രക്ഷാബന്ധന്‍ ദിനത്തില്‍ മുഹമ്മദ് സിറാജിന്റെ കയ്യില്‍ രാഖി ചാര്‍ത്തി; ഇന്ത്യന്‍ ക്രിക്കറ്റ് താരവുമായി പ്രണയത്തിലാണെന്ന അഭ്യൂഹങ്ങള്‍ക്ക് വിരാമമിട്ട് ആശാ ഭോസ്ലെയുടെ കൊച്ചുമകള്‍; കമന്റ് സെക്ഷന്‍ നീക്കി
മുഹമ്മദ് സിറാജിനെ രാഖി അണിയിച്ച് ആശാ ഭോസ്ലെയുടെ കൊച്ചുമകള്‍
ഹൈദരാബാദ്: ഇന്ത്യന്‍ ക്രിക്കറ്റ് താരം മുഹമ്മദ് സിറാജുമായി പ്രണയത്തിലാണെന്ന അഭ്യൂഹങ്ങള്‍ക്ക് വിരാമമിട്ട് പ്രശസ്ത ഗായിക ആശാ ഭോസ്ലെയുടെ കൊച്ചുമകള്‍ സനായ് ഭോസ്ലെ. രക്ഷാബന്ധന്‍ ദിനത്തില്‍ മുഹമ്മദ് സിറാജിന്റെ കയ്യില്‍ രാഖി ചാര്‍ത്തിയാണ്, സനായ് ഭോസ്ലെ താരവുമായുള്ള ബന്ധം സഹോദരതുല്യമാണെന്ന് വ്യക്തമാക്കിയത്. മുഹമ്മദ് സിറാജിന്റെ കൈകളില്‍ രാഖി കെട്ടുന്ന ചിത്രം സനായ് ഭോസ്ലെ തന്നെയാണ് സമൂഹമാധ്യമങ്ങളില്‍ പങ്കുവച്ചത്. അതേസമയം, രാഖി കെട്ടുന്ന വിഡിയോയുടെ കമന്റ് സെക്ഷന്‍ സനായ് ഭോസ്ലെ നീക്കിയിട്ടുണ്ട്.
ആശ ഭോസ്ലെയുടെ മകന്‍ ആനന്ദ് ഭോസ്ലെയുടെയും അനുജയുടെയും മകളാണ് സനായ് ഭോസ്ലെ. ഡേറ്റിങ് അഭ്യൂഹങ്ങള്‍ ഉയര്‍ന്നപ്പോഴെല്ലാം തങ്ങള്‍ക്കിടയിലുള്ള ബന്ധം സഹോദരതുല്യമാണെന്ന് ആവര്‍ത്തിച്ചിരുന്ന ഇരുവരും, ഇതിനു പിന്നാലെയാണ് രക്ഷാബന്ധന്‍ ദിനത്തില്‍ രാഖി ചാര്‍ത്തി ഇക്കാര്യം സ്ഥിരീകരിച്ചത്.
നേരത്തെ, സനായ് ഭോസ്ലെ തന്റെ 23ാം ജന്‍മദിനാഘോഷത്തിന്റെ ചിത്രങ്ങള്‍ പങ്കുവച്ചതിനു പിന്നാലെയാണ് മുഹമ്മദ് സിറാജുമായി പ്രണയത്തിലാണെന്ന അഭ്യൂഹം പ്രചരിച്ചത്. ജന്മദിനാഘോഷ ചിത്രങ്ങളില്‍ മുഹമ്മദ് സിറാജും ഉള്‍പ്പെട്ടതോയെയായിരുന്നു ഇത്. മറ്റൊരു ഇന്ത്യന്‍ താരം ശ്രേയസ് അയ്യര്‍ ഉള്‍പ്പെടെയുള്ളവര്‍ക്കൊപ്പമുള്ള ഗ്രൂപ്പ് ഫോട്ടോ പങ്കുവച്ച സനായ്, മുഹമ്മദ് സിറാജ് മാത്രമുള്ള ചിത്രം പങ്കുവച്ചതോടെയാണ് ഗോസിപ്പുകള്‍ വ്യാപകമായത്. പുഞ്ചിരിയോടെ പരസ്പരം മുഖത്തോടു മുഖം നോക്കിയിരിക്കുന്ന ചിത്രമാണ് സനായ് പങ്കുവച്ചത്.
ആശ ഭോസ്ലെ, ബോളിവുഡ് താരം ജാക്കി ഷ്‌റോഫ്, ക്രിക്കറ്റ് താരങ്ങളായ ശ്രേയസ് അയ്യര്‍, സിദ്ധേഷ് ലാഡ് തുടങ്ങിയവര്‍ക്കൊപ്പമുള്ള ചിത്രങ്ങളും സനായ് പങ്കുവച്ചെങ്കിലും, വാര്‍ത്തകളില്‍ നിറഞ്ഞത് മുഹമ്മദ് സിറാജിനൊപ്പമുള്ള ഫോട്ടോ. അഭ്യൂഹങ്ങള്‍ പ്രചരിക്കുമ്പോഴും ആദ്യം നിശബ്ദത പാലിച്ച ഇരുവരും, പിന്നീട് സഹോദര തുല്യരാണെന്ന് വ്യക്തമാക്കി രംഗത്തെത്തിയിരുന്നു.