ടി20 ലോകകപ്പ് അടുത്തിരിക്കെ ഓസ്ട്രേലിയൻ ടീമിന് തിരിച്ചടി; പരിക്കേറ്റ 2 പ്രധാന താരങ്ങള് പുറത്ത്; പാറ്റ് കമിൻസിന് പകരം ബെൻ ഡ്വാർഷൂയിസിനെ ടീമിൽ ഉൾപ്പെടുത്തി
മെൽബൺ: ടി20 ലോകകപ്പിന് ദിവസങ്ങൾ മാത്രം ശേഷിക്കെ ഓസ്ട്രേലിയൻ ടീമിന് തിരിച്ചടി. പരിക്കിനെത്തുടർന്ന് പേസർ പാറ്റ് കമ്മിൻസും മാത്യു ഷോർട്ടും ലോകകപ്പ് ടീമിൽ നിന്ന് പുറത്തായി. ഇവർക്ക് പകരമായി ബെൻ ഡ്വാർഷൂയിസിനെയും മാറ്റ് റെൻഷോയെയും ടീമിൽ ഉൾപ്പെടുത്തി. പുറംവേദനയെ തുടർന്നാണ് പാറ്റ് കമ്മിൻസിന് ലോകകപ്പ് നഷ്ടമാകുന്നത്.
ആഷസ് പരമ്പരയ്ക്കിടെ പരിക്കേറ്റ കമ്മിൻസ്, ഫെബ്രുവരി 7-ന് ഇന്ത്യയിലും ശ്രീലങ്കയിലുമായി ആരംഭിക്കുന്ന ലോകകപ്പിന് മുൻപ് പൂർണ്ണ കായികക്ഷമത വീണ്ടെടുക്കില്ലെന്ന് ഉറപ്പായതോടെയാണ് സെലക്ടർമാർ പകരക്കാരനെ കണ്ടെത്തിയത്. കമ്മിൻസിന്റെ അഭാവത്തിൽ ജോഷ് ഹേസൽവുഡ് ഓസീസ് പേസ് നിരയെ നയിക്കും. മാത്യു ഷോർട്ടിന് പകരം ടീമിലെത്തിയ മാറ്റ് റെൻഷോ, ആഭ്യന്തര ക്രിക്കറ്റിലും ഓസ്ട്രേലിയൻ ടീമിനായും നടത്തുന്ന മികച്ച പ്രകടനമാണ് ടീമിൽ ഇടം നേടിക്കൊടുത്തത്.
ശ്രീലങ്കയിലെ വേഗം കുറഞ്ഞ പിച്ചുകളിൽ റെൻഷോയുടെ സാന്നിധ്യം മധ്യനിരയ്ക്ക് കൂടുതൽ കരുത്ത് നൽകുമെന്ന് ഓസ്ട്രേലിയൻ സെലക്ടർ ടോണി ഡോഡിമെയ്ഡ് അഭിപ്രായപ്പെട്ടു. ഇടംകയ്യൻ പേസറായ ബെൻ ഡ്വാർഷൂയിസ് ലോവർ ഓർഡറിൽ മികച്ച ബാറ്റ്സ്മാൻ കൂടിയാണെന്നതും ടീമിന് ഗുണകരമാകുമെന്നും അദ്ദേഹം കൂട്ടിച്ചേർത്തു. ഫെബ്രുവരി 11-ന് അയർലൻഡിനെതിരെയാണ് ലോകകപ്പിൽ ഓസ്ട്രേലിയയുടെ ആദ്യ മത്സരം.
ടി20 ലോകകപ്പിനുള്ള ഓസ്ട്രേലിയയുടെ സ്ക്വാഡ്: മിച്ചൽ മാർഷ് (ക്യാപ്റ്റൻ), ട്രാവിസ് ഹെഡ്, ജോഷ് ഇംഗ്ലിസ്, ഗ്ലെൻ മാക്സ്വെൽ, മാർക്കസ് സ്റ്റോയിനിസ്, കാമറൂൺ ഗ്രീൻ, ടിം ഡേവിഡ്, മാറ്റ് റെൻഷോ, ജോഷ് ഹേസൽവുഡ്, ആദം സാംപ, നേഥൻ എല്ലിസ്, സേവ്യർ ബാർട്ട്ലെറ്റ്, മാത്യു കുഹ്നെമാൻ, കൂപ്പർ കൊണോളി, ബെൻ ഡ്വാർഷൂയിസ്.