ഭക്ഷണം കഴിക്കാൻ..ഭയങ്കര മടി; പെട്ടെന്ന് വെള്ളം കുടിയും അങ്ങ് നിർത്തി; വായിൽ നിന്ന് ഉമിനീർ വരുന്നത് കണ്ട് വീട്ടുകാർക്ക് പരിഭ്രാന്തി; ഗ്രാമത്തിലെ ഏക ആശ്രയമായ ആ എരുമയുടെ അവസ്ഥ അതിദയനീയം; പിന്നിലെ കാരണം അറിഞ്ഞ നാട്ടുകാർ നേരെ ഓടിയത് ആശുപത്രിയിലേക്ക്; തലയിൽ കൈവച്ച് ഡോക്ടർമാർ

സബർകാന്ത: ഗുജറാത്തിലെ സബർകാന്ത ജില്ലയിലുള്ള ഇദാർ താലൂക്കിലെ ലാലോഡ ഗ്രാമത്തിൽ പേവിഷബാധയെന്ന് സംശയിക്കുന്ന എരുമയുടെ പാൽ കുടിച്ചതിനെത്തുടർന്ന് ജനങ്ങൾ കടുത്ത ഭീതിയിൽ. ലാലോഡ സ്വദേശിയായ വിശാൽ പ്രഭു പട്ടേലിന്റെ ഉടമസ്ഥതയിലുള്ള എരുമ മാർച്ച് 5-ന് ചത്തതോടെയാണ് സംഭവങ്ങളുടെ തുടക്കം. എരുമയ്ക്ക് പേവിഷബാധയുടെ ലക്ഷണങ്ങൾ ഉണ്ടായിരുന്നതായും അതിന്റെ പാൽ ഗ്രാമവാസികൾ ഉപയോഗിച്ചതായും വ്യക്തമായതോടെ മുപ്പതോളം പേർ അടിയന്തരമായി ആശുപത്രിയിൽ ചികിത്സ തേടി.

ഏകദേശം ഒരാഴ്ചയോളമായി വിശാൽ പട്ടേലിന്റെ എരുമ അസുഖബാധിതയായിരുന്നു. ഭക്ഷണം കഴിക്കാനോ വെള്ളം കുടിക്കാനോ സാധിക്കാത്ത അവസ്ഥയിലായിരുന്ന മൃഗത്തിന്റെ വായിൽ നിന്ന് തുടർച്ചയായി ഉമിനീർ ഒലിച്ചിരുന്നു. ലക്ഷണങ്ങൾ കണ്ട് സംശയം തോന്നിയ ഉടമ ഡോക്ടർമാരെ വിവരമറിയിച്ചു. പരിശോധനയിൽ എരുമയ്ക്ക് പേവിഷബാധ (Rabies) ഉണ്ടായേക്കാമെന്ന് ഡോക്ടർമാർ സംശയം പ്രകടിപ്പിച്ചു. ഇതിനിടെ മാർച്ച് 5-ന് എരുമ ചത്തു.

എരുമയ്ക്ക് പേവിഷബാധയാണെന്ന വാർത്ത പടർന്നതോടെ, കഴിഞ്ഞ ദിവസങ്ങളിൽ ഈ എരുമയുടെ പാൽ വാങ്ങി ഉപയോഗിച്ച ഗ്രാമവാസികൾ പരിഭ്രാന്തരായി. വ്യാഴാഴ്ചയോടെ മുപ്പതോളം പേർ ഇദാർ ഉപജില്ലാ ആശുപത്രിയിൽ എത്തി പേവിഷബാധക്കെതിരെയുള്ള പ്രതിരോധ കുത്തിവെപ്പ് എടുത്തു.

ഗ്രാമവാസികൾക്കിടയിൽ ആശങ്ക പടരുന്ന സാഹചര്യത്തിൽ ഇദാർ സബ് ഡിസ്ട്രിക്റ്റ് ആശുപത്രി സൂപ്രണ്ട് ഡോ. സഞ്ജയ് കുമാർ ചൗഹാൻ സ്ഥിതിഗതികൾ വിശദീകരിച്ചു. പേവിഷബാധയേറ്റ മൃഗത്തിന്റെ പാൽ കുടിക്കുന്നതിലൂടെ രോഗം പടരാനുള്ള സാധ്യത വളരെ കുറവാണെന്ന് അദ്ദേഹം വ്യക്തമാക്കി. പ്രധാനമായും താഴെ പറയുന്ന കാര്യങ്ങളാണ് അദ്ദേഹം ചൂണ്ടിക്കാട്ടിയത്

സാധാരണയായി പേവിഷബാധയേറ്റ നായയോ മറ്റ് മൃഗങ്ങളോ കടിക്കുമ്പോഴോ അവയുടെ ഉമിനീർ മുറിവുകളിൽ സ്പർശിക്കുമ്പോഴോ ആണ് വൈറസ് പകരുന്നത്. പാൽ നന്നായി തിളപ്പിച്ചു കുടിക്കുന്നവർക്ക് രോഗബാധയുണ്ടാകാൻ സാധ്യതയില്ല. ഉയർന്ന താപനിലയിൽ വൈറസ് നശിച്ചുപോകും.

ഗ്രാമവാസികളുടെ മാനസികമായ ഭീതി അകറ്റുന്നതിനും സുരക്ഷാ മുൻകരുതൽ എന്ന നിലയിലുമാണ് നിലവിൽ വാക്സിനേഷൻ നൽകിയത്.

മാസങ്ങൾക്ക് മുൻപ് എവിടെയെങ്കിലും വെച്ച് നായയോ മറ്റോ കടിച്ചതിലൂടെയാകാം എരുമയ്ക്ക് പേവിഷബാധയേറ്റതെന്നാണ് നിഗമനം. ലാലോഡ ഗ്രാമത്തിൽ മറ്റ് മൃഗങ്ങളിലേക്കും രോഗം പടരാതിരിക്കാൻ മൃഗസംരക്ഷണ വകുപ്പ് ജാഗ്രത പാലിക്കുന്നുണ്ട്. ഇതിന്റെ ഭാഗമായി ഗ്രാമത്തിലെ മറ്റ് കന്നുകാലികൾക്കും പ്രതിരോധ വാക്സിനുകൾ നൽകി വരികയാണ്.

നിലവിൽ ആശുപത്രിയിൽ ചികിത്സ തേടിയ ആർക്കും രോഗലക്ഷണങ്ങളില്ലെങ്കിലും, ജാഗ്രതയുടെ ഭാഗമായി ആരോഗ്യവകുപ്പ് നിരീക്ഷണം തുടരുന്നു. സമാനമായ ലക്ഷണങ്ങൾ മറ്റ് മൃഗങ്ങളിൽ കണ്ടാൽ ഉടൻ അധികൃതരെ അറിയിക്കണമെന്ന് നിർദ്ദേശമുണ്ട്.