക്കരുത്; അങ്ങനെ ചെയ്താൽ ഇനി വടിയെടുക്കും..; ഓടുന്ന വാഹനത്തിൻ്റെ ഫോട്ടോയെടുത്ത് പിഴ ചുമത്തരുതെന്ന് നിർദ്ദേശം; സുപ്രധാന ഉത്തരവുമായി ഗതാഗത കമ്മീഷണർ; നടപടി പൊതുജനങ്ങളുടെ പരാതിയുടെ അടിസ്ഥാനത്തിലെന്നും മറുപടി

തിരുവനന്തപുരം: റോഡിൽ വാഹനവുമായി ഇറങ്ങുമ്പോൾ എല്ലാ നിയമങ്ങളും പാലിച്ച് തന്നെ പോകണം. അത് കൃത്യമായി പാലിച്ചെങ്കിൽ പിഴ വരുന്നതും സ്വാഭാവികമാണ്. എന്നാൽ, ഇപ്പോൾ ചില ഉദ്യോഗസ്ഥർ പരിശോധനയുടെ മറവിൽ കാണിക്കുന്നത് അനീതിയാണ്. ഒളിച്ചും പാത്തും നിന്ന് വാഹനങ്ങളുടെ ഫോട്ടോ എടുത്ത് രേഖങ്ങൾ ശരിയല്ലെങ്കിൽ ഉടമയ്ക്ക് പിഴ ചുമത്തുന്ന. ഇപ്പോൾ അതിനെതിരെ വടിയെടുത്തിരിക്കുകയാണ് അധികൃതർ.

വാഹന പരിശോധനയിൽ സുപ്രധാന നിർദേശവുമായി ഗതാഗത കമ്മീഷണർ രംഗത്ത് വന്നിരിക്കുകയാണ്. ഓടുന്ന വാഹനത്തിൻ്റെ ഫോട്ടോയെടുത്ത് സർട്ടിഫിക്കറ്റ് ഇല്ലാത്തതിന് പിഴ ചുമത്തേണ്ടെന്നും അങ്ങനെ ചെയ്താൽ ഉദ്യോഗസ്ഥനെതിരെ നടപടി ഉണ്ടാവുമെന്നും ഉത്തരവിൽ പറയുന്നു.അതുപോലെ വാഹന ഉടമകളെ അനാവശ്യമായി ബുദ്ധിമുട്ടിക്കരുതെന്നും ഗതാഗത കമ്മീഷണർ നിർദ്ദേശം നൽകുന്നു.

ഓടിപ്പോകുന്ന വാഹനത്തിന്റെ ഫോട്ടോ എടുത്ത് സർട്ടിഫിക്കറ്റുകൽക്ക് കാലാവധി ഇല്ലെന്ന് പറഞ്ഞ് ഉദ്യോഗസ്ഥർ കേസെടുക്കുന്നത് നിയമവിരുദ്ധവും വകുപ്പിന് അപകീർത്തി ഉളവാക്കുന്നതുമാണ്. അതിനാൽ മോട്ടോർ വാഹന വകുപ്പ് ഉദ്യോഗസ്ഥർ ഇത്തരം നിയമപരമല്ലാത്ത കേസുകളിലൂടെ വാഹന ഉടമകളെ ബുദ്ധിമുട്ടിക്കാൻ പാടില്ല. അടിസ്ഥാനരഹിതമായ കേസുകൾ എടുക്കുന്നതായി പൊതുജനങ്ങളുടെ പരാതി ലഭിക്കുകയും അന്വേഷണത്തിലൂടെ നിയമപരമായ നടപടികളാണെന്ന് കണ്ടെത്തുകയും ചെയ്താൽ അത്തരം ഉദ്യോഗസ്ഥർക്കെതിരെ കർശന നടപടികൾ സ്വീകരിക്കുമെന്നും അറിയിച്ചിട്ടുണ്ട്.

വാഹനങ്ങളുടെ റൂഫ് ലഗേജ് ക്യാരിയർ അനധികൃത ഓൾട്ടറേഷനായി പരിഗണിക്കാൻ മോട്ടോർവാഹന നിയമത്തിലോ മറ്റ് സർക്കാർ ഉത്തരവുകളിലോ നിർദേശിക്കുന്നില്ല. വിനോദസഞ്ചാരികൾ ഉൾപ്പെടെ ധാരാളമായി ഉപയോഗിക്കുന്ന ടാക്‌സി വാഹനങ്ങളിലെ ലഗേജ് ക്യാരിയറുകൽക്കെതിരെ നിയമപരമല്ലാത്ത ഇത്തരം പിഴ ചുമത്തുന്നതുമൂലം പൊതുജനങ്ങൾ കള്ള ടാക്‌സിയെയും മറ്റും കൂടുതലായി ആശ്രയിക്കുന്ന സാഹചര്യമുണ്ടാകാം. ഇത്തരം നടപടികൾ സാമൂഹിക മാധ്യമങ്ങൾ വഴി വ്യാപകമായി പ്രചരിപ്പിക്കുന്നതിലൂടെ ടൂറിസം മേഖലയെയും ദോഷകരമായി ബാധിച്ചേക്കാം. നിയമപരമല്ലാത്ത ഇത്തരം നടപടികൾ വകുപ്പിന്റെ സത്കീർത്തിക്ക് കളങ്കമേൽപ്പിക്കുന്നതാണെന്നും ഉത്തരവിൽ പറയുന്നു.