കാര് യാത്രയ്ക്കിടെ പുകവലിച്ച് സിഗരറ്റ് റോഡിലേക്ക് വലിച്ചെറിഞ്ഞു; യുസ്വേന്ദ്ര ചാഹലിനോട് സാമ്യമുള്ള ഒരാളെന്ന് ദേശീയ മാധ്യമങ്ങള്; കാര് താരത്തിന്റേത് തന്നെയെന്ന് സോഷ്യല് മീഡിയ; ഐപിഎല് മത്സരത്തിനിടെ ചാഹല് വെട്ടില്
ന്യൂഡല്ഹി: ഇന്ത്യന് ക്രിക്കറ്റ് താരം യുസ്വേന്ദ്ര ചാഹല് വീണ്ടും വലിയ വിവാദത്തില്. പൊതുസ്ഥലത്ത് പുകവലിക്കുകയും സിഗരറ്റ് കുറ്റി അലക്ഷ്യമായി റോഡിലേക്ക് വലിച്ചെറിയുകയും ചെയ്തു എന്നാരോപിക്കുന്ന ഒരു വീഡിയോ സോഷ്യല് മീഡിയയില് പ്രചരിച്ചതോടെയാണ് താരത്തിനെതിരെ വിമര്ശനം കടുത്തിരിക്കുന്നത്. ഐപിഎല് മത്സരങ്ങള്ക്കിടെ ഞായറാഴ്ച പുറത്തുവന്ന ഈ ദൃശ്യങ്ങള് കായിക ലോകത്തും ആരാധകര്ക്കിടയിലും വലിയ ചര്ച്ചകള്ക്കാണ് വഴിതെളിച്ചിരിക്കുന്നത്.
വയലറ്റ് നിറത്തിലുള്ള ബിഎംഡബ്ല്യു സെഡ്4 റോഡ്സ്റ്റര് കാറില് സഞ്ചരിക്കുന്നതിനിടെ താരം സിഗരറ്റ് വലിക്കുകയും പിന്നീട് അത് പുറത്തേക്ക് എറിയുകയും ചെയ്യുന്നതാണ് വീഡിയോയുടെ ഉള്ളടക്കം. ദൃശ്യങ്ങളില് ഉള്ളത് ചാഹലിനോട് സാമ്യമുള്ള വ്യക്തിയെന്നാണ് ചില ദേശീയ മാധ്യമങ്ങള് റിപ്പോര്ട്ട് ചെയ്തത്. എന്നാല് വീഡിയോയിലെ കാര് ചാഹലിന്റേതാണെന്ന് സോഷ്യല് മീഡിയ തെളിവുകള് സഹിതം വാദിക്കുന്നു. അടുത്തിടെ താരം സ്വന്തമാക്കിയ ഇതേ മോഡല് കാര് തന്നെയാണിതെന്ന് വാഹനപ്രേമികളും ചൂണ്ടിക്കാട്ടുന്നുണ്ട്. ഒരു സെലിബ്രിറ്റി എന്ന നിലയില് ഇത്തരം നിയമവിരുദ്ധവും പരിസ്ഥിതിക്ക് ദോഷകരവുമായ പ്രവൃത്തികള് ചെയ്യുന്നത് അംഗീകരിക്കാനാവില്ലെന്നാണ് ഭൂരിഭാഗം പേരുടെയും നിലപാട്.
ഈ വിവാദം ഇത്രത്തോളം ഗൗരവകരമാകാന് മറ്റൊരു പ്രധാന കാരണം കൂടിയുണ്ട്. ഐപിഎല് 2026 സീസണിന് മുന്നോടിയായി തന്റെ ഫിറ്റ്നസ് മെച്ചപ്പെടുത്തുന്നതിനും യുവതാരങ്ങള്ക്ക് മാതൃകയാകുന്നതിനുമായി കഴിഞ്ഞ ആറുമാസമായി താന് മദ്യപാനം പൂര്ണ്ണമായും ഉപേക്ഷിച്ചുവെന്ന് ചാഹല് അടുത്തിടെ വെളിപ്പെടുത്തിയിരുന്നു. മുന് ദക്ഷിണാഫ്രിക്കന് താരം എബി ഡിവില്ലിയേഴ്സുമായുള്ള പോഡ്കാസ്റ്റിലായിരുന്നു ആരോഗ്യകരമായ ജീവിതശൈലിയിലേക്ക് മാറിയതിനെക്കുറിച്ച് ചാഹല് വാചാലനായത്. കരിയറിലും ജീവിതത്തിലും അച്ചടക്കം കൊണ്ടുവരാന് താന് ശ്രമിക്കുന്നുണ്ടെന്ന് പ്രഖ്യാപിച്ച് ദിവസങ്ങള്ക്കകം ഇത്തരമൊരു വീഡിയോ പുറത്തുവന്നത് താരത്തിന്റെ വിശ്വാസ്യതയെ തന്നെ ചോദ്യം ചെയ്യുന്ന ഒന്നായി മാറി.
സീനിയര് താരം എന്ന നിലയില് ഗ്രൗണ്ടിലും പുറത്തും മികച്ച പെരുമാറ്റം കാഴ്ചവെക്കേണ്ട ഒരാളില് നിന്ന് ഇത്തരമൊരു വീഴ്ച ഉണ്ടായതിനെതിരെ സോഷ്യല് മീഡിയയില് കടുത്ത പ്രതിഷേധമാണ് ഉയരുന്നത്. എന്നാല് ഈ വിവാദങ്ങളെക്കുറിച്ച് യുസ്വേന്ദ്ര ചാഹലോ അദ്ദേഹത്തിന്റെ പ്രതിനിധികളോ ഇതുവരെ ഔദ്യോഗിക പ്രതികരണം നടത്തിയിട്ടില്ല. വീഡിയോയുടെ ആധികാരികതയെക്കുറിച്ചും അത് ചാഹല് തന്നെയാണോ എന്നതിനെക്കുറിച്ചും കൂടുതല് വ്യക്തത വരേണ്ടതുണ്ട്. എങ്കിലും, കായിക താരങ്ങള് പൊതുയിടങ്ങളില് പുലര്ത്തേണ്ട ഉത്തരവാദിത്തത്തെക്കുറിച്ച് വീണ്ടും വലിയൊരു സംവാദത്തിന് ഈ സംഭവം തുടക്കമിട്ടിരിക്കുകയാണ്.