ബുംറയെ തളയ്ക്കണം, ഗ്യാലറിയെ നിശബ്ദമാക്കണം; ഇന്ത്യൻ ബാറ്റിങ് നിരയ്ക്ക് കുരുക്കിടാൻ 'മൂൺ ബോളും' ഓഫ് സ്പിന്നും; വാംഖഡെയിൽ തന്ത്രങ്ങൾ മെനഞ്ഞ് ഹാരി ബ്രൂക്കും സംഘവും; സെമിയിൽ ടീം ഇന്ത്യയെ കാത്തിരിക്കുന്നത് വലിയ പരീക്ഷണമോ?; അറിയാം ഇംഗ്ലണ്ടിന്റെ മാസ്റ്റർ പ്ലാൻ

മുംബൈ: ടി20 ലോകകപ്പിന്റെ സെമിഫൈനലിൽ ഹാട്രിക് പോരാട്ടത്തിനായി ഇന്ത്യയും ഇംഗ്ലണ്ടും വ്യാഴാഴ്ച മുംബൈയിലെ വാംഖഡെ സ്റ്റേഡിയത്തിൽ നേർക്കുനേർ വരും. ടൂർണമെന്റിൽ ഇതുവരെ സർവ്വാധിപത്യം പുലർത്തുന്ന പ്രകടനം പുറത്തെടുക്കാൻ ഹാരി ബ്രൂക്കിനും സംഘത്തിനും കഴിഞ്ഞിട്ടില്ലെങ്കിലും, സെമിഫൈനലിലേക്ക് ആദ്യം യോഗ്യത നേടിയത് ഇംഗ്ലണ്ടാണ്. സൂപ്പർ 8 ഘട്ടത്തിൽ തോൽവിയറിയാതെയാണ് നിലവിലെ ചാമ്പ്യന്മാർ അവസാന നാലിലെത്തിയത്.

ലോകകപ്പ് നിലനിർത്താൻ പൂർണ്ണതയുള്ള ഒരു പ്രകടനം തന്നെ വേണമെന്നില്ലെന്ന് ഇംഗ്ലീഷ് നായകൻ ഹാരി ബ്രൂക്ക് തുറന്നുപറയുന്നു. എന്നാൽ, ട്വന്‍റി20 റാങ്കിങ്ങിലെ ഒന്നും രണ്ടും സ്ഥാനക്കാർ തമ്മിലുള്ള ഈ പോരാട്ടത്തെ ഒരു 'ഷൂട്ടൗട്ട്' എന്നാണ് ഇന്ത്യൻ ബോളിങ് പരിശീലകൻ മോർണി മോർക്കൽ വിശേഷിപ്പിച്ചത്. 2022-ൽ അഡ്ലെയ്ഡിൽ ഇന്ത്യയെ തകർത്തുവിട്ട പ്രകടനം ആവർത്തിക്കാനും, 2024-ൽ വെസ്റ്റ് ഇൻഡീസിലേറ്റ പരാജയം ഒഴിവാക്കി നിലവിലെ ചാമ്പ്യന്മാരെ പുറത്താക്കാനും ഇംഗ്ലണ്ടിന് എന്ത് തന്ത്രങ്ങളാകും മെനയുന്നത്.

ഗ്യാലറിയെ നിശബ്ദമാക്കുക

കഴിഞ്ഞ വർഷം മുംബൈയിൽ അഭിഷേക് ശർമ തകർത്താടിയപ്പോൾ വാംഖഡെ സ്റ്റേഡിയം അക്ഷരാർത്ഥത്തിൽ പ്രകമ്പനം കൊള്ളുകയായിരുന്നു. വെറും 54 പന്തിൽ നിന്ന് 135 റൺസ് അടിച്ചുകൂട്ടിയ അഭിഷേകിന്റെ ഇന്നിങ്സ് ഇംഗ്ലണ്ടിന് സമ്മാനിച്ചത് 150 റൺസിന്റെ റെക്കോർഡ് തോൽവിയായിരുന്നു. അതുകൊണ്ടുതന്നെ ഇംഗ്ലണ്ടിന് മുന്നിലുള്ള ആദ്യ വെല്ലുവിളി ഗ്യാലറിയിലെ 32,000 കാണികളെ നിശബ്ദരാക്കുക എന്നതാണ്. "ആയിരം സ്പീക്കറുകൾ ഒരേസമയം ചുറ്റും വെച്ചാലല്ലാതെ ഇവിടുത്തെ അന്തരീക്ഷം മറ്റൊരിടത്തും കൃത്രിമമായി സൃഷ്ടിക്കാനാവില്ല"– വാംഖഡെയിലെ കാണികളുടെ ആവേശത്തെക്കുറിച്ച് ഹാരി ബ്രൂക്ക് പറഞ്ഞത് ഇങ്ങനെയായിരുന്നു.

ഐപിഎല്ലിലെ നീണ്ട അനുഭവസമ്പത്തുള്ള സാം കറന്റെ നിരീക്ഷണം ഇങ്ങനെയാണ്: "സ്റ്റേഡിയം നിശബ്ദമാണെങ്കിൽ അതിന്റെ അർത്ഥം നമ്മൾ നന്നായി കളിക്കുന്നു എന്നാണ്." ശരിയാണ്, കഴിഞ്ഞ ഞായറാഴ്ച കൊൽക്കത്തയിൽ നടന്ന ക്വാർട്ടർ ഫൈനലിന് സമാനമായ പോരാട്ടത്തിൽ അത് കണ്ടതാണ്. വെസ്റ്റ് ഇൻഡീസിനെതിരായ 196 റൺസ് ചെയ്സിനിടെ, ഇന്ത്യയുടെ വിക്കറ്റുകൾ വീഴുമ്പോഴെല്ലാം ഗ്യാലറി നിശബ്ദമായിരുന്നു. വാംഖഡെയിലും ആ തന്ത്രം ആവർത്തിക്കാനാകും ഇംഗ്ലീഷ് സംഘം ലക്ഷ്യമിടുന്നത്.

വിൽ ജാക്സ് എന്ന അപകടകാരി

ഈ ടൂർണമെന്റിലുടനീളം ഓഫ്-സ്പിന്നിന് മുന്നിൽ പതറുന്ന ഇന്ത്യയെയാണ് കാണാൻ കഴിഞ്ഞത്. ആദ്യ അഞ്ച് മത്സരങ്ങളിൽ ഓവറിൽ ശരാശരി 6.23 റൺസ് മാത്രമാണ് ഓഫ്-സ്പിന്നർമാർക്കെതിരെ ഇന്ത്യക്ക് നേടാനായത്. സിംബാബ്‌വെ താരം ബ്രയാൻ ബെന്നറ്റിനെതിരെ രണ്ട് ഓവറിൽ 16 റൺസ് നേടിയെങ്കിലും വെസ്റ്റ് ഇൻഡീസിന്റെ ഓൾറൗണ്ടർ റോസ്റ്റൺ ചേസിനെതിരെ കാര്യമായ പ്രകടനം നടത്താൻ ഇന്ത്യക്ക് കഴിഞ്ഞില്ല (രണ്ട് ഓവറിൽ വിക്കറ്റ് പോകാതെ 18 റൺസ്). ഈ സാഹചര്യത്തിൽ വിൽ ജാക്സിനെ ഒരു പരീക്ഷണമായി ഉപയോഗിക്കുന്നത് ഇംഗ്ലണ്ടിന് ഗുണം ചെയ്യും.

ഇന്ത്യൻ ബാറ്റിങ് നിരയിലെ ആദ്യ ആറുപേരിൽ മൂന്നുപേരും ഇടങ്കയ്യന്മാരാണ്—അഭിഷേക് ശർമ, ഇഷാൻ കിഷൻ, തിലക് വർമ. ആദ്യ എട്ടുപേരെ എടുത്താൽ അതിൽ അഞ്ചുപേരും ഇടങ്കയ്യന്മാരാകാനാണ് സാധ്യത. ഈ സാഹചര്യത്തിൽ വലംകയ്യൻ ഓഫ് സ്പിന്നർ വിൽ ജാക്സിനെ തുടക്കത്തിലേ പന്തേൽപ്പിക്കുന്നത് ഇംഗ്ലണ്ടിന് ഗുണം ചെയ്യും. കഴിഞ്ഞ മൂന്നാഴ്ചയ്ക്കുള്ളിൽ നാല് മാൻ ഓഫ് ദി മാച്ച് പുരസ്കാരങ്ങൾ വാരിക്കൂട്ടിയ ജാക്സ് തകർപ്പൻ ഫോമിലാണ്.

ഐപിഎല്ലിൽ മുംബൈ ഇന്ത്യൻസിന് വേണ്ടി കളിക്കുന്നതിനാൽ വാംഖഡെയിലെ പിച്ചിനെക്കുറിച്ച് ജാക്സിന് വ്യക്തമായ ധാരണയുണ്ട്. സ്റ്റേഡിയത്തിന്റെ ചെറിയ അതിരുകൾ കാരണം ബാറ്റിന്റെ എഡ്ജിൽ തട്ടുന്ന പന്തുകൾ പോലും സിക്സറിലേക്ക് പറക്കാനുള്ള സാധ്യതയും അദ്ദേഹത്തിനറിയാം. സൂപ്പർ എയിറ്റ് ഘട്ടത്തിൽ അഞ്ച് വിക്കറ്റുകൾ വീഴ്ത്തിയ ആത്മവിശ്വാസവുമായാണ് ജാക്സ് വാംഖഡെയിലേക്ക് തിരിച്ചെത്തുന്നത്.

ബുംറയെ കരുതിയിരിക്കുക; വിക്കറ്റ് നൽകാതെ പിടിച്ചുനിൽക്കാം

ഇന്ത്യൻ സൂപ്പർ താരം ജസ്പ്രീത് ബുംറ പന്തെറിയാൻ എത്തിയാൽ റൺസ് കണ്ടെത്തുക പ്രയാസമാണെന്ന് കണക്കുകൾ വ്യക്തമാക്കുന്നു. അതുകൊണ്ടുതന്നെ, ബുംറയ്ക്ക് വിക്കറ്റ് നൽകാതെ പിടിച്ചുനിൽക്കുക എന്നതാണ് ഇന്ത്യയെ തളയ്ക്കാനുള്ള പ്രധാന വഴി. ഓവറിൽ ആറ് റൺസിനപ്പുറം വിട്ടുകൊടുക്കാത്ത താരത്തിനെ അമിതമായി ആക്രമിക്കാൻ മുതിരാതെ മറ്റു ബൗളർമാരെ ലക്ഷ്യമിടുകയാകും ബുദ്ധിപരമായ നീക്കം. 6.54 എന്ന മിന്നും ഇക്കോണമി റേറ്റുമായി ടൂർണമെന്റിനെത്തിയ ബുംറ, നിലവിൽ അത് 6.53 ആയി കുറച്ചിരിക്കുകയാണ്. വിക്കറ്റുകൾ വീഴ്ത്തി കൂട്ടുകെട്ടുകൾ തകർക്കാനുള്ള ബുംറയുടെ കഴിവിനെ പ്രതിരോധിക്കുകയാവും ഇംഗ്ലണ്ടിന്റെ പ്രധാന വെല്ലുവിളി.

ഇന്ത്യൻ കോച്ച് ഗൗതം ഗംഭീർ വ്യക്തമാക്കുന്നതുപോലെ, ടീം ഇന്ത്യയുടെ വിശ്വസ്തനാണ് ബുംറ. ഏത് സമയത്തും ഏത് സാഹചര്യത്തിലും വിശ്വസിച്ച് പന്തേൽപ്പിക്കാവുന്ന താരം. ഇന്നിങ്‌സിന്റെ ഇന്ന ഘട്ടത്തിൽ മാത്രമേ ബുംറയെ ഉപയോഗിക്കൂ എന്ന വാശി ടീമിനില്ല. മറിച്ച്, എതിർടീമിലെ ഏറ്റവും അപകടകാരികളായ ബാറ്റർമാരെ നേരത്തെ തന്നെ പുറത്താക്കാനുള്ള 'പ്രീ-എംപ്റ്റീവ് സ്‌ട്രൈക്കിനായാണ്' ഇന്ത്യ ബുംറയെ കാത്തുവെക്കുന്നത്. അതുകൊണ്ടുതന്നെ ഇംഗ്ലീഷ് നായകൻ ഹാരി ബ്രൂക്ക് മൂന്നാമനായി ക്രീസിലെത്തുമ്പോൾ ബുംറയും ബ്രൂക്കും തമ്മിലുള്ള പോരാട്ടം തീപാറുമെന്ന് ഉറപ്പാണ്.

സ്ലോ ബോൾ തന്ത്രം

കഴിഞ്ഞ വർഷം നടന്ന പരമ്പരയിൽ ഇംഗ്ലണ്ടിന്റെ അതിവേഗ ബൗളിങ്ങിനെ ഇന്ത്യൻ ബാറ്റർമാർ അടിച്ചൊതുക്കിയതാണ് (4-1 തോൽവി). എന്നാൽ ഇത്തവണ ജോഫ്ര ആർച്ചർ, സാം കറൻ, ജാമി ഓവർട്ടൺ എന്നിവരടങ്ങുന്ന ഇംഗ്ലീഷ് ബൗളിംഗ് നിര കൂടുതൽ വൈവിധ്യമാർന്ന തന്ത്രങ്ങളുമായാണ് എത്തുന്നത്. പന്തിന്റെ വേഗത കൂട്ടാനും കുറയ്ക്കാനും ഇവർക്ക് അനായാസം സാധിക്കും.

പ്രത്യേകിച്ച് സാം കറന്റെ 'മൂൺ ബോൾ' വൈറ്റ് ബോൾ ക്രിക്കറ്റിൽ വലിയ വെല്ലുവിളിയാണ് ഉയർത്തുന്നത്. കൈപ്പത്തിയുടെ പുറംഭാഗം ഉപയോഗിച്ച് പന്തെറിയുന്ന സാം കറൻ, വേഗത മണിക്കൂറിൽ 43 മൈൽ വരെ കുറച്ച് ബാറ്റർമാരെ ആശയക്കുഴപ്പത്തിലാക്കുന്നു. ഒരു സാധാരണ ഫാസ്റ്റ് ഡെലിവറി നേരിടാൻ ഒരുങ്ങിനിൽക്കുന്ന ബാറ്റർക്ക് മുന്നിലേക്ക് സാം കറന്റെ ഈ അപ്രതീക്ഷിത സ്ലോ ബോളുകൾ വലിയ കെണിയായി മാറും.

കഴിഞ്ഞ ആഴ്ച അഹമ്മദാബാദിൽ ഇന്ത്യയെ 76 റൺസിന് തകർത്ത ദക്ഷിണാഫ്രിക്കൻ താരം ലുങ്കി എൻഗിഡിയുടെ തന്ത്രം ഇംഗ്ലണ്ട് പാഠമാക്കിയേക്കും. മണിക്കൂറിൽ 86 മൈൽ വേഗതയിൽ പന്തെറിയുന്ന അതേ ആക്ഷനിൽ തന്നെ മാറ്റം വരുത്താതെ സ്ലോ ബോളുകൾ എറിയാനുള്ള എൻഗിഡിയുടെ വൈദഗ്ധ്യം ഇന്ത്യൻ ബാറ്റർമാരെ പാടെ കുഴപ്പിച്ചിരുന്നു.

തന്റെ പക്കലുള്ള 'സ്ലോ ബോൾ' ആയുധങ്ങൾ കൃത്യമായി പ്രയോഗിച്ച എൻഗിഡി, നാല് ഓവറിൽ വെറും 15 റൺസ് മാത്രം വിട്ടുകൊടുത്ത് ഇന്ത്യയെ വരിഞ്ഞുമുറുക്കി. വിക്കറ്റൊന്നും ലഭിച്ചില്ലെങ്കിലും റൺസ് വിട്ടുകൊടുക്കാതെ സമ്മർദ്ദത്തിലാക്കുന്ന എൻഗിഡിയുടെ ഈ ശൈലി പിന്തുടരാനാകും സാം കറൻ ഉൾപ്പെടെയുള്ള ഇംഗ്ലീഷ് ബൗളർമാർ വാംഖഡെയിലും ശ്രമിക്കുക.