കോണ്‍ഗ്രസ് സ്ഥാനാര്‍ഥിക്ക് നേരെയുള്ള കരിഓയില്‍ പ്രയോഗം: സമഗ്രമായ അന്വേഷണം ആവശ്യപ്പെട്ട് സിപിഎം ലോക്കല്‍ സെക്രട്ടറിയും പോലീസില്‍ പരാതി നല്‍കി; കരിഓയില്‍ വീണ ഷര്‍ട്ടും മുണ്ടും ധരിച്ച് സ്ഥാനാര്‍ഥിയും ഗൃഹപര്യടനത്തില്‍; മെഴുവേലിയിലെ കരിഓയില്‍ ആര്‍ക്ക് ഗുണകരമാകും?
മെഴുവേലിയിലെ കരിഓയില്‍ ആര്‍ക്ക് ഗുണകരമാകും?
പത്തനംതിട്ട: മെഴുവേലി പഞ്ചായത്ത് 10-ാം വാര്‍ഡിലെ യു.ഡി.എഫ് സ്ഥാനാര്‍ഥിയുടെ ദേഹത്ത് കരി ഓയില്‍ ഒഴിച്ച സംഭവത്തില്‍ വിശദമായ അന്വേഷണം ആവശ്യപ്പെട്ട് സി.പി.എം ലോക്കല്‍ സെക്രട്ടറി പോലീസില്‍ പരാതി നല്‍കി. ഇലവുംതിട്ട ലോക്കല്‍ സെക്രട്ടറി അനു ഫിലിപ്പാണ് പരാതി നല്‍കിയിരിക്കുന്നത്. സ്ഥാനാര്‍ഥിയുടെ ദേഹത്ത് കരി ഓയില്‍ ഒഴിച്ച സംഭവം ആസൂത്രിതമെന്നാണ് നിഗമനം. സംഭവം നടന്ന പരിസരത്തൊന്നും സി.സി.ടി.വി ഇല്ല. തൊട്ടടുത്തുള്ള വീടുകളില്‍ വാടകക്കാര്‍ ആണ് താമസിക്കുന്നത്.
ഇവര്‍ പകല്‍ സമയം വീട്ടില്‍ കാണുകയില്ല. പത്താം വാര്‍ഡിലെ കോണ്‍ഗ്രസ് സ്ഥാനാര്‍ഥി ബിജോ വര്‍ഗീസിനെയാണ് കരി ഓയില്‍ ഒഴിച്ചതായി പരാതിയുള്ളത്. ഇദ്ദേഹത്തിന്റെ വീട്ടില്‍ നിന്ന് അധികം അകലെയല്ലാതെ പകല്‍ അടഞ്ഞു കിടക്കുന്ന രണ്ട് വീടുകള്‍ക്ക് മുന്നില്‍ വച്ചാണ് സംഭവം. ഈ സ്ഥലം തന്നെ കരിഓയില്‍ ഒഴിക്കാന്‍ തെരഞ്ഞെടുത്തതാണ് ആസൂത്രണമാണെന്ന് സംശയിക്കാന്‍ കാരണം. ബിജോ വര്‍ഗീസിന്റെ മൊഴിയുടെ അടിസ്ഥാനത്തില്‍ രാമന്‍ചിറ-ഇലവുംതിട്ട റോഡിലെ രണ്ട്. പെട്രോള്‍ പമ്പുകളിലേത് ഉള്‍പ്പെടെയുള്ള സി.സി.ടി.വി ദൃശ്യങ്ങള്‍ പരിശോധിച്ചു വരുന്നു.
പ്രതികളെക്കുറിച്ച് സൂചന ലഭിച്ചിട്ടില്ലെന്ന് ഇലവുംതിട്ട എസ്.എച്ച്.ഒ ടി. കെ. വിനോദ് കൃഷ്ണന്‍ പറഞ്ഞു. ഇതിനിടയില്‍ കരി ഓയില്‍ വീണ ഷര്‍ട്ട് ധരിച്ചുകൊണ്ട് സ്ഥാനാര്‍ഥിയും യു. ഡി. എഫ് പ്രവര്‍ത്തകരും വീട് കയറിയിറങ്ങി വോട്ട് അഭ്യര്‍ഥന ആരംഭിച്ചു. ആന്റോ ആന്റണി സ്ഥാനാര്‍ഥിയുടെ വീട് സന്ദര്‍ശിച്ചു. കുറ്റക്കാരെ പിടികൂടുന്നതുവരെ പ്രതിഷേധം തുടരാനാണ് യു. ഡി. എഫ് തീരുമാനം. സംഭവത്തില്‍ സമഗ്ര അന്വേഷണം നടത്തി കുറ്റക്കാരെ പിടികൂടണമെന്നാണ് സി. പി. എമ്മിന്റെ ആവശ്യം.
മെഴുവേലി ഗ്രാമപഞ്ചായത്ത് യുഡിഎഫ് സ്ഥാനാര്‍ഥി ബിജോ വര്‍ഗീസിനു നേരേ സിപിഎം നടത്തിയ കരി ഓയില്‍ ആക്രമണം കിരാതവും അങ്ങേയറ്റം ജനാധിപത്യ വിരുദ്ധവും ആണെന്ന് ഡിസിസി പ്രൊഫ. പ്രസിഡന്റ് സതീഷ് കൊച്ചുപറമ്പില്‍ പറഞ്ഞു. തദ്ദേശ സ്വയംഭരണ സ്ഥാപന തെരഞ്ഞെടുപ്പില്‍ ജില്ലയില്‍ ഒട്ടാകെ ബഹുഭൂരിപക്ഷം സീറ്റുകളിലും യുഡിഎഫ് സ്ഥാനാര്‍ഥികള്‍ വിജയിക്കുമെന്ന് ഉറപ്പായപ്പോള്‍ പല സ്ഥങ്ങളിലും സ്ഥാനാര്‍ഥികള്‍ക്കെതിരെ വ്യാപകമായ ആക്രമണങ്ങള്‍, തെരഞ്ഞെടുപ്പ് പ്രചരണ സാമഗ്രികളുടെ നശീകരണം, സൈബര്‍ ആക്രമണം എന്നിവ വ്യാപകമായിരിക്കുകയാണെന്ന് ഡിസിസി പ്രസിഡന്റ് പറഞ്ഞു.
യുഡിഎഫ് സ്ഥാനാര്‍ഥിയെ ആക്രമിച്ചവര്‍ക്കെതിരെ തെരഞ്ഞെടുപ്പ് കമ്മീഷനും പൊലീസും നടപടി സ്വീകരിക്കണമെന്ന് പ്രൊഫ. സതീഷ് കൊച്ചുപറമ്പില്‍ ആവശ്യപ്പെട്ടു. സിപിഎം ആക്രമണ പരിപാടികളും നശീകരണ പ്രവര്‍ത്തനങ്ങളും അവസാനിപ്പിച്ചില്ലെങ്കില്‍ ശക്തമായ ഭവിഷ്യത്തുകള്‍ നേരിടേണ്ടിവരുമെന്ന് അദ്ദേഹം മുന്നറിയിപ്പ് നല്‍കി.