'ക്രീസിലെത്തിയാൽ ആദ്യം ഒരു സിംഗിൾ എടുക്കൂ, പിന്നീട് ആക്രമിച്ചു കളിക്കാം'; അങ്ങനെ ചെയ്യുന്നത് ആത്മവിശ്വാസം വർധിപ്പിക്കും; ഇന്ത്യൻ ഓപ്പണര്ക്ക് ഉപദേശവുമായി സുനിൽ ഗവാസ്കർ
അഹമ്മദാബാദ്: ടി20 ലോകകപ്പിൽ തുടർച്ചയായി രണ്ട് മത്സരങ്ങളിൽ പൂജ്യത്തിന് പുറത്തായ ഇന്ത്യൻ ഓപ്പണർ അഭിഷേക് ശർമ്മയ്ക്ക് വിലപ്പെട്ട ഉപദേശവുമായി മുൻ ഇന്ത്യൻ നായകൻ സുനിൽ ഗവാസ്കർ രംഗത്ത്. ആദ്യ പന്ത് മുതൽ ആക്രമിച്ചു കളിക്കുന്ന ശൈലിക്ക് പകരം, ക്രീസിലെത്തിയാൽ ഒരു സിംഗിൾ എടുത്ത് ആത്മവിശ്വാസം വീണ്ടെടുക്കാൻ ശ്രദ്ധിക്കണമെന്നാണ് ഗവാസ്കർ അഭിഷേകിനെ ഓർമ്മിപ്പിച്ചത്.
സ്പോർട്സ് ടുഡേയ്ക്ക് നൽകിയ അഭിമുഖത്തിലാണ് ഗവാസ്കർ തന്റെ നിർദ്ദേശം പങ്കുവെച്ചത്. "അഭിഷേക് ശർമ്മയ്ക്ക് നൽകാനുള്ള എന്റെ ഉപദേശം ഇതാണ്, ക്രീസിലെത്തിയാൽ ആദ്യം ഒരു സിംഗിൾ എടുക്കൂ. അത് കഴിഞ്ഞാൽ നിങ്ങൾക്ക് ആക്രമിച്ചു കളിക്കാം. കാലുകളുടെ വേഗം വർദ്ധിപ്പിക്കുന്ന ഒരു അതിവേഗ സിംഗിൾ നിങ്ങളുടെ ആത്മവിശ്വാസം വർദ്ധിപ്പിക്കും. അതിനുശേഷം സ്വന്തം ശൈലിയിലേക്ക് മാറുന്നതാകും ഉചിതം," ഗവാസ്കർ പറഞ്ഞു.
അമേരിക്കയ്ക്കും പാകിസ്ഥാനുമെതിരായ ലോകകപ്പ് മത്സരങ്ങളിലാണ് അഭിഷേക് റണ്ണൊന്നുമെടുക്കാതെ പുറത്തായത്. അമേരിക്കയ്ക്കെതിരെ ഗോൾഡൻ ഡക്കായ താരം, പാകിസ്ഥാനെതിരെ നാല് പന്തുകൾ നേരിട്ട ശേഷമാണ് പൂജ്യത്തിന് പുറത്തായത്. ലോകകപ്പിലെ ആദ്യ രണ്ട് മത്സരങ്ങളിലും പൂജ്യത്തിന് പുറത്താകുന്ന ആദ്യ ഇന്ത്യൻ ഓപ്പണർ എന്ന നാണക്കേടിന്റെ റെക്കോർഡും ഇതോടെ അഭിഷേക് ശർമ്മയുടെ പേരിലായി. ലോകകപ്പിന് മുന്നോടിയായി മികച്ച ഫോമിലായിരുന്ന അഭിഷേകിന്, വയറിലെ അണുബാധയെത്തുടർന്ന് നമീബിയക്കെതിരായ മത്സരം നഷ്ടമായിരുന്നു.
ന്യൂസിലൻഡിനെതിരെ സെഞ്ച്വറി നേടിയ അഭിഷേകിന്റെ കഴിവിൽ തനിക്ക് പൂർണ്ണ വിശ്വാസമുണ്ടെന്നും ഗവാസ്കർ കൂട്ടിച്ചേർത്തു. ഇന്ത്യ ഇതിനോടകം സൂപ്പർ 8 ഘട്ടത്തിലേക്ക് യോഗ്യത നേടിയ സാഹചര്യത്തിൽ, നാളെ നടക്കുന്ന നെതർലൻഡ്സിനെതിരായ മത്സരത്തിൽ സമ്മർദ്ദമില്ലാതെ കളിച്ച് ഫോം വീണ്ടെടുക്കാൻ അഭിഷേകിന് സാധിക്കുമെന്ന പ്രതീക്ഷയിലാണ് ആരാധകർ.