യുദ്ധം കാരണം ഇഷ്ടപ്പെട്ട വണ്ടി പോലും നേരെ ഓടിക്കാൻ പറ്റുന്നില്ല; പലതും വീട്ടുമുറ്റത്ത് പൊടി അടിച്ച് കിടക്കുന്ന അവസ്ഥ; ഹോർമുസ് കടലിടുക്ക് അടച്ചിടലും ഇറാന്റെ മിസൈൽ ആക്രമണവും കാരണം പൊറുതിമുട്ടി ഈ രണ്ട് രാജ്യങ്ങൾ; പെട്രോൾ പമ്പുകളിൽ കർശന നിർദ്ദേശങ്ങളുമായി ഭരണകൂടം; ജനങ്ങൾ ആശങ്കയിൽ

കൊളംബോ: പശ്ചിമേഷ്യയിൽ പടരുന്ന യുദ്ധസമാനമായ സാഹചര്യം സൃഷ്ടിച്ച കടുത്ത ഇന്ധനക്ഷാമം മറികടക്കാൻ പ്രവൃത്തി ദിനങ്ങൾ വെട്ടിക്കുറച്ചുകൊണ്ട് ശ്രീലങ്ക അതീവ ജാഗ്രതാനിർദ്ദേശങ്ങൾ പുറപ്പെടുവിച്ചിരിക്കുകയാണ്. ഹോർമുസ് കടലിടുക്ക് അടച്ചതോടെ അന്താരാഷ്ട്ര തലത്തിൽ ഇന്ധന വിതരണം തടസ്സപ്പെട്ട പശ്ചാത്തലത്തിലാണ് രാജ്യം ആഴ്ചയിൽ നാല് ദിവസത്തെ പ്രവൃത്തി ദിനങ്ങളിലേക്ക് മാറിയതെന്ന് ചാനൽ ന്യൂസ് ഏഷ്യ റിപ്പോർട്ട് ചെയ്യുന്നു.

2022-ലെ സമാനതകളില്ലാത്ത സാമ്പത്തിക മാന്ദ്യത്തിൽ നിന്ന് സാവധാനം കരകയറിക്കൊണ്ടിരിക്കുന്ന ശ്രീലങ്കയ്ക്ക്, പുതിയ പ്രതിസന്ധി വലിയ വെല്ലുവിളിയാണ് ഉയർത്തുന്നത്. യുദ്ധം മൂന്നാം ആഴ്ചയിലേക്ക് കടന്നതോടെ ഇറക്കുമതി ചെയ്യുന്ന ഊർജ്ജത്തെ മാത്രം ആശ്രയിച്ചു കഴിയുന്ന രാജ്യങ്ങൾ കടുത്ത പ്രതിസന്ധിയിലായിരിക്കുകയാണ്. നേരത്തെ അയൽരാജ്യമായ പാകിസ്ഥാനും സമാനമായ നിയന്ത്രണങ്ങൾ ഏർപ്പെടുത്തിയിരുന്നു. സ്ഥിതിഗതികൾ കൂടുതൽ വഷളാകുന്നതിന് മുൻപ് ഇന്ധന ഉപഭോഗം പരമാവധി കുറയ്ക്കുക എന്ന ലക്ഷ്യത്തോടെയാണ് സർക്കാർ ഈ കടുത്ത തീരുമാനത്തിലേക്ക് നീങ്ങിയത്.

പ്രസിഡന്റ് അനുര കുമാര ദിസനായകെയുടെ അധ്യക്ഷതയിൽ ചേർന്ന അടിയന്തര യോഗത്തിന് ശേഷമാണ് പുതിയ നിയന്ത്രണങ്ങൾ പ്രഖ്യാപിച്ചത്. പുതിയ സമയക്രമം സ്കൂളുകൾക്കും സർവ്വകലാശാലകൾക്കും ഒരുപോലെ ബാധകമായിരിക്കുമെന്ന് അവശ്യ സേവനങ്ങളുടെ കമ്മീഷണർ ജനറൽ പ്രബാത്ത് ചന്ദ്രകീർത്തി അറിയിച്ചു. അനിശ്ചിതകാലത്തേക്ക് നീണ്ടുനിൽക്കാവുന്ന ഈ മാറ്റത്തിൽ, എല്ലാ ബുധനാഴ്ചയും അവധി ദിനമായി പ്രഖ്യാപിച്ചിരിക്കുകയാണ്.

സ്വകാര്യ മേഖലയും ഇതേ മാതൃക പിന്തുടരണമെന്ന് സർക്കാർ നിർദ്ദേശിച്ചു. ഏറ്റവും മോശമായ സാഹചര്യങ്ങളെ നേരിടാൻ രാജ്യം സജ്ജമാകണമെന്നും എന്നാൽ നല്ലൊരു നാളേക്കായി പ്രതീക്ഷിക്കണമെന്നും പ്രസിഡന്റ് ജനങ്ങളോട് ആഹ്വാനം ചെയ്തു. അതേസമയം, ജനജീവിതം പൂർണ്ണമായും സ്തംഭിക്കാതിരിക്കാൻ ആശുപത്രികൾ, തുറമുഖങ്ങൾ, മറ്റ് അടിയന്തര സേവനങ്ങൾ എന്നിവ സാധാരണ നിലയിൽ പ്രവർത്തിക്കുമെന്ന് ഉറപ്പാക്കിയിട്ടുണ്ട്.

ഇന്ധന വിതരണത്തിൽ കർശനമായ റേഷനിംഗ് ഏർപ്പെടുത്തിയതാണ് മറ്റൊരു പ്രധാന നടപടി. മാർച്ച് 15 മുതൽ സാധാരണ വാഹന ഉടമകൾക്ക് ആഴ്ചയിൽ പരമാവധി 15 ലിറ്റർ പെട്രോളോ ഡീസലോ മാത്രമേ ലഭിക്കൂ. എന്നാൽ പൊതുഗതാഗത മേഖലയെ സഹായിക്കുന്നതിനായി ബസ് ഓപ്പറേറ്റർമാർക്കും മറ്റും 200 ലിറ്റർ വരെ ഇന്ധനം ലഭ്യമാക്കും. നിലവിലെ കണക്കനുസരിച്ച് രാജ്യത്തെ ഇന്ധന ശേഖരം ഏകദേശം ആറ് ആഴ്ചത്തേക്ക് കൂടി മാത്രമേ തികയുകയുള്ളൂ. പെട്രോൾ, ഡീസൽ എന്നിവയ്ക്കായി പൂർണ്ണമായും ഇറക്കുമതിയെ ആശ്രയിക്കുന്ന ശ്രീലങ്ക, വൈദ്യുതി ഉൽപ്പാദനത്തിനുള്ള കൽക്കരിയും വിദേശങ്ങളിൽ നിന്നാണ് വാങ്ങുന്നത്. ശുദ്ധീകരിച്ച പെട്രോളിയം ഉൽപ്പന്നങ്ങൾ പ്രധാനമായും സിംഗപ്പൂർ, മലേഷ്യ, ദക്ഷിണ കൊറിയ എന്നിവിടങ്ങളിൽ നിന്നാണ് എത്തുന്നത്. അസംസ്കൃത എണ്ണയ്ക്കായി മിഡിൽ ഈസ്റ്റ് രാജ്യങ്ങളെയാണ് അവർ പ്രധാനമായും ആശ്രയിക്കുന്നത്.

ഊർജ്ജ പ്രതിസന്ധി ലഘൂകരിക്കുന്നതിന്റെ ഭാഗമായി പൊതുചടങ്ങുകൾ താൽക്കാലികമായി നിർത്തിവെക്കാൻ സർക്കാർ ഉത്തരവിട്ടു. സിവിൽ സർവീസ് ഉദ്യോഗസ്ഥരോട് സാധ്യമാകുന്നിടത്തെല്ലാം വീട്ടിലിരുന്ന് ജോലി ചെയ്യാൻ ആവശ്യപ്പെട്ടിട്ടുണ്ട്. യാത്രകൾ പരിമിതപ്പെടുത്തുന്നതിലൂടെ ഇന്ധന ഉപഭോഗം കുറയ്ക്കാമെന്നാണ് അധികൃതരുടെ കണക്കുകൂട്ടൽ.

ആഗോള വിപണിയിലെ അസ്ഥിരത ശ്രീലങ്കയുടെ സമ്പദ്‌വ്യവസ്ഥയെ വീണ്ടും തളർത്താതിരിക്കാനുള്ള മുൻകരുതൽ നടപടികളാണ് ഇപ്പോൾ യുദ്ധകാലാടിസ്ഥാനത്തിൽ നടപ്പിലാക്കുന്നത്. വിദേശ നാണയ ശേഖരത്തെ ബാധിക്കാത്ത രീതിയിൽ ഊർജ്ജ ഇറക്കുമതി നിയന്ത്രിക്കുക എന്നത് സർക്കാരിന് മുന്നിലുള്ള വലിയ വെല്ലുവിളിയാണ്.