'ആ അവഗണന ഗില്ലിന്റെ ഉള്ളിലെ തീ ആളിക്കത്തിക്കും; കൂടുതല് അപകടകാരിയാക്കും; ഈ ഐപിഎല് സീസണ് ഗില്ലിന് വളരെ നിര്ണായകം'; ഇന്ത്യന് നായകനെക്കുറിച്ച് വിലയിരുത്തലുമായി ചേതേശ്വര് പുജാര
മുംബൈ: ഇന്ത്യന് പ്രീമിയര് ലീഗിന്റെ വരാനിരിക്കുന്ന സീസണില് ഇന്ത്യന് ടെസ്റ്റ് - ഏകദിന ടീമുകളുടെ നായകന് ശുഭ്മന് ഗില് മികച്ച പ്രകടനം കാഴ്ചവെക്കുമെന്ന് മുന് ഇന്ത്യന് താരം ചേതേശ്വര് പുജാര. ഐപിഎല്ലില് മികച്ച പ്രകടനം പുറത്തെടുത്താല് ഇന്ത്യയുടെ ട്വന്റി 20 ടീമില് വീണ്ടും ഇടം കണ്ടെത്താന് ഗില്ലിന് സാധിക്കുമെന്നും പുജാര കൂട്ടിച്ചേര്ത്തു. 2026 ട്വന്റി 20 ലോകകപ്പിനുള്ള ഇന്ത്യന് സ്ക്വാഡില് നിന്ന് പുറത്താക്കിയത് താരത്തെ കൂടുതല് അപകടകാരിയാക്കുമെന്നാണ് പുജാര പറയുന്നത്.
'ട്വന്റി 20 ലോകകപ്പ് ടീമില് ഇടം ലഭിക്കാത്തത് തീര്ച്ചയായും ഗില്ലിന്റെ ഉള്ളിലെ തീ ആളിക്കത്തിക്കും. മൂന്ന് ഫോര്മാറ്റുകളിലും തിളങ്ങാന് കഴിവും നിരവാരവുമുള്ള താരമാണ് അദ്ദേഹം. ഈ ഐപിഎല് സീസണില് മികച്ച പ്രകടനം നടത്തിയാല് തീര്ച്ചയായും അദ്ദേഹത്തിന് ട്വന്റി 20 ടീമിലേക്ക് തിരിച്ചെത്താം. ടെസ്റ്റ് സ്ക്വാഡിന്റെയും ഏകദിന ടീമിന്റെയും ക്യാപ്റ്റനാണ് ഗില്. മള്ട്ടി ഫോര്മാറ്റ് താരമാണ് അദ്ദേഹം. ഈ ഐപിഎല് സീസണ് മികച്ചതാക്കാന് സാധിച്ചാല് ഇന്ത്യന് ടീമിലേക്ക് തിരിച്ചെത്താന് ഗില്ലിന് സാധിക്കും', ജിയോ ഹോട്ട്സ്റ്റാറിലെ 'ഗെയിം പ്ലാന്' എന്ന പരിപാടിയില് സംസാരിക്കവേ പുജാര പറഞ്ഞു.
'ട്വന്റി 20 സ്ക്വാഡില് നിലവില് ഭാഗമല്ലാത്തതിന്റെ സമ്മര്ദ്ദം ഗില്ലിനുണ്ടായിരിക്കും. അതേസമയം തന്റെ ബാറ്റിങ്ങില് തന്റെ മികവ് തെളിയിക്കാന് വളരെ വലിയ അവസരമാണ് ഐപിഎല്ലില് ഗില്ലിന് മുന്നിലുള്ളത്. അദ്ദേഹത്തിന്റെ ബാറ്റിങ്ങിലെ വേഗത ഒന്നുകൂടി വര്ധിപ്പിക്കേണ്ടിവരും. 150 മുതല് 160 വരെ സ്ട്രൈക്ക് റേറ്റില് ബാറ്റ് ചെയ്യാന് കഴിയുമെന്ന് തെളിയിക്കാന് ഈ സീസണ് ഗില്ലിന് വളരെ നിര്ണായകമാണ്', പുജാര കൂട്ടിച്ചേര്ത്തു.