ഈ പുണ്യനാളിൽ തൊഴിലാളികൾക്ക് ആശ്വാസം; നീണ്ട അവധിക്കാലം ആഘോഷിക്കാനൊരുങ്ങി പ്രവാസികൾ; ചെറിയ പെരുന്നാൾ അവധി പ്രഖ്യാപിച്ച് സൗദി

റിയാദ്: ചെറിയ പെരുന്നാൾ പ്രമാണിച്ചുള്ള പൊതു അവധി ദിനങ്ങൾ സൗദി അറേബ്യയും യുഎഇയും പ്രഖ്യാപിച്ചു. സൗദിയിൽ സർക്കാർ, സ്വകാര്യ മേഖലകളിലെ ജീവനക്കാർക്ക് ഒരുപോലെ നാല് ദിവസത്തെ അവധിയാണ് ലഭിക്കുക. എന്നാൽ, യുഎഇയിൽ ഫെഡറൽ, സ്വകാര്യ മേഖലകളിലെ ജീവനക്കാർക്ക് വ്യത്യസ്തമായ അവധി ക്രമീകരണങ്ങളാണ് ഏർപ്പെടുത്തിയിരിക്കുന്നത്. ഈദ് തീയതി ചന്ദ്രപ്പിറവി നിരീക്ഷണത്തിന് വിധേയമായിരിക്കും എന്ന മുന്നറിയിപ്പും അധികൃതർ നൽകിയിട്ടുണ്ട്.

സൗദി അറേബ്യയിൽ മാർച്ച് 4 ബുധനാഴ്ചയാണ് അവധി സംബന്ധിച്ച ഔദ്യോഗിക പ്രഖ്യാപനമുണ്ടായത്. രാജ്യത്ത് മാർച്ച് 18 ബുധനാഴ്ച മുതൽ നാല് ദിവസത്തെ പൊതു അവധി ആരംഭിക്കും. ഇത് സർക്കാർ, സ്വകാര്യ മേഖലകളിലെ എല്ലാ ജീവനക്കാർക്കും ബാധകമാണ്. അവധിക്ക് ശേഷം മാർച്ച് 22 ഞായറാഴ്ച മുതൽ സാധാരണ നിലയിൽ പ്രവൃത്തിദിവസം പുനരാരംഭിക്കും. റമദാൻ മാസപ്പിറവി കാണുന്നതിനനുസരിച്ച് പെരുന്നാൾ തീയതിയിൽ മാറ്റം വരാമെന്നും അധികൃതർ അറിയിച്ചു.

യുഎഇയിൽ ഫെഡറൽ സർക്കാർ ജീവനക്കാർക്ക് മാർച്ച് 19 വ്യാഴാഴ്ച മുതൽ മാർച്ച് 22 ഞായറാഴ്ച വരെയാണ് ചെറിയ പെരുന്നാൾ അവധി പ്രഖ്യാപിച്ചിരിക്കുന്നത്. നാല് ദിവസത്തെ ഈ അവധിക്ക് ശേഷം മാർച്ച് 23 തിങ്കളാഴ്ച ഇവർക്ക് ഔദ്യോഗിക പ്രവൃത്തി ദിവസം പുനരാരംഭിക്കും.

സ്വകാര്യ മേഖലയിലെ ജീവനക്കാർക്ക് പ്രാഥമികമായി മാർച്ച് 19 വ്യാഴാഴ്ച മുതൽ മാർച്ച് 21 ശനിയാഴ്ച വരെയാണ് അവധി പ്രഖ്യാപിച്ചിട്ടുള്ളത്. ഞായറാഴ്ചകളിൽ സാധാരണയായി ജോലി ചെയ്യുന്നവർ മാർച്ച് 22 ഞായറാഴ്ച തിരികെ പ്രവേശിക്കണം. റമദാൻ മാസം 30 ദിവസമുണ്ടെങ്കിൽ, സ്വകാര്യ മേഖലയിലെ അവധി മാർച്ച് 22 ഞായറാഴ്ചയും ഉൾപ്പെടുത്തി നീട്ടി നൽകാൻ സാധ്യതയുണ്ടെന്ന് അധികൃതർ വ്യക്തമാക്കി.

ഇരു രാജ്യങ്ങളിലെയും ഔദ്യോഗിക അവധി ദിനങ്ങൾ ചന്ദ്രപ്പിറവി നിരീക്ഷണത്തിന് ശേഷം അന്തിമമായി സ്ഥിരീകരിക്കുമെന്നിരിക്കെ, ഈ പ്രഖ്യാപനങ്ങൾ ലക്ഷക്കണക്കിന് പ്രവാസികൾ ഉൾപ്പെടെയുള്ള ജനങ്ങൾക്ക് വലിയ ആശ്വാസമാണ് നൽകുന്നത്.