യുവതികൾ കയറിയെങ്കിൽ നടയടച്ച് ശുദ്ധിക്രിയ ചെയ്യും; ഔദ്യോഗിക സ്ഥിരീകരണം വരാതെ ഒന്നും പറയാൻ പറ്റില്ല; ശുദ്ധിക്രിയയെ കുറിച്ച് തന്ത്രിയുമായി സംസാരിച്ചെന്നും പന്തളം രാജകുടുംബാംഗം

പത്തനംതിട്ട: ശബരിമലയിൽ യുവതികൾ കയറിയിട്ടുണ്ടെങ്കിൽ നടയടച്ച് ശുദ്ധി ക്രിയ ചെയ്യുമെന്ന് പന്തളം കൊട്ടാരം പ്രതിനിധി ശശികുമാര വർമ്മ. സന്നിധാനത്ത് ദർശനം നടത്തിയെന്ന സ്ഥിരീകരണം കിട്ടിയാൽ മാത്രമേ മേൽനടപടികൾ സ്വീകരിക്കുന്നതിനെ കുറിച്ച് പറയാൻ കഴിയൂ എന്നും അദ്ദേഹം പറഞ്ഞു. സ്ഥിരീകരണം ഉണ്ടാകാതെ തൽക്കാലം അതിനെക്കുറിച്ച് പ്രതികരിക്കുന്നത് ശരിയാകില്ലെന്നും അദ്ദേഹം പറഞ്ഞു

'യുവതികൾ കയറിയിട്ടുണ്ടെങ്കിൽ ആചാരപരമായ കാര്യങ്ങൾ ചെയ്യും. ക്രിയനടത്താൻ വേണ്ടി നടയടക്കും. ഇക്കാര്യം തന്ത്രിയുമായി സംസാരിച്ചപ്പോൾ അദ്ദേഹം അറിയിച്ചിട്ടുണ്ട്', ശശികുമാര വർമ്മ പറഞ്ഞു.ദർശനത്തെ പറ്റി അറിയില്ലെന്നാണ് ദേവസ്വം ബോർഡ് അറിയിച്ചതെന്നും സ്ഥിരീകരണം ഉണ്ടായാൽ മാത്രമേ ആചാരപരമായ നടപടികൾ സ്വീകരിക്കൂ എന്നും ശശികുമാര വർമ്മ പറഞ്ഞു.