'സമ്മർദ്ദം ഒരു ഒഴികഴിവല്ല, 10 വർഷത്തിലേറെയായി അന്താരാഷ്ട്ര ക്രിക്കറ്റിൽ കളിക്കുന്നു'; തുടർച്ചയായി പരാജയപ്പെടുന്നത് അംഗീകരിക്കാനാവില്ല; വിമർശനവുമായി യുസ്വേന്ദ്ര ചഹൽ
വിശാഖപട്ടണം: ന്യൂസിലൻഡിനെതിരായ നാലാം ടി20യിലും ബാറ്റിംഗിൽ പരാജയപ്പെട്ട മലയാളി താരം സഞ്ജു സാംസണെതിരെ വിമർശനവുമായി യുസ്വേന്ദ്ര ചഹൽ. 2026-ലെ ടി20 ലോകകപ്പ് അടുത്തിരിക്കെ ലഭിച്ച അവസരങ്ങൾ മുതലാക്കാൻ കഴിയാത്തതിൽ സഞ്ജുവിന് മറ്റാരെയും കുറ്റപ്പെടുത്താനാവില്ലെന്നും താരം സ്വയം പഴിക്കുമെന്നും ചഹൽ പറഞ്ഞു. 'ജിയോസ്റ്റാറിൽ' സംസാരിക്കുകയായിരുന്നു അദ്ദേഹം.
അനുഭവസമ്പത്തുണ്ട്, സമ്മർദ്ദമില്ല സഞ്ജുവിനെപ്പോലെ ഇത്രയധികം അനുഭവസമ്പത്തുള്ള ഒരു താരത്തിന് സമ്മർദ്ദമുണ്ടെന്ന് പറയുന്നത് അംഗീകരിക്കാനാവില്ലെന്ന് ചഹൽ വ്യക്തമാക്കി. "സഞ്ജു വർഷങ്ങളായി ക്രിക്കറ്റ് കളിക്കുന്നു. ഐപിഎല്ലിൽ മിഡിൽ ഓർഡറിൽ തുടങ്ങി പിന്നീട് ഓപ്പണറായി. 10-12 വർഷത്തെ അന്താരാഷ്ട്ര ക്രിക്കറ്റ് പരിചയമുള്ള ഒരാൾക്ക് സമ്മർദ്ദം ഒരു ഒഴികഴിവല്ല. ഈ പരമ്പരയിൽ അദ്ദേഹത്തിന് നാല് അവസരങ്ങൾ ലഭിച്ചു. ഒന്നോ രണ്ടോ മത്സരങ്ങളിൽ പരാജയപ്പെടുന്നത് സ്വാഭാവികം, എന്നാൽ മൂന്നോ നാലോ മത്സരങ്ങളിൽ തുടർച്ചയായി പരാജയപ്പെടുന്നത് അംഗീകരിക്കാനാവില്ല," ചഹൽ പറഞ്ഞു.
ഇഷാൻ കിഷൻ വെല്ലുവിളിയാവുന്നു നമ്പറുകളിൽ സഞ്ജുവിനേക്കാൾ മികച്ച പ്രകടനം പുറത്തെടുക്കുന്ന ഇഷാൻ കിഷൻ ടീമിന് പുറത്ത് അവസരത്തിനായി കാത്തിരിക്കുകയാണെന്നും ചഹൽ ഓർമ്മിപ്പിച്ചു. നാലാം ടി20യിൽ 15 പന്തിൽ 24 റൺസെടുത്താണ് സഞ്ജു പുറത്തായത്. കഴിഞ്ഞ അഞ്ച് ഇന്നിംഗ്സുകളിൽ സഞ്ജുവിന്റെ ഉയർന്ന സ്കോർ 37 റൺസ് മാത്രമാണ്. ഈ പരമ്പരയിലെ നാല് മത്സരങ്ങളിൽ നിന്നായി വെറും 40 റൺസ് മാത്രമാണ് താരം നേടിയത്.
പരമ്പരയിലെ അഞ്ചാമത്തെയും അവസാനത്തെയും മത്സരം ജനുവരി 31-ന് തിരുവനന്തപുരത്താണ് നടക്കുന്നത്. പരിക്കിനെത്തുടർന്ന് നാലാം മത്സരത്തിൽ ഇഷാൻ കിഷൻ കളിച്ചിരുന്നില്ല. ഇഷാൻ തിരിച്ചെത്തുകയാണെങ്കിൽ സഞ്ജുവിനെ മാറ്റിനിർത്തുന്നതാണ് ഉചിതമെന്നും ചഹൽ അഭിപ്രായപ്പെട്ടു. "സഞ്ജു ഓപ്പണറായി പരാജയപ്പെടുകയും ഇഷാൻ മൂന്നാം നമ്പറിൽ തിളങ്ങുകയും ചെയ്യുന്നുണ്ടെങ്കിൽ, അവസാന മത്സരത്തിൽ സഞ്ജുവിനെ മാറ്റി ഇഷാന് ഓപ്പണറായും വിക്കറ്റ് കീപ്പറായും അവസരം നൽകുന്നതാകും ടീം മാനേജ്മെന്റിന്റെ ശരിയായ തീരുമാനം," ചഹൽ കൂട്ടിച്ചേർത്തു.