കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിൽ മാരകമായ മയക്കുമരുന്ന് ഗുളികകളുമായി എത്തിയ വിദേശ വനിതയെ പിടികൂടി കസ്റ്റംസ്. പൗഡർ ഡപ്പികളിൽ അതിവിദഗ്ധമായി ഒളിപ്പിച്ച നിലയിൽ 3,458 'ടഫ്രോഡോൾ' വിഭാഗത്തിൽപ്പെട്ട ലഹരി ഗുളികകളാണ് ഒന്നാം നമ്പർ ടെർമിനലിൽ വെച്ച് പിടികൂടിയത്. ഇതോടെ രാജ്യത്തേക്ക് മയക്കുമരുന്ന് കടത്താനുള്ള ശ്രമം കസ്റ്റംസ് പരാജയപ്പെടുത്തി. എത്യോപ്യയിലെ അഡിസ് അബാബയിൽ നിന്നും വിമാനത്താവളത്തിലെത്തിയ ബെനിൻ സ്വദേശിനിയാണ് അറസ്റ്റിലായത്.

ഗാർഹിക തൊഴിലാളിയായി കുവൈത്തിൽ ജോലിക്ക് എത്തിയതായിരുന്നു ഇവർ. മതിയായ മെഡിക്കൽ കുറിപ്പടികളില്ലാതെയാണ് ഈ മയക്കുമരുന്ന് ഗുളികകൾ കടത്താൻ ശ്രമിച്ചത്. സംശയം തോന്നിയതിനെ തുടർന്നുള്ള പരിശോധനയിലാണ് ലഹരിവസ്തുക്കൾ കണ്ടെത്തിയത്.പിടിച്ചെടുത്ത ലഹരിമരുന്നും പ്രതിയെയും കൂടുതൽ അന്വേഷണത്തിനായി ജനറൽ അഡ്മിനിസ്‌ട്രേഷൻ ഫോർ ഡ്രഗ് ആൻഡ് ആൽക്കഹോൾ കൺട്രോൾ വിഭാഗത്തിന് കൈമാറിയിട്ടുണ്ട്. നിയമപരമായ നടപടികൾ പൂർത്തിയാക്കി ഇവർക്കെതിരെ കേസെടുക്കുകയും ചെയ്തിട്ടുണ്ട്.

കുവൈത്ത്വിമാനത്താവളംഅറസ്റ്റ്

സ്വന്തം ലേഖകൻ