2010 മുതലുള്ള ചാറ്റ് എന്റെ പക്കലുണ്ട്, എന്നെ പ്രകോപിപ്പിക്കരുത്; തെളിവുകളോടെ ഞാന്‍ ഒരു വരവ് വരും; എനിക്ക് മൃഗങ്ങളെ ഇഷ്ടമാണ്, അവര്‍ മനുഷ്യരേക്കാള്‍ വിശ്വസ്തര്‍; കോടതിയില്‍ തിരിച്ചടിക്ക് പിന്നാലെ സാന്ദ്ര തോമസിനെ പ്രകോപിപ്പിച്ചും പരിഹസിച്ചും വിജയ ബാബുവിന്റെ പോസ്റ്റ്

കൊച്ചി: പ്രൊഡ്യൂസേഴ്സ് അസോസിയേഷന്‍ സംഘടനാ ഭാരവാഹി തിരഞ്ഞെടുപ്പുമായി ബന്ധപ്പെട്ട കേസില്‍ സാന്ദ്രാ തോമസിന് തിരിച്ചടി നേരിട്ടതിന് പിന്നാലെ ഫേസ്ബുക്ക് പോസ്റ്റുമായി മുന്‍ നിര്‍മ്മാണ പങ്കാളി വിജയ് ബാബു. തന്നെ പ്രകോപിപ്പിക്കരുതെന്നും, ഇനി അങ്ങനെയുണ്ടായാല്‍ 2010 മുതലുള്ള പഴയ ചാറ്റുകള്‍ പുറത്ത് വിടുമെന്നും അദ്ദേഹം കുറിച്ചു. 10 വര്‍ഷമായി ഫ്രൈഡേ ഫിലിം ഹൗസുമായി സാന്ദ്രയ്ക്ക് ഒരു ബന്ധവുമില്ല. നിയമം പരിശോധിക്കുന്നത് വിജയ്ബാബുവിന്റെ സര്‍ട്ടിഫിക്കറ്റ് അല്ലെന്നും, മറിച്ച് അസോസിയേഷന്റെ ബെലോയില്‍ പറഞ്ഞിരിക്കുന്ന കാര്യങ്ങളാണെന്നും കുറിച്ചു.

ഇനി ഓക്കാനിക്കുമ്പോള്‍ സൂക്ഷ്മത പുലര്‍ത്തിയാല്‍ സമൂഹത്തില്‍ അപഹാസ്യരാവാതിരിക്കാം. സാന്ദ്ര തോമസിന് ഫ്രൈഡേ ഫിലിം ഹൗസിനെ പ്രതിനിധീകരിക്കാനും യോഗ്യതയില്ലാത്ത തസ്തികകളിലേക്ക് മത്സരിക്കാനും കഴിയില്ല. ഒരുപാട് കാര്യങ്ങള്‍ ചെയ്ത് വിജയിച്ചവരുടെ പേരെടുത്ത് പറഞ്ഞ് അവരെ മോശമായി ചിത്രീകരിക്കുകയും, അതുവഴി പ്രശസ്തി നേടുകയും ചെയ്യുന്ന നിങ്ങളുടെ ഈ രീതികള്‍ നിര്‍ത്തുക. നിങ്ങളുടെ അസൂയ പരസ്യമായി പ്രദര്‍ശിപ്പിക്കരുത്. 2010 മുതലുള്ള ചാറ്റ് എന്റെ പക്കലുണ്ട്. എന്നെ പ്രകോപിപ്പിക്കരുത്. അങ്ങനെയാണെങ്കില്‍ കൃത്യമായ തെളിവുകളോടുകൂടി എന്റെ ഭാഗം ഞാന്‍ വെളിപ്പെടുത്തും. വിജയ് ബാബു വിശദീകരിക്കുന്നു. തനിക്ക് മൃഗങ്ങളെ ഇഷ്ടമാണെന്നും, അവര്‍ മനുഷ്യരേക്കാള്‍ വിശ്വസ്തരാണെന്നും പരിഹസിച്ചുകൊണ്ടാണ് അദ്ദേഹം പോസ്റ്റ് അവസാനിപ്പിക്കുന്നത്.

പ്രസിഡന്റ്, ട്രഷറര്‍, എക്സിക്യുട്ടീവ് കമ്മിറ്റി സ്ഥാനങ്ങളിലേക്ക് സമര്‍പ്പിച്ച പത്രിക തള്ളിയതിനെതിരെ സാന്ദ്ര നല്‍കിയ ഹര്‍ജി കോടതി തള്ളി. എറണാകുളം സബ് കോടതിയാണ് സാന്ദ്രയുടെ ഹര്‍ജി തള്ളിയത്. നാമനിര്‍ദേശ പത്രിക തള്ളിയതിനെ ചോദ്യം ചെയ്താണ് സാന്ദ്ര കോടതിയില്‍ കേസ് ഫയല്‍ ചെയ്തിരുന്നത്. വിധി വന്നതിന് പിന്നാലെ സാന്ദ്ര മാദ്ധ്യമങ്ങളോട് പ്രതികരിച്ചിരുന്നു.'വിധി നിരാശാജനകം, അപ്രതീക്ഷിതം, നിയമവിദഗ്ദ്ധരുമായി ആലോചിച്ച് ഭാവി നടപടികള്‍ സ്വീകരിക്കും' - എന്നാണ് സാന്ദ്ര പറഞ്ഞത്.

വിജയ ബാബുവിന്റെ പോസ്റ്റിന്റെ പൂര്‍ണരൂപം

നിയമം പരിശോധിക്കുന്നത് വിജയ്ബാബുവിന്റെ സര്‍ട്ടിഫിക്കറ്റ് അല്ല, മറിച്ച് അസോസിയേഷന്റെ ബെലോയില്‍ പറഞ്ഞിരിക്കുന്ന കാര്യങ്ങള്‍ ആണ് നിയമത്തിന്റെ കണ്ണില്‍ എങ്ങനെ എന്നുള്ളതാണ്, അത് കോടതി വിലയിരുത്തും. അത്രേ എനിക്കുപറയാനുള്ളു സാന്ദ്ര.

സാന്ദ്ര ഇനി ഓക്കാനിക്കുമ്പോള്‍ സൂക്ഷ്മത പുലര്‍ത്തിയാല്‍ സമൂഹത്തില്‍ അപഹാസ്യരാവാതിരിക്കാമെന്ന് ഓര്‍ത്താല്‍ നന്ന്.

സാന്ദ്ര തോമസിന് ഫ്രൈഡേ ഫിലിം ഹൗസിനെ പ്രതിനിധീകരിക്കാനും യോഗ്യതയില്ലാത്ത തസ്തികകളിലേക്ക് മത്സരിക്കാനും കഴിയില്ല.

സാന്ദ്ര തന്റെ സ്ഥാപനത്തെ പ്രതിനിധീകരിച്ച് അവള്‍ മത്സരിക്കുന്ന എക്‌സിക്യൂട്ടീവ് കമ്മിറ്റി സ്ഥാനത്തേക്ക് മാത്രമേ മത്സരിക്കാന്‍ കഴിയൂ. ആരാണ് അതിനെ എതിര്‍ക്കുന്നത്. അവള്‍ക്കും എല്ലാവിധ ആശംസകളും നേരുന്നു. എനിക്കറിയാവുന്നിടത്തോളം സെന്‍സര്‍ വ്യക്തികള്‍ക്കല്ല, സ്ഥാപനത്തിനാണ്. കോടതി അത് വ്യക്തമായി പറഞ്ഞിട്ടുണ്ട്. കുറച്ചുകാലം ഫ്രൈഡേ ഫിലിം ഹൗസിനെ പ്രതിനിധീകരിച്ച അവര്‍ 2016 ല്‍ നിയമപരമായി രാജിവച്ചു (എല്ലാം കോടതി നോട്ടറി ചെയ്തു) അവരുടെ വിഹിതമോ അതില്‍ കൂടുതലോ വാങ്ങിയ ശേഷം. 10 വര്‍ഷമായി ഫ്രൈഡേ ഫിലിം ഹൗസുമായി അവര്‍ക്ക് ഒരു ബന്ധവുമില്ല. കോടതി തീരുമാനിച്ചു. തീരുമാനത്തെ മാനിക്കുന്നു.

**pls remember .. technology is for everyone.

My icloud and all the chats are here with me too from 2010. Keep your narratives for u and for your fake limelight by taking names of people who has made a mark and are successful in their own ways . Do not exhibit your jeloysy in public . Don't provoke me . Then i will have my narrative alongwith solid proof .

Thankss sandra..... I love animals .. they are more trust worthy than humans .

അസോസിയേഷനില്‍ മൂല്യനിര്‍ണയം നടത്തിയ വരണാധികാരിയുടെ തീരുമാനം പക്ഷപാതപരമായിരുന്നുവെന്ന് ചൂണ്ടിക്കാട്ടിയായിരുന്നു സാന്ദ്ര കോടതിയെ സമീപിച്ചത്. അസോസിയേഷന്‍ തിരഞ്ഞെടുപ്പില്‍ സൂക്ഷ്മപരിശോധനയ്ക്ക് ഒരു വരണാധികാരിയെ നിയമിക്കാം എന്ന് സംഘടനയുടെ നിയമാവലിയില്‍ പറഞ്ഞിട്ടില്ലെന്നും നിയമാവലിയില്‍ ഇല്ലാത്ത വരണാധികാരിയെ നിയമിച്ചതിനെയും കോടതിയില്‍ ചോദ്യം ചെയ്തിട്ടുണ്ടെന്നും സാന്ദ്ര വെളിപ്പെടുത്തിയിരുന്നു.

യോഗ്യത കാണിക്കാന്‍ ആവശ്യമായ സിനിമകളുടെ എണ്ണം നല്‍കിയിട്ടില്ലെന്ന് ചൂണ്ടിക്കാണിച്ചാണ് വരണാധികാരി പത്രിക തള്ളിയത്. ഒമ്പത് സിനിമകള്‍ നിര്‍മിച്ചിട്ടുണ്ടെന്നാണ് സാന്ദ്രയുടെ വാദം. ഫ്രൈഡേ ഫിലിംസുമായി സഹകരിച്ച് ഏഴ് സിനിമകളും സ്വന്തം ബാനറില്‍ രണ്ടും. എന്നാല്‍, നിര്‍മാതാവ് എന്ന നിലയില്‍ സ്വതന്ത്രമായി മൂന്ന് സിനിമകളുടെ സെന്‍സര്‍ സര്‍ട്ടിഫിക്കറ്റ് വേണമെന്നായിരുന്നു വരണാധികാരിയുടെ നിലപാട്. സാന്ദ്ര നല്‍കിയ മൂന്ന് സര്‍ട്ടിഫിക്കറ്റുകളില്‍ അവസാനത്തേത് ഫ്രൈഡേ ഫിലിംസിന്റെ ബാനറിലുള്ളതാണെന്നും അത് പരിഗണിക്കാനാകില്ലെന്നും വരണാധികാരി പറഞ്ഞു. എതിര്‍ത്തപ്പോള്‍ സാന്ദ്രയ്ക്ക് കോടതിയെ സമീപിക്കാമെന്നായിരുന്നു വരണാധികാരിയുടെ നിര്‍ദേശം.