സഹപാഠികളെ ചുറ്റിക കൊണ്ട് ആക്രമിച്ചു; എട്ടു വിദ്യാര്‍ഥികള്‍ക്ക് പരിക്ക്; 22കാരി അറസ്റ്റിൽ; സംഭവം ജപ്പാനിലെ സര്‍വകലാശാല ക്യാമ്പസിൽ
ടോക്യോ: ജപ്പാനിലെ സര്‍വകലാശാലയില്‍ സഹപാഠികളെ ചുറ്റിക കൊണ്ട് ആക്രമിച്ച വിദ്യാര്‍ഥിനി അറസ്റ്റിൽ. ആക്രമണത്തില്‍ എട്ടു വിദ്യാര്‍ഥികള്‍ക്കാണ് പരിക്കേറ്റത്. ടോക്യോയിലെ ഹോസെയി സര്‍വകലാശാലയുടെ ടാമ ക്യാമ്പസിലാണ് അക്രമം നടന്നത്. 22 കാരിയായ സോഷ്യോളജി വിദ്യാർത്ഥിനിയാണ് അറസ്റ്റിലായത്.
ക്ലാസ് നടക്കുന്ന സമയത്ത് വിദ്യാര്‍ഥിനി ചുറ്റിക കൊണ്ട് ആക്രമിക്കുകയായിരുന്നു എന്നാണ് വിവരം. ആക്രമണത്തിന് പിന്നാലെ ഈ പെണ്‍കുട്ടിയെ സര്‍വകലാശാലയിലെ ജീവനക്കാര്‍ തടഞ്ഞുവെച്ചിരുന്നു. പരിക്കേറ്റവരില്‍ ആരുടെയും നില ഗുരുതരമല്ലെന്നും ഇവര്‍ അബോധാവസ്ഥയില്‍ അല്ലെന്നുമാണ് റിപ്പോര്‍ട്ടുകൾ. സംഭവത്തിൽ കൂടുതൽ അന്വേഷണം നടന്നു വരികയാണ്. ആക്രമണത്തിന് പിന്നിലെ കാരണം വ്യക്തമല്ല.
യു.എസ് ഉള്‍പ്പെടെയുള്ള മറ്റ് വിദേശരാജ്യങ്ങളെ അപേക്ഷിച്ച് ജപ്പാനിലെ വിദ്യാഭ്യാസ സ്ഥാപനങ്ങളില്‍ അക്രമസംഭവങ്ങള്‍ താരതമ്യേന കുറവാണ്. രാജ്യത്ത് തോക്ക് ഉപയോഗിക്കുന്നതുമായി ബന്ധപ്പെട്ട നിയമങ്ങള്‍ കര്‍ശനമാണ് എന്നതാണ് ഇതിന്റെ പ്രധാനകാരണം. സമീപ വർഷങ്ങളിലെ ഏറ്റവും ഞെട്ടിപ്പിക്കുന്ന കുറ്റകൃത്യം 2022-ൽ മുൻ ജാപ്പനീസ് പ്രധാനമന്ത്രി ഷിൻസോ ആബെയുടെ കൊലപാതകമായിരുന്നു.