ഏകദിന പരമ്പരയുടെ പരാജയത്തിന് പകരം വീട്ടാൻ ഇന്ത്യ; ഓസ്‌ട്രേലിയയ്‌ക്കെതിരായ ആദ്യ ടി20 നാളെ കാന്‍ബറയില്‍; സാധ്യത ഇലവൻ അറിയാം
കാന്‍ബറ: ഇന്ത്യ-ഓസ്‌ട്രേലിയ ടി20 പരമ്പരക്ക് നാളെ തുടക്കം. അഞ്ച് മത്സരങ്ങളുടെ പരമ്പരയില്‍ ആദ്യ ടി20യ്ക്ക് കാന്‍ബറയാണ് വേദിയാകുന്നത്. ഇന്ത്യൻ സമയം ഉച്ചയ്ക്ക് 1.45നാണ് മത്സരം ആരംഭിക്കുന്നത്. അടുത്ത വർഷം നടക്കാനിരിക്കുന്ന ടി20 ലോകകപ്പിനുള്ള ടീമിനെ ഒരുക്കാൻ ലക്ഷ്യമിട്ടുള്ള നിർണായക പരമ്പരയാണിത്. ഏകദിന പരമ്പരയിൽ നേരിട്ട തോൽവിക്ക് പകരം വീട്ടാനാണ് ഇന്ത്യയുടെ ശ്രമം. ഇന്ത്യയിൽ മത്സരം സ്റ്റാർ സ്പോർട്സ് നെറ്റ്‌വർക്കിലും ജിയോ ഹോട്ട്സ്റ്റാറിലും തത്സമയം കാണാം.
നിലവിലെ ക്യാപ്റ്റനായ സൂര്യകുമാർ യാദവിന്റെ നേതൃത്വത്തിലുള്ള ടീം പരീക്ഷണങ്ങൾക്കും അവസരം നൽകും. യുവതാരങ്ങളായ സഞ്ജു സാംസൺ, തിലക് വർമ, അഭിഷേക് ശർമ തുടങ്ങിയവരുടെ പ്രകടനം നിർണായകമാകും. ഹാർദിക് പാണ്ഡ്യയുടെ അഭാവത്തിൽ ശിവം ദുബെക്ക് ഫിനിഷർ റോളിൽ നിർണായക ചുമതലകളുണ്ട്. ശിവം ദുബെക്ക് പുറമെ നിതീഷ് കുമാർ റെഡ്ഡിയെയും പേസ് ഓൾറൗണ്ടറായി പരിഗണിക്കുമെങ്കിലും പരിക്കിന്റെ ആശങ്ക നിലനിൽക്കുന്നുണ്ട്.
ബാറ്റിംഗ് നിരയിൽ ശുഭ്മാൻ ഗില്ലും അഭിഷേക് ശർമയുമായിരിക്കും ഓപ്പണർമാർ. സൂര്യകുമാർ യാദവ് മൂന്നാം നമ്പറിലും തിലക് വർമ നാലാം നമ്പറിലും കളിക്കും. സഞ്ജു സാംസൺ അഞ്ചാം നമ്പറിലും ശിവം ദുബെ ആറാം നമ്പറിലും കളിക്കും. ഹാർദ്ദിക്കിനെപ്പോലെ നിർണായക ഓവറുകൾ എറിയേണ്ട ഉത്തരവാദിത്തം ദുബെക്കുണ്ടാകും. ഏഴാം നമ്പറിൽ അക്ഷർ പട്ടേൽ കളിച്ചേക്കും.
ഇതോടെ സ്പിൻ നിരയിൽ വരുൺ ചക്രവർത്തിയോ കുൽദീപ് യാദവോ മാത്രമാകും കളിക്കുക. കാൻബറയിലെ പിച്ചിന് സ്പിന്നർമാർക്ക് കാര്യമായ പിന്തുണ ലഭിക്കില്ലെന്നാണ് വിലയിരുത്തൽ. പേസ് നിരയിൽ ജസ്പ്രീത് ബുംറയുടെ തിരിച്ചുവരവ് ടീമിന് വലിയ കരുത്തേകും. ഹർஷிത് റാണയും അർഷ്ദീപ് സിംഗുമായിരിക്കും മറ്റ് പേസർമാർ.
ഇന്ത്യയുടെ സാധ്യതാ ടീം: അഭിഷേക് ശർമ, ശുഭ്മാൻ ഗിൽ, സൂര്യകുമാർ യാദവ് (ക്യാപ്റ്റൻ), തിലക് വർമ, സഞ്ജു സാംസൺ (വിക്കറ്റ് കീപ്പർ), ശിവം ദുബെ, അക്ഷർ പട്ടേൽ, ഹർഷിത് റാണ, വരുൺ ചക്രവർത്തി, ജസ്പ്രീത് ബുംറ, അർഷ്ദീപ് സിംഗ്.