ചെന്നൈയ്ക്ക് ചെന്നൈയില്‍ മറുപടി നല്‍കി ബ്ലാസ്റ്റേഴ്സ്; ചെന്നൈയെ തകര്‍ത്തത് ഒന്നിനെതിരെ മൂന്നു ഗോളുകള്‍ക്ക്; ഇന്ത്യന്‍ സൂപ്പര്‍ ലീഗില്‍ നിര്‍ണായക ജയം സ്വന്തമാക്കി മഞ്ഞപ്പട; ജയത്തോടെ പ്ലേ ഓഫ് പ്രതീക്ഷകളും സജീവം
ചെന്നൈയ്ക്ക് ചെന്നൈയില്‍ മറുപടി നല്‍കി ബ്ലാസ്റ്റേഴ്സ്;
ചെന്നൈ: ഇന്ത്യന്‍ സൂപ്പര്‍ ലീഗിലെ നിര്‍ണ്ണായക മത്സരത്തില്‍ ത്രസിപ്പിക്കുന്ന ജയം പിടിച്ച് കേരള ബ്ലാസ്റ്റേഴ്സ്.ഇന്നത്തെ മത്സരത്തില്‍ ബ്ലാസ്റ്റേഴ്സ് ചെന്നൈയിന്‍ എഫ്‌സിയെ അവരുടെ തട്ടകത്തില്‍ മലര്‍ത്തിയടിച്ചു.ഒന്നിനെതിരെ മൂന്ന് ഗോളുകള്‍ക്കായിരുന്നു ബ്ലാസ്റ്റേഴ്സിന്റ ജയം.ജയത്തോടെ ബ്ലാസ്റ്റേഴ്സ് പ്ലേഓഫ് പ്രതീക്ഷകളും സജീവമാക്കി. ജീസസ് ഹിമനെസ്, കൊറൗ സിങ്, ക്വാമി പെപ്ര എന്നിവരാണ് ബ്ലാസ്റ്റേഴ്‌സിനായി വല ചലിപ്പിച്ചത്.ചെന്നൈയിന്റെ ആശ്വാസ ഗോള്‍ വിന്‍സി ബരറ്റോ കളിയുടെ അവസാന ഘട്ടത്തില്‍ വലയിലാക്കി.
ചെന്നൈയിന്‍ എഫ്.സി.ക്കെതിരേ അവരുടെ തട്ടകത്തില്‍ ഇതാദ്യമായാണ് ബ്ലാസ്റ്റേഴ്സ് വിജയിക്കുന്നത്.
മത്സരം തുടങ്ങിയതിനു തൊട്ടുപിന്നാലെ ഗോള്‍ നേടി ബ്ലാസ്റ്റേഴ്സ്, ചെന്നൈയിനു മേല്‍ മാനസിക ആധിപത്യം സ്ഥാപിച്ചു.ചെന്നൈയുടെ പിഴവില്‍ നിന്നാണ് ബ്ലാസ്റ്റേഴ്സ് ആദ്യ ഗോള്‍ നേടിയത്.ചെന്നൈയില്‍ തടിച്ചുകൂടിയ ആരാധകരെയൊന്നാകെ നിശ്ശബ്ദമാക്കിക്കൊണ്ട് ഹിമെനസ് മനോഹരമായ ഒരു നീക്കത്തിലൂടെ പന്ത് ചെന്നൈ വലയിലെത്തിക്കുകയായിരുന്നു.ഹിമെനസിന്റെ ഷോട്ട് പ്രതിരോധിക്കാന്‍ ചെന്നൈ ഗോള്‍ക്കീപ്പര്‍ നവാസിന് സാധിക്കുമായിരുന്നില്ല.ഐ.എസ്.എലില്‍ ഈ സീസണിലെ കേരളാ ബ്ലാസ്റ്റേഴ്‌സിന്റെ ഏറ്റവും വേഗമേറിയ ഗോളാണ് ഹിമെനസിന്റേത്.
ആദ്യപകുതിയിലെ അധിക സമയത്തെ മൂന്നാം മിനിറ്റിലാണ് രണ്ടാംഗോള്‍ പിറന്നത്.ചെന്നൈ ബോക്‌സില്‍ അഞ്ച് താരങ്ങള്‍ നിലയുറപ്പിച്ചിരിക്കേയാണ് കൊറൂ സിങ്ങിന്റെ ഗോള്‍ പിറന്നത്.ക്വാമി പെപ്ര ഒരു ഷോട്ട് ഉതിര്‍ക്കുന്നതിനു പകരം പന്ത് അഡ്രിയാന്‍ ലൂണയ്ക്ക് കൈമാറുകയായിരുന്നു.ലൂണ പന്ത് കുറൂ സിങ്ങിനും കൈമാറി. കൊറൂ പന്ത് നേരെ ബോക്‌സിന്റെ ഇടതുമൂലയിലേക്ക് ഉതിര്‍ത്തതോടെ ബ്ലാസ്റ്റേഴ്‌സിന്റെ ലീഡ് ഉയര്‍ന്നു.
രണ്ടാംപകുതിയിലാണ് ബ്ലാസ്റ്റേഴ്സ് വക മൂന്നാംഗോള്‍ പിറന്നത്.56-ാം മിനിറ്റില്‍ കേരളത്തിന്റെ ഇടതുവിങ്ങിലൂടെയുള്ള മുന്നേറ്റം ഗോളില്‍ കലാശിക്കുകയായിരുന്നു. ലൂണ നല്‍കിയ പാസ് ഘാന താരം ക്വാമി പെപ്രെ ഒരു പിഴവും വരുത്താതെ ചെന്നൈ വലയിലെത്തിച്ചതോടെ ബ്ലാസ്റ്റേഴ്സ് വീണ്ടും ആധിപത്യം പുലര്‍ത്തി (30). എന്നാല്‍ ഇന്‍ജുറി ടൈമില്‍ വിന്‍സിയിലൂടെ ചെന്നൈയിന്‍ അവരുടെ അക്കൗണ്ട് തുറന്നു.
അതിനിടെ 36-ാം മിനിറ്റില്‍ ചെന്നൈ മുന്നേറ്റതാരം വില്‍മര്‍ ജോര്‍ദന് റെഡ് കാര്‍ഡ് ലഭിച്ചു. ബ്ലാസ്റ്റേഴ്സ് താരം ഡ്രിന്‍സിച്ചിനെ അക്രമണ സ്വഭാവത്തോടെ തള്ളിയതിനാണ് റഫറി റെഡ് കാര്‍ഡ് ഉയര്‍ത്തിയത്. ഇതോടെ പത്തുപേരുമായാണ് ചെന്നൈ പിന്നീട് കളിച്ചത്.ഇന്ന് പരാജയപ്പെടുന്ന പക്ഷം ബ്ലാസ്റ്റേഴ്‌സിന് പ്ലേഓഫ് സാധ്യത നിലനിര്‍ത്താനാവില്ലെന്ന അവസ്ഥയായിരുന്നു. അതിനാല്‍ത്തന്നെ വളരെ ഒത്തിണക്കത്തോടെയുള്ള നീക്കമാണ് ബ്ലാസ്റ്റേഴ്‌സിന്റെ ഭാഗത്തുനിന്നുണ്ടായത്. എതിര്‍ടീമിന് പ്രതിരോധപ്പൂട്ടിട്ടും കിട്ടുന്ന അവസരത്തില്‍ അത്യുഗ്രന്‍ അറ്റാക്ക് നടത്തിയും ബ്ലാസ്റ്റേഴ്സ് കളം നിറഞ്ഞു.
ചെന്നൈ ഗോള്‍ക്കീപ്പര്‍ നവാസിന്റെ മികവുകൂടിയില്ലായിരുന്നെങ്കില്‍ ബ്ലാസ്റ്റേഴ്‌സിന്റെ ഗോളുകളുടെ എണ്ണം ഇനിയും കൂടിയേനെ.അതിനിടെ ബ്ലാസ്റ്റേഴ്സ് ഗോള്‍ക്കീപ്പര്‍ സച്ചിനും മികച്ച സേവിങ്ങുകള്‍ നടത്തി.അതേസമയം മത്സരത്തിനിടെ ലൂണയും നോഹ സദൂയിയും ഗ്രൗണ്ടില്‍ വച്ച് നേര്‍ക്കുനേര്‍ വന്നത് ബ്ലാസ്റ്റേഴ്സ് വിജയത്തിലെ കല്ലുകടിയായി.യുവതാരം ഇഷാന്‍ പണ്ഡിത ഇടപെട്ടാണ് ലൂണയെയും സദൂയിയെയും പിടിച്ചുമാറ്റിയത്.
നിര്‍ണായക എവേ വിജയമാണ് ബ്ലാസ്റ്റേഴ്സ് സ്വന്തമാക്കിയത്. സീസണിലെ ഏഴാം ജയം സ്വന്തമാക്കി ബ്ലാസ്റ്റേഴ്സ് നോക്കൗട്ട് പ്രതീക്ഷ നിലനിര്‍ത്തി. ടീമിന് 24 പോയിന്റുകള്‍ എട്ടാം സ്ഥാനത്ത്.