അവസാന ഓവറിൽ വേണ്ടത് 14 റൺസ്; രക്ഷകനായി സെയ്ൻ ഗ്രീൻ; ആവേശപ്പോരിൽ ദക്ഷിണാഫ്രിക്കയെ അട്ടിമറിച്ച് നമീബിയ; റുബൻ ട്രംപൽമാന് മൂന്ന് വിക്കറ്റ്

വിൻ​ഹോക്ക്: അന്താരാഷ്ട്ര ടി20 ക്രിക്കറ്റിൽ ദക്ഷിണാഫ്രിക്കയെ അട്ടിമറിച്ച് നമീബിയ. ആവേശകരമായ മത്സരത്തിൽ 4 വിക്കറ്റുകൾക്ക് നമീബിയ വിജയം സ്വന്തമാക്കി. അവസാന പന്ത് വരെ നീണ്ട പോരാട്ടത്തിനൊടുവിലാണ് നമീബിയയുടെ ചരിത്ര വിജയം. ആദ്യം ബാറ്റ് ചെയ്ത ദക്ഷിണാഫ്രിക്കയെ 20 ഓവറിൽ 8 വിക്കറ്റിന് 134 റൺസിന് നമീബിയ പിടിച്ചുകെട്ടി. തുടർന്ന് ബാറ്റ് ചെയ്ത നമീബിയ, 6 വിക്കറ്റ് നഷ്ടത്തിൽ വിജയലക്ഷ്യം മറികടന്നു.

അവസാന ഓവറിൽ 11 റൺസായിരുന്നു നമീബിയയ്ക്ക് വേണ്ടിയിരുന്നത്. ക്രീസിലുണ്ടായിരുന്ന സെയ്ൻ ഗ്രീൻ (23 പന്തിൽ പുറത്താകാതെ 30 റൺസ്), റുബൻ ട്രംപൽമാൻ (8 പന്തിൽ പുറത്താകാതെ 11 റൺസ്) എന്നിവരുടെ മികവിലാണ് നമീബിയ അട്ടിമറി വിജയം നേടിയത്. റുബൻ ട്രംപൽമാൻ ബൗളിംഗിലും തിളങ്ങി, 3 വിക്കറ്റുകൾ വീഴ്ത്തി. ഏഴാം സ്ഥാനത്ത് ഇറങ്ങിയ സെയ്ൻ ഗ്രീൻ, അവസാന ഓവറിലെ ആദ്യ പന്തിൽ സിക്സർ നേടി വിജയപ്രതീക്ഷ ഉയർത്തി.

പിന്നീട് അവസാന പന്തിൽ ഫോർ അടിച്ച് ഗ്രീൻ നമീബിയയുടെ വിജയം ഉറപ്പാക്കി. മത്സരത്തിൽ ഗ്രീനും ട്രംപൽമാനും ചേർന്ന് നേടിയ കൂട്ടുകെട്ടാണ് വിജയത്തിന് നിർണായകമായത്. നേരത്തെ, ടോസ് നേടി ബാറ്റിംഗിന് ഇറങ്ങിയ ദക്ഷിണാഫ്രിക്കയ്ക്ക് നിശ്ചിത ഓവറിൽ 134 റൺസെടുക്കാനേ കഴിഞ്ഞുള്ളൂ. പാക്കിസ്ഥാനെതിരായ ടെസ്റ്റ് പരമ്പര കാരണം പല പ്രമുഖ താരങ്ങളും ടീമിലില്ലായിരുന്നു.

ഡോണോവൻ ഫെരെയ്രയാണ് ദക്ഷിണാഫ്രിക്കയെ നയിച്ചത്. അരങ്ങേറ്റ മത്സരം കളിച്ച ജേസൻ സ്മിത്താണ് അവരുടെ ടോപ് സ്കോറർ (31 റൺസ്). 68 റൺസെടുക്കുന്നതിനിടെ 5 വിക്കറ്റുകൾ നഷ്ടപ്പെട്ട ദക്ഷിണാഫ്രിക്കയെ സ്മിത്താണ് നൂറ് കടത്തിയത്. വിരമിക്കൽ തീരുമാനം പിൻവലിച്ച് തിരിച്ചെത്തിയ വിക്കറ്റ് കീപ്പർ ബാറ്റർ ക്വിന്റൻ ഡി കോക്കിന് കാര്യമായ സംഭാവന നൽകാനായില്ല, ഒരു റൺസെടുത്ത് താരം പുറത്തായി.