ലക്നൗ: ഉത്തർപ്രദേശ് നിയമസഭാ തെരഞ്ഞെടുപ്പിനുള്ള ആദ്യ സ്ഥാനാർത്ഥി പട്ടിക കോൺഗ്രസ് പ്രഖ്യാപിച്ചു. 125 പേരുടെ പട്ടികയാണ്, പാർട്ടി ജനറൽ സെക്രട്ടറി പ്രിയങ്കാ ഗാന്ധി പുറത്തുവിട്ടത്. 20 ശതമാനം വനിതകൾക്കും 40 ശതമാനം യുവാക്കൾക്കും പ്രാതിനിധ്യം നൽകിയതായി പ്രിയങ്ക വ്യക്തമാക്കി.

ഉന്നാവോയിൽ ബലാത്സംഗത്തിനിരയായ പെൺകുട്ടിയുടെ അമ്മയും കോൺഗ്രസ് പട്ടികിയിലുണ്ട്. ആശാ വർക്കർമാരുടെ പോരാട്ടത്തിലൂടെ ശ്രദ്ധേയായ പൂനം പാണ്ഡെയെയും പാർട്ടി സ്ഥാനാർത്ഥിയാക്കി. യുവാക്കൾക്കും സ്ത്രീകൾക്കും പ്രാധാന്യം നൽകുന്നതിലൂടെ സംസ്ഥാനത്ത് പുതിയൊരു തരം രാഷ്ട്രീയം കൊണ്ടുവരാനാവുമെന്ന് പ്രിയങ്ക പ്രതീക്ഷ പ്രകടിപ്പിച്ചു.

നിയമസഭാ തിരഞ്ഞെടുപ്പിൽ 40 ശതമാനം സീറ്റുകളിൽ വനിതകളെ സ്ഥാനാർത്ഥികളാക്കുമെന്ന പ്രിയങ്ക കഴിഞ്ഞ വർഷം പ്രഖ്യാപിച്ചിരുന്നു. ഓണറേറിയം ഉയർത്തുന്നതിനുള്ള പ്രക്ഷോഭത്തിന് നേതൃത്വം നൽകിയ ആശാ വർക്കർ പൂനം പാണ്ഡെയും സ്ഥാനാർത്ഥി പട്ടികയിലുണ്ടെന്ന് പ്രിയങ്ക പറഞ്ഞു. 125-ൽ 50 വനിതാ സ്ഥാനാർത്ഥികളുണ്ട്.

ഇക്കുറി ആരുമായി സഖ്യത്തിൽ ഏർപ്പെടാതെയാണ് കോൺഗ്രസ് മത്സരിക്കാൻ ഇറങ്ങുന്നത്. സംസ്ഥാനത്തെ 403 സീറ്റുകളിലും പാർട്ടി ഒറ്റയ്ക്ക് മത്സരിക്കാനാണ് തീരുമാനം. അതേസമയം കഴിഞ്ഞ നിയമസഭ തെരഞ്ഞെടുപ്പിൽ 403 സീറ്റുകളിൽ ഏഴ് മണ്ഡലങ്ങളിലായിരുന്നു കോൺഗ്രസിന് വിജയിക്കാനായത്. 2019ലെ ലോക് സഭ തെരഞ്ഞെടുപ്പിൽ അമേഠിയിലെ സിറ്റിങ് സീറ്റിൽ രാഹുൽ ഗാന്ധി പരാജയപ്പെടുകയും ചെയ്തിരുന്നു. സംസ്ഥാനത്ത് ഇത്തവണ ബിജെപിയും എസ്‌പിയും തമ്മിലാകും പ്രധാന മത്സരമെന്നാണ് കരുതുന്നത്.

ഉന്നാവോ പെൺകുട്ടികോൺഗ്രസ്പിടിയിൽയുപി

മറുനാടന്‍ മലയാളി

    മറുനാടന്‍ മലയാളി ബ്യൂറോ