ജോലി ശരിയാക്കിത്തരാമെന്ന് വിശ്വസിപ്പിച്ച് സൗഹൃദം സ്ഥാപിച്ച ശേഷം താമസസ്ഥലത്തെത്തി പീഡിപ്പിച്ചു; ഈ പരാതിയും ഗൗരവത്തില് എടുത്ത് കോണ്ഗ്രസ്; ലൈംഗിക പീഡന പരാതി; പാലക്കാട് കോണ്ഗ്രസ് കൗണ്സിലര്ക്കെതിരെ നടപടി; പ്രശോഭ് സി വല്സനെ പാര്ട്ടിയില് നിന്ന് പുറത്താക്കി; പ്രതിയെ തിരഞ്ഞ് പോലീസ്; കൗണ്സിലര് സ്ഥാനവും രാജിവയ്ക്കണമെന്ന് കോണ്ഗ്രസ്
പാലക്കാട്: ജോലി വാഗ്ദാനം ചെയ്ത് ദളിത് യുവതിയെ പീഡിപ്പിച്ചെന്ന പരാതിയില് പാലക്കാട് നഗരസഭയിലെ കോണ്ഗ്രസ് കൗണ്സിലര് പ്രശോഭ് സി. വല്സനെ പാര്ട്ടിയില് നിന്ന് പുറത്താക്കി. കെ.പി.സി.സി. നേതൃത്വത്തിന്റെ നിര്ദ്ദേശപ്രകാരം ഡി.സി.സി. പ്രസിഡന്റ് എ. തങ്കപ്പനാണ് നടപടി പ്രഖ്യാപിച്ചത്. കൗണ്സിലര് സ്ഥാനവും പ്രശോഭ് രാജിവെക്കണമെന്ന് കോണ്ഗ്രസ് നേതൃത്വം ആവശ്യപ്പെട്ടു. യുവതിയുടെ പരാതിയില് പോലീസ് അന്വേഷണം ഊര്ജ്ജിതമാക്കിയിട്ടുണ്ട്. നിലവില് ഒളിവിലുള്ള പ്രതിക്കായി തിരച്ചില് തുടരുകയാണ്.
ജോലി ശരിയാക്കിത്തരാമെന്ന് വിശ്വസിപ്പിച്ച് സൗഹൃദം സ്ഥാപിച്ച ശേഷം താമസസ്ഥലത്തെത്തി പീഡിപ്പിച്ചുവെന്നാണ് യുവതിയുടെ പരാതി. മുഖ്യമന്ത്രിക്കും ജില്ലാ പോലീസ് മേധാവിക്കും നല്കിയ പരാതിയുടെ അടിസ്ഥാനത്തില് യുവതിയുടെ മൊഴി ഉടന് രേഖപ്പെടുത്തും. എം.എല്.എ. രാഹുല് മാങ്കൂട്ടത്തിലുമായി അടുത്ത ബന്ധമുള്ളയാളാണ് പ്രശോഭ് എന്നതിനാല് വിഷയം രാഷ്ട്രീയമായി വലിയ ചര്ച്ചകള്ക്കാണ് വഴിമരുന്നിട്ടിരിക്കുന്നത്. പ്രശോഭിനെതിരെ കേസെടുത്ത് ഉടന് അറസ്റ്റ് ചെയ്തില്ലെങ്കില് ശക്തമായ സമരപരിപാടികളുമായി മുന്നോട്ട് പോകുമെന്ന് എന്.ഡി.എ. സ്ഥാനാര്ത്ഥി ശോഭ സുരേന്ദ്രന് മുന്നറിയിപ്പ് നല്കി.
മനുഷ്യത്വത്തിന് നിരക്കാത്ത പ്രവൃത്തിയാണ് നടന്നതെന്നും ജനപ്രതിനിധികളുടെ തണലിലാണ് ഇത്തരം അതിക്രമങ്ങള് അരങ്ങേറുന്നതെന്നും എല്.ഡി.എഫ്. സ്ഥാനാര്ത്ഥി എന്.എം.ആര്. റസാഖ് പ്രതികരിച്ചു. വരാനിരിക്കുന്ന തിരഞ്ഞെടുപ്പില് ഈ വിഷയം പ്രധാന ചര്ച്ചാവിഷയമാക്കാന് ഒരുങ്ങുകയാണ് മുന്നണികള്. പ്രതിയെ സംരക്ഷിക്കാനാണ് പോലീസ് നീക്കമെങ്കില് എസ്.പി. ഓഫീസിന് മുന്നില് പ്രതിഷേധം സംഘടിപ്പിക്കുമെന്നും ശോഭ സുരേന്ദ്രന് വ്യക്തമാക്കി. ഈ സാഹചര്യത്തിലാണ് കോണ്ഗ്രസ് നടപടി എടുക്കുന്നത്.
ജോലി വാഗ്ദാനം നല്കി പീഡിപ്പിക്കുകയും ഗര്ഭിണിയാക്കുകയും ചെയ്തുവെന്ന് കാണിച്ച് നഗരസഭയിലെ 24-ാം വാര്ഡ് കൗണ്സിലറായ പ്രശോഭ് സി. വത്സനെതിരെയാണ് യുവതി മുഖ്യമന്ത്രിക്ക് പരാതി നല്കിയത്. പരാതിയുടെ ഗൗരവം കണക്കിലെടുത്ത് മുഖ്യമന്ത്രിയുടെ ഓഫീസ് ഇത് പാലക്കാട് ജില്ലാ പോലീസ് മേധാവിക്ക് കൈമാറി. ബ്യൂട്ടീഷ്യന് കോഴ്സ് പഠിക്കാനായി നഗരത്തിലെത്തിയ യുവതിയുമായി പ്രശോഭ് സൗഹൃദം സ്ഥാപിക്കുകയായിരുന്നു. ജോലി വാഗ്ദാനം നല്കി വിശ്വസിപ്പിച്ച ഇയാള് യുവതിയെ കാറിലും ലോഡ്ജുകളിലും വാടക വീടുകളിലും എത്തിച്ച് നിരന്തരം പീഡനത്തിനിരയാക്കിയെന്നാണ് പരാതിയില് പറയുന്നത്. യുവതി ഗര്ഭിണിയാണെന്നറിഞ്ഞതോടെ ഇയാള് സ്വഭാവം മാറ്റുകയും നിര്ബന്ധിച്ച് ഗര്ഭഛിദ്രത്തിനുള്ള ഗുളികകള് നല്കുകയും ചെയ്തുവെന്നും യുവതി ആരോപിക്കുന്നു.
ഉന്നതരായ രാഷ്ട്രീയ നേതാക്കളുമായി തനിക്ക് അടുത്ത ബന്ധമുണ്ടെന്ന് കാണിച്ച് പ്രശോഭ് യുവതിയെ ഭയപ്പെടുത്തിയിരുന്നതായും പരാതിയിലുണ്ട്. എം.എല്.എ, എം.പി എന്നിവരോടൊപ്പമുള്ള ചിത്രങ്ങള് കാണിച്ചാണ് ഇയാള് തന്നെ സ്വാധീനിക്കാന് ശ്രമിച്ചതെന്ന് യുവതി പറഞ്ഞു. പ്രശോഭിനെ തദ്ദേശ തിരഞ്ഞെടുപ്പില് സ്ഥാനാര്ത്ഥിയാക്കിയതില് പ്രതിഷേധിച്ച് നേരത്തെ തന്നെ ഏഴ് കോണ്ഗ്രസ് ഭാരവാഹികള് രാജിവെച്ചിരുന്നു. രാഹുല് മാങ്കൂട്ടത്തില് ജയില്മോചിതനായി എത്തിയപ്പോള് സ്വീകരണ പരിപാടികള്ക്ക് നേതൃത്വം നല്കിയതും പ്രശോഭായിരുന്നു.
സംഭവത്തില് പോലീസ് കേസെടുത്ത് അന്വേഷണം ആരംഭിച്ചു. യുവതിയുടെ രഹസ്യമൊഴി രേഖപ്പെടുത്തുന്നതടക്കമുള്ള നടപടികള് ഉടന് പൂര്ത്തിയാക്കും. അതേസമയം, ഒളിവില് പോയ പ്രതിക്കായി പോലീസ് തിരച്ചില് ഊര്ജ്ജിതമാക്കിയിട്ടുണ്ട്.