ആന്‍ഫീൽഡിൽ വീണ്ടും നാണംകെട്ട ലിവർപൂൾ; ചാമ്പ്യൻസ് ലീഗിൽ പി.എസ്.വിയോട് പരാജയപ്പെട്ടത് ഒന്നിനെതിരെ നാല് ഗോളുകൾക്ക്; ആർനെ സ്ലോട്ടിന് കാണികളുടെ കൂവൽ
ലണ്ടൻ: യുവേഫ ചാമ്പ്യൻസ് ലീഗിൽ ലിവർപൂളിന് തോൽവി. സ്വന്തം തട്ടകമായ ആന്‍ഫീൽഡിൽ നടന്ന മത്സരത്തിൽ ഡച്ച് ക്ലബ്ബായ പി.എസ്.വി. ഐന്തോവനോട് 4-1ന്റെ ദയനീയ തോൽവിയാണ് റെഡ്‌സ് ഏറ്റുവാങ്ങിയത്. ഈ സീസണിൽ ആർനെ സ്ലോട്ടിന് കീഴിൽ ലിവർപൂളിന്റെ മോശം പ്രകടനമാണ് കാഴ്ചവെക്കുന്നത്. കളിയുടെ അവസാന നിമിഷങ്ങളിൽ നിരാശരായ ആരാധകർ ആന്‍ഫീൽഡ് വിട്ടുപോയി. ഫൈനൽ വിസിലിന് ശേഷം സ്ലോട്ടിനെതിരെ കാണികൾ കൂവി പരിഹസിച്ചിരുന്നു.
പ്രീമിയർ ലീഗിലെ തുടർച്ചയായ മോശം പ്രകടനങ്ങൾക്ക് ശേഷം ചാമ്പ്യൻസ് ലീഗിൽ ആശ്വാസം കണ്ടെത്താമെന്ന ലിവർപൂൾ ആരാധകരുടെ പ്രതീക്ഷകൾ തകർത്തുകൊണ്ട് കളി തുടങ്ങി ആറ് മിനിറ്റിനുള്ളിൽ തന്നെ ക്യാപ്റ്റൻ വിർജിൽ വാൻ ഡൈക്കിന്റെ പിഴവിൽ ലിവർപൂൾ പിന്നിലായി. കോർണർ കിക്കിൽ നിന്നുള്ള പന്ത് വാൻ ഡൈക്കിന്റെ കൈയ്യിൽ തട്ടിയതിനെത്തുടർന്ന് ലഭിച്ച പെനാൽറ്റി ഐവാൻ പെരിസിച്ച് ലക്ഷ്യത്തിലെത്തിച്ചു.
എന്നാൽ, ആദ്യ ഞെട്ടലിൽ നിന്ന് ലിവർപൂൾ പെട്ടെന്ന് തിരിച്ചുവന്നു. പത്താം മിനിറ്റിൽ കോഡി ഗാക്പോയുടെ ഷോട്ട് പി.എസ്.വി. ഗോൾകീപ്പർ മാറ്റെജ് കോവാർ തട്ടിയകറ്റിയെങ്കിലും റീബൗണ്ട് പന്ത് ഡൊമിനിക് സൊബൊസ്‌ലായി കൃത്യമായി വലയിലെത്തിച്ച് സമനില നേടി. ഇതോടെ, യൂറോപ്യൻ കപ്പ്/ചാമ്പ്യൻസ് ലീഗ് ചരിത്രത്തിൽ ലിവർപൂളിന്റെ 500-ാമത്തെ ഗോൾ എന്ന നേട്ടവും സൊബൊസ്‌ലായിക്ക് സ്വന്തമായി. സമനില നേടിയ ശേഷം ലിവർപൂളിന് ലീഡ് നേടാൻ അവസരങ്ങൾ ലഭിച്ചു.
വാൻ ഡൈക്കിന്റെ ഒരു ഹെഡർ ബാറിൽ തട്ടിത്തെറിച്ചതും, സലാഹിന്റെയും ഗാക്പോയുടെയും മികച്ച ശ്രമങ്ങൾ ഗോൾകീപ്പർ തടഞ്ഞതും ലിവർപൂളിന് തിരിച്ചടിയായി. ആദ്യ പകുതി 1-1ന് അവസാനിക്കുമ്പോൾ ലിവർപൂൾ ആരാധകർക്ക് പ്രതീക്ഷയുണ്ടായിരുന്നു. എന്നാൽ, രണ്ടാം പകുതിയിൽ കണ്ടത് ലിവർപൂളിന്റെ സമ്പൂർണ്ണ തകർച്ചയാണ്. 56-ാം മിനിറ്റിൽ മൗറോ ജൂനിയർ നൽകിയ മനോഹരമായ ത്രൂബോൾ മിലോസ് കെർകെസിനെ മറികടന്ന് ഗുസ് ടിൽ വലയിലെത്തിച്ചതോടെ പി.എസ്.വി. വീണ്ടും ലീഡെടുത്തു.
ഈ ഗോളിന് വഴിവെട്ടിയത് ലിവർപൂൾ പ്രതിരോധത്തിലെ താളപ്പിഴവുകളാണ്. തുടർന്ന് 73-ാം മിനിറ്റിൽ പ്രതിരോധതാരം ഇബ്രാഹിമ കൊണാറ്റെയുടെ പിഴവ് മുതലെടുത്ത് പകരക്കാരനായി ഇറങ്ങിയ കൗഹൈബ് ഡ്രിഓഷ് പി.എസ്.വിയുടെ മൂന്നാം ഗോൾ നേടി. റിക്കാർഡോ പെപ്പിയുടെ ഷോട്ട് പോസ്റ്റിൽ തട്ടിത്തെറിച്ചപ്പോൾ ഡ്രിഓഷ് പന്ത് അനായാസം വലയിലേക്ക് തിരിച്ചുവിട്ടു.
കളി അവസാനിക്കാറായപ്പോൾ ഇഞ്ചുറി ടൈമിൽ (90+1) സെർജിനോ ഡെസ്റ്റിന്റെ പാസിൽ നിന്ന് ഡ്രിഓഷ് തന്റെ രണ്ടാം ഗോളും നേടി ലിവർപൂളിന്റെ നാണക്കേട് പൂർത്തിയാക്കി. 4-1ന്റെ ഈ തോൽവിയോടെ, ആന്‍ഫീൽഡിൽ പി.എസ്.വി. ചരിത്രത്തിലാദ്യമായി ഒരു വിജയം സ്വന്തമാക്കി. കഴിഞ്ഞ 12 മത്സരങ്ങളിൽ ഒൻപത് തോൽവികളാണ് ലിവർപൂൾ നേരിട്ടത്. കൂടാതെ, തുടർച്ചയായ മൂന്ന് മത്സരങ്ങളിൽ മൂന്നോ അതിലധികമോ ഗോളുകൾ വഴങ്ങുന്നത് 1992 സെപ്റ്റംബറിന് ശേഷം ആദ്യമായാണ്.