ആപ്പിളിന്റെ ചങ്കിടിപ്പേറ്റാന് സാംസങ്ങിന്റെ വമ്പന് പടപ്പുറപ്പാട്! അത്ഭുതങ്ങള് ഒളിപ്പിച്ച് ഗാലക്സി എസ് 26 അള്ട്രാ വരുന്നു; വരുന്നത് അടിമുടി മാറ്റങ്ങളോടെ; ഫെബ്രുവരി 25-ലേക്ക് കണ്ണുനട്ട് ടെക് ലോകം; അറിയാം ഗാലക്സി എസ് 26 അള്ട്രായുടെ വിശേഷങ്ങള്
ആപ്പിളിന്റെ ചങ്കിടിപ്പേറ്റാന് സാംസങ്ങിന്റെ വമ്പന് പടപ്പുറപ്പാട്!
സാംസങ് ഗാലക്സി എസ് 26 അള്ട്രാ പുറത്തിറങ്ങുകയാണ്. സാംസങ്ങിന്റെ ആദ്യകാല ഫ്ളാഗ്ഷിപ്പ് റിലീസ് പാറ്റേണിനെ പിന്തുടര്ന്ന്, പുതുക്കിയ ഡിസൈന്, നവീകരിച്ച ഹാര്ഡ്വെയര്, ശക്തമായ ഗാലക്സി എഐ സംയോജനം എന്നിവ ഇതില് ഉണ്ടാകുമെന്നാണ് സൂചന. ഗാലക്സി എസ് 26, എസ് 26+ എന്നിവയ്ക്കൊപ്പം ഗാലക്സി എസ് 26 അള്ട്രയും പുറത്തിറങ്ങും. ഇത് സാംസങ്ങിന്റെ പ്രീമിയം ഉപകരണങ്ങളുടെ ത്രയം പൂര്ത്തിയാക്കുകയും എ.ഐ പവര് ഫീച്ചറുകളിലേക്കും സാംസങ്ങിന്റെ ഓണ്ലൈന് സേവനങ്ങളിലേക്കും ഉള്ള ശക്തമായ കാല്വെയ്പായും കണക്കാക്കപ്പെടുന്നു.
പുതിയ മോഡല് പുറത്തിറങ്ങുന്ന തീയതി സാംസങ് ഔദ്യോഗികമായി സ്ഥിരീകരിച്ചിട്ടില്ലെങ്കിലും ഈ മാസം 25-ന് ഗാലക്സി അണ്പാക്ക്ഡ് ഇവന്റ് നടക്കാനാണ് സാധ്യത എന്നാണ്. മിക്കവാറും സാന് ഫ്രാന്സിസ്കോയില് ആയിരിക്കും ചടങ്ങ് നടക്കുക എന്നാണ് സൂചന. ആഗോള ലൈവ് സ്ട്രീമിംഗ് രാവിലെ 10 മണിയോടെ ആരംഭിക്കുമെന്നാണ് പ്രതീക്ഷിക്കുന്നത്. മൂന്ന് പുതിയ സ്മാര്ട്ട്ഫോണുകളും ഇനി പുറത്തിറങ്ങാന് പോകുന്ന ഗാലക്സി ബഡ്സ് 4 ഉം ഇവന്റില് വെളിപ്പെടുത്തും എന്നാണ് റിപ്പോര്ട്ട്.
പ്രമുഖ മാധ്യമമായ ദി സണ്ഡേ ഗാര്ഡിയന് റിപ്പോര്ട്ട് ചെയ്യുന്നതനുസരിച്ച്, മുഖ്യപ്രഭാഷണത്തിന് തൊട്ടടുത്ത ദിവസം,സാംസങ് ഗാലക്സി എസ് 26 അള്ട്രയ്ക്കുള്ള പ്രീ-ഓര്ഡറുകള് ആരംഭിക്കും. ഓരോ പ്രദേശത്തിനനുസരിച്ച് സമയം വ്യത്യാസപ്പെടാം. ദക്ഷിണ കൊറിയയില് നിന്നുള്ള റിപ്പോര്ട്ടുകള് പ്രകാരം ഒരു പ്രീ-ഓര്ഡര് വിന്ഡോയും തുടര്ന്ന് ഒരു പ്രീ-സെയില് ഘട്ടവും ആയിരിക്കും ഉണ്ടാകുക. റീട്ടെയില് വില്പ്പന ആരംഭിച്ചുകഴിഞ്ഞാല് റിസര്വേഷനുകള് പിന്നീട് വാങ്ങുന്നതിനായി അപ്ഗ്രേഡ് ചെയ്യാന് കഴിയും.
വര്ദ്ധിപ്പിച്ച ട്രേഡ്-ഇന് മൂല്യങ്ങള്, എ.ഐ ക്ലൗഡ് സേവനങ്ങള് എന്നിവയിലേക്കുള്ള സൗജന്യ അല്ലെങ്കില് കിഴിവുള്ള സബ്സ്ക്രിപ്ഷനുകള്, തിരഞ്ഞെടുത്ത വേരിയന്റുകളില് സാധ്യമായ സ്റ്റോറേജ് അപ്ഗ്രേഡുകള് എന്നിവ പ്രീ-ഓര്ഡര് ആനുകൂല്യങ്ങളില് ഉള്പ്പെടാം. മാര്ച്ച് 11 മുതലാണ് റീട്ടെയില് വില്പ്പന പ്രതീക്ഷിക്കുന്നത്. ശക്തമായ ഡിമാന്ഡ് കാരണം ഗാലക്സി എസ് 26 അള്ട്രയ്ക്ക് മുന്ഗണന നല്കുന്നുവെന്നാണ് സൂചന.
സാംസങ് എ.ഐയ്ക്കായി ഒപ്റ്റിമൈസ് ചെയ്ത ഗാലക്സി എസ് 26 അള്ട്രാ കഴിഞ്ഞ വര്ഷത്തെ അതേ വിലയായ 1299 ഡോളറിനാണ് വില്ക്കാന് പോകുന്നത്. നേരത്തേ ഈ മോഡല് ജനുവരിയില് പുറത്തിറങ്ങുമെന്നാണ് കരുതിയിരുന്നത് എങ്കിലും ഡിസൈന് ക്രമീകരണങ്ങള് മൂലമാണ് കാലതാമസം ഉണ്ടായതെന്നാണ് പറയപ്പെടുന്നത്.