ഇറാനിലെ ഭരണമാറ്റം അനായാസമാകുമെന്ന നെതന്യാഹുവിന്റെ വാദങ്ങള് പാളി; ഇറാന് പരമോന്നത നേതാവ് ഖമേനി കൊല്ലപ്പെട്ടിട്ടും ഭരണകൂടം തകരാത്തത് ഇസ്രയേലിന്റെ രഹസ്യാന്വേഷണ പാളിച്ചയെന്ന് വിലയിരുത്തി അമേരിക്ക; പശ്ചിമേഷ്യയില് നയതന്ത്രപ്പോര് മുറുകുന്നു: നെതന്യാഹുവിനെതിരെ പൊട്ടിത്തെറിച്ച് ജെ.ഡി വാന്സ്
വാഷിംഗ്ടണ്: ഇറാന് വിഷയത്തില് ഇസ്രയേല് പ്രധാനമന്ത്രി ബെഞ്ചമിന് നെതന്യാഹുവും അമേരിക്കന് വൈസ് പ്രസിഡന്റ് ജെ.ഡി വാന്സും തമ്മില് കടുത്ത വാഗ്വാദം നടന്നതായി റിപ്പോര്ട്ടുകള്. ഇറാനിലെ ഭരണമാറ്റം അനായാസമാണെന്ന നെതന്യാഹുവിന്റെ വാദങ്ങള് പാളിയതാണ് അമേരിക്കന് ഭരണകൂടത്തെ ചൊടിപ്പിച്ചത്.
ഇറാന് പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടിട്ടും അവിടുത്തെ തീവ്രവാദ വിഭാഗങ്ങള് അധികാരം മുറുക്കുന്നതും ഭരണകൂടം തകരാത്തതും നെതന്യാഹു നല്കിയ ഉറപ്പുകള്ക്ക് വിരുദ്ധമാണെന്ന് വാന്സ് ഫോണ് സംഭാഷണത്തില് കുറ്റപ്പെടുത്തി. യുദ്ധം അവസാനിപ്പിക്കാനുള്ള ചര്ച്ചകള്ക്ക് നേതൃത്വം നല്കാന് പ്രസിഡന്റ് ട്രംപ് നിയോഗിച്ച വാന്സ്, നെതന്യാഹുവിനോട് കയര്ത്തു സംസാരിച്ചതായാണ് വിവരം.
ഇസ്രയേലിന്റെ വാദങ്ങള് വിശ്വസിച്ച് യുദ്ധത്തിലേക്ക് എടുത്തുചാടിയ ട്രംപ് ഭരണകൂടം ഇപ്പോള് കടുത്ത സമ്മര്ദ്ദത്തിലാണ്. വെസ്റ്റ് ബാങ്കിലെ ഫലസ്തീനികള്ക്കെതിരെയുള്ള ഇസ്രയേലി കുടിയേറ്റക്കാരുടെ അതിക്രമങ്ങളെക്കുറിച്ചും വാന്സ് രൂക്ഷമായ ഭാഷയില് സംസാരിച്ചതായി ഇസ്രയേല് മാധ്യമങ്ങള് റിപ്പോര്ട്ട് ചെയ്തു. എന്നാല് വാന്സിനെ അപകീര്ത്തിപ്പെടുത്താന് ഇസ്രയേല് തന്നെ പടച്ചുവിട്ട വ്യാജവാര്ത്തയാണിതെന്ന് വൈറ്റ് ഹൗസ് വൃത്തങ്ങള് സംശയിക്കുന്നുണ്ട്. പശ്ചിമേഷ്യയിലെ സ്ഥിതിഗതികള് ട്രംപ് വിചാരിച്ചതുപോലെ ലളിതമല്ലെന്ന തിരിച്ചറിവിലാണ് ഇപ്പോള് അമേരിക്കന് നേതൃത്വം.
അതേസമയം, സമാധാന ചര്ച്ചകള് പുരോഗമിക്കുന്നതിനിടയിലും ഇറാന് തങ്ങളുടെ കടുത്ത നിലപാടുകളില് മാറ്റം വരുത്തിയിട്ടില്ല. അമേരിക്ക മുന്നോട്ടുവെച്ച 15 ഇന സമാധാന കരാര് ഇറാന് തള്ളി. ഗള്ഫ് മേഖലയിലെ അമേരിക്കന് സൈനിക താവളങ്ങള് മാറ്റണമെന്നും യുദ്ധ നഷ്ടപരിഹാരം വേണമെന്നുമാണ് ഇറാന്റെ ആവശ്യം. ഇതിനുപുറമെ, ഹോര്മുസ് കടലിടുക്കിന്റെ നിയന്ത്രണം ഏറ്റെടുത്ത് സൂയസ് കനാലിലേതുപോലെ കപ്പലുകളില് നിന്ന് നികുതി ഈടാക്കാനുള്ള നീക്കവും ഇറാന് നടത്തുന്നുണ്ട്.
ഏപ്രില് ആറു വരെ ഇറാനിലെ ഊര്ജ്ജ നിലയങ്ങള് ആക്രമിക്കില്ലെന്ന് ട്രംപ് പ്രഖ്യാപിച്ചിട്ടുണ്ടെങ്കിലും മേഖലയിലെ അനിശ്ചിതത്വം തുടരുകയാണ്. ഇസ്രയേലും അമേരിക്കയും തമ്മിലുള്ള ഭിന്നത പശ്ചിമേഷ്യന് രാഷ്ട്രീയത്തില് പുതിയൊരു വഴിത്തിരിവാകാന് സാധ്യതയുണ്ട്. ഇറാനിലെ അറാക് ആണവ കേന്ദ്രത്തിന് നേരെ ഇസ്രയേല് നടത്തിയ അപ്രതീക്ഷിത വ്യോമാക്രമണം പശ്ചിമേഷ്യയെ വീണ്ടും യുദ്ധത്തിന്റെ വക്കിലെത്തിച്ചിരിക്കുകയാണ്. ഇതിനു പിന്നാലെയാണ് അമേരിക്കന് വൈസ് പ്രസിഡന്റ് ജെ.ഡി വാന്സും ഇസ്രയേല് പ്രധാനമന്ത്രി ബെഞ്ചമിന് നെതന്യാഹുവും തമ്മില് ഫോണിലൂടെ കടുത്ത വാഗ്വാദത്തില് ഏര്പ്പെട്ടത് നയതന്ത്ര മേഖലയില് പുതിയ വിള്ളലുകള് വീഴ്ത്തിയിരിക്കുന്നു.
ഇറാനിലെ ഭരണമാറ്റം അനായാസമാകുമെന്ന നെതന്യാഹുവിന്റെ വാദങ്ങള് പാളിയതാണ് വൈറ്റ് ഹൗസിനെ ചൊടിപ്പിച്ചത്. ഇറാന് പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടിട്ടും അവിടുത്തെ ഭരണകൂടം തകരാത്തത് ഇസ്രയേലിന്റെ രഹസ്യാന്വേഷണ പാളിച്ചയായാണ് അമേരിക്ക കാണുന്നത്.