കമ്യൂണിസ്റ്റ് പാര്‍ട്ടിയുമായി ബന്ധമുള്ള ചൈനീസ് യുവതിയോട് പ്രണയം; യുഎസ് നയതന്ത്ര ഉദ്യോഗസ്ഥനെ വിദേശ സര്‍വീസില്‍ നിന്ന് പുറത്താക്കി ട്രംപ്; ചൈനീസ് പൗരന്മാരുമായി പ്രണയബന്ധത്തിലോ ലൈംഗികബന്ധത്തിലോ ഏര്‍പ്പെടുന്നതിന് വിലക്കേര്‍പ്പെടുത്തിയതിന് പിന്നാലെ ജോലി തെറിപ്പിക്കല്‍ സംഭവവും
കമ്യൂണിസ്റ്റ് പാര്‍ട്ടിയുമായി ബന്ധമുള്ള ചൈനീസ് യുവതിയോട് പ്രണയം
വാഷിങ്ടണ്‍: ചൈനീസ് കമ്യൂണിസ്റ്റ് പാര്‍ട്ടി(സിസിപി)യുമായി ബന്ധമുള്ള ചൈനീസ് യുവതിയുമായി പ്രണയബന്ധത്തില്‍ ഏര്‍പ്പെട്ടതിന് ചൈനയില്‍ നിയോഗിച്ചിരുന്ന നയതന്ത്ര ഉദ്യോഗസ്ഥനെ വിദേശസര്‍വീസില്‍നിന്ന് പുറത്താക്കി യുഎസിലെ ഡൊണാള്‍ഡ് ട്രംപ് ഭരണകൂടം. യുഎസ് സ്റ്റേറ്റ് ഡിപ്പാര്‍ട്മെന്റ് വക്താവ് ടോമി പിഗോട്ടാണ് ഇക്കാര്യം പ്രസ്താവനയിലൂടെ അറിയിച്ചത്. പുറത്താക്കപ്പെട്ടത് ഏത് ഉദ്യോഗസ്ഥനെയാണെന്ന് വെളിപ്പെടുത്തിയിട്ടില്ല.
ഉദ്യോഗസ്ഥനും അദ്ദേഹത്തിന്റെ ചൈനീസ് പ്രണയിനിയും ഉള്‍പ്പെടുന്ന വീഡിയോ, കണ്‍സര്‍വേറ്റീവ് മുന്നണിപ്പോരാളിയായ ജെയിംസ് ഔകീഫെ ഓണ്‍ലൈനില്‍ പങ്കുവെച്ചിട്ടുണ്ടെന്നാണ് വിവരം. ഇതോടെയാണ് ഈ പ്രണയബന്ദം പുറത്തുവന്നത്. ചൈനയില്‍ നിയോഗിക്കപ്പെട്ടിട്ടുള്ള അമേരിക്കക്കാരായ ഉദ്യോഗസ്ഥരും കുടുംബാംഗങ്ങളും ഉള്‍പ്പെടെയുള്ളവര്‍ ചൈനീസ് പൗരന്മാരുമായി പ്രണയബന്ധത്തിലോ ലൈംഗികബന്ധത്തിലോ ഏര്‍പ്പെടുന്നതിന് വിലക്ക് നിലവില്‍വന്നത് ജോ ബൈഡന്‍ ഭരണകൂടത്തിന്റെ അവസാനകാലത്തായിരുന്നു.
സ്റ്റേറ്റ് ഡിപ്പാര്‍ട്ട്മെന്റ് പുറപ്പെടുവിച്ച ഈ വിലക്ക് പ്രകാരം ഇതാദ്യമായാണ് ഒരു ഉദ്യോഗസ്ഥന്‍ ജോലിയില്‍നിന്ന് പുറത്താക്കപ്പെടുന്നത്. വിഷയം പ്രസിഡന്റ് ഡൊണാള്‍ഡ് ട്രംപും സ്റ്റേറ്റ് സെക്രട്ടറി മാര്‍ക്ക് റൂബിയോയും വിലയിരുത്തിയെന്നും സിസിപിയുമായി ബന്ധമുള്ള ചൈനീസ് യുവതിയോടുള്ള പ്രണയം ഒളിപ്പിച്ചുവെച്ചെന്ന് ഉദ്യോഗസ്ഥന്‍ സമ്മതിച്ചതിന് പിന്നാലെയാണ് നടപടിയെന്നും പിഗോട്ട് കൂട്ടിച്ചേര്‍ത്തു.
സേവനം അവസാനിപ്പിച്ച് തിരിച്ചുപോകുന്ന ചൈനയിലെ യു.എസ് അംബാസഡര്‍ നിക്കോളാസ് ബേണ്‍സാണ് ജനുവരിയില്‍ പ്രണയ വിലക്ക് ഏര്‍പ്പെടുത്തി തീരുമാനം കൈക്കൊണ്ടത്. ഡോണള്‍ഡ് ട്രംപ് യു.എസ് പ്രസിഡന്റ് ആയി ചുമതലയേല്‍ക്കുന്നതിന് ദിവസങ്ങള്‍ക്ക് മുമ്പാണിത്. ചൈനീസ് പൗരന്മാരുമായി ദീര്‍ഘകാല ബന്ധമുള്ള ഉദ്യോഗസ്ഥര്‍ക്ക് ഇളവുകള്‍ക്ക് അപേക്ഷിക്കാം. പക്ഷേ, ഇളവ് നിഷേധിക്കപ്പെട്ടാല്‍ ബന്ധം അവസാനിപ്പിക്കുകയോ ജോലി ഉപേക്ഷിക്കുകയോ ചെയ്യേണ്ടിവരും. നിലവില്‍ മറ്റു രാജ്യങ്ങളിലെ ഉദ്യോഗസ്ഥര്‍ക്ക് യു.എസ് വിലക്കുകളൊന്നും ഏര്‍പ്പെടുത്തിയിരുന്നില്ല.