രണ്ടു കോടിയില് നിന്നും 25.20 കോടിയിലേക്ക് കുതിച്ച് കാമറൂണ് ഗ്രീന്; ചെന്നൈയെ മറികടന്ന് ഓസിസ് ഓള്റൗണ്ടറെ ടീമിലെത്തിച്ച് കൊല്ക്കത്ത നൈറ്റ് റൈഡേഴ്സ്; ഏഴ് കോടിക്ക് വെങ്കിടേഷ് അയ്യര് ആര്സിബിയില്; രണ്ട് കോടിക്ക് ഡേവിഡ് മില്ലര് ഡല്ഹിയില്; ഡി കോക്കിനെ സ്വന്തമാക്കി മുംബൈ; ജാമി സ്മിത്തും ബെയര്സ്റ്റോയുമടക്കം അള്സോള്ഡ്; മിനി താരലേലം തുടരുന്നു
അബുദാബി: ആവേശകരമായ താര ലേലത്തിനൊടുവില് ഓസ്ട്രേലിയന് ഓള്റൗണ്ടര് കാമറൂണ് ഗ്രീനിനെ കൊല്ക്കത്ത നൈറ്റ് റൈഡേഴ്സ് സ്വന്തമാക്കി. രണ്ട് കോടി അടിസ്ഥാന വിലയുണ്ടായിരുന്ന താരത്തെ 25.20 കോടിക്കാണ് കൊല്ക്കത്ത ടീമിലെത്തിച്ചത്. രാജസ്ഥാന് റോയല്സും ചെന്നൈ സൂപ്പര് കിംഗ്സും താരത്തിനായി ലേലത്തില് ആവേശത്തോടെ വിളിച്ചെങ്കിലും കൂടുതല് സാമ്പത്തിക ശേഷിയുള്ള കൊല്ക്കത്തയ്ക്ക് മുന്നില് മുട്ടുമടക്കി. 13.60 കോടിയിലാണ് രാജസ്ഥാന് പിന്മാറിയത്. പിന്നീട് ചെന്നൈ സൂപ്പര് കിംഗ്സ് താല്പര്യം കാണിച്ചു. എന്നാല് തുക ഉയര്ന്നപ്പോള് ചെന്നൈയും പിന്മാറി. അടുത്ത കാലത്ത് മികച്ച ഫോമിലുള്ള ഓസിസ് താരത്തിനെ മധ്യനിരയില് ബാറ്ററായും ഓപ്പണിഗ് സ്പെല് ബൗളറായും വേണ്ടിവന്നാല് ഉപയോഗിക്കാനാകും എന്നത് കൊല്ക്കത്തയുടെ കരുത്ത് വര്ധിപ്പിക്കും.
കഴിഞ്ഞ സീസണില് റോയല് ചലഞ്ചേഴ്സ് ബാംഗ്ലൂരിന് വേണ്ടിയായിരുന്നു ഗ്രീന് കളിച്ചത്. അതേ സമയം കൊല്ക്കത്ത ഒഴിവാക്കിയ ഇന്ത്യന് ഓള്റൗണ്ടര് വെങ്കിടേഷ് അയ്യരെ ഏഴ് കോടി രൂപയ്ക്ക് ആര്സിബി വിളിച്ചെടുത്തു. ദക്ഷിണാഫ്രിക്കന് വെറ്ററന് താരം ഡേവിഡ് മില്ലര് ഡല്ഹി ക്യാപിറ്റല്സിലെത്തി. അടിസ്ഥാന തുകയായ രണ്ട് കോടിക്കാണ് മില്ലറെ ടീമിലെത്തിച്ചത്. വിക്കറ്റ് കീപ്പര് ബാറ്ററായ ദക്ഷിണാഫ്രിക്കന് താരം ക്വിന്റന് ഡി കോക്കിനെ മുംബൈ ഒരു കോടി രൂപയ്ക്ക് ടീമിലെത്തിച്ചു. ശ്രീലങ്കന് സ്പിന്നര് വനിന്ദു ഹസരങ്ക രണ്ട് കോടി രൂപയ്ക്ക് ലക്നൗ സൂപ്പര് ജയന്റ്സ് സ്വന്തമാക്കി. ഫിന് അലനെ രണ്ട് കോടി രൂപയ്ക്ക് കൊല്ക്കത്ത ടീമിലെത്തിച്ചു.
അതേസമയം സര്ഫറാസ് ഖാന്, പൃഥ്വി ഷാ എന്നീ ഇന്ത്യന് താരങ്ങളില് ആരും താല്പര്യം പ്രകടിപ്പിച്ചില്ല. സയ്യിദ് മുഷ്താഖ് അലി ടി20യില് മുംബൈക്ക് വേണ്ടി തകര്പ്പന് ഫോമിലാണ് സര്ഫറാസ്. മഹാരാഷ്ട്രയ്ക്ക് വേണ്ടി കളിച്ച പൃഥ്വിയും മികച്ച പ്രകടനം പുറത്തെടുത്തിരുന്നു. എന്നിരുന്നാലം ഒരു ടീമും താരത്തില് താല്പര്യം കാണിച്ചില്ല. എന്നാല് ന്യൂസിലന്ഡ് താരം ഡെവോണ് കോണ്വെ, ഓസ്ട്രേലിയന് താരം ജേക്ക് ഫ്രേസര് മക്ഗുര്ക് എന്നിവര്ക്കും ആവശ്യക്കാരുണ്ടായില്ല.
പ്രതീക്ഷയോടെ കേരള താരങ്ങള്
ഐപിഎല് താരലേലത്തില് പ്രതീക്ഷയോടെ പതിനൊന്ന് കേരള താരങ്ങള്. കെ എം ആസിഫ്, രോഹന് കുന്നുമ്മല്, സല്മാന് നിസാര്, അഹമ്മദ് ഇമ്രാന്, ഏദന് ആപ്പിള് ടോം, വിഘ്നേഷ് പുത്തൂര്, ശ്രീഹരി നായര്, അബ്ദുല് ബാസിത്, അഖില് സ്കറിയ, മുഹമ്മദ് ഷറഫുദ്ദീന്, ജിക്കു ബ്രൈറ്റ് എന്നിവരാണ് ലേലപ്പട്ടികയിലുളള താരങ്ങള്.
കെ എം ആസിഫാണ് ഉയര്ന്ന അടിസ്ഥാന വിലയുള്ള മലയാളിതാരം. 40 ലക്ഷം രൂപയാണ് ആസിഫിന്റെ അടിസ്ഥാന വില. കേരളത്തിന്റെ സീനിയര് ടീമില് കളിച്ചിട്ടില്ലാത്ത ജിക്കു കഴിഞ്ഞ സീസണില് മുംബൈ ഇന്ത്യന്സിന്റെ നെറ്റ്സ് ബൗളറായിരുന്നു. വിഘ്നേഷ് പുത്തൂര് കഴിഞ്ഞ സീസണില് മുംബൈ ഇന്ത്യന്സ് താരമായിരുന്നു.