കുവൈത്ത് സിറ്റി: ഭാര്യയെ ക്രൂരമായി മർദ്ദിച്ച് കൊലപ്പെടുത്തിയ കേസിൽ കുവൈത്ത് പൗരന് ക്രിമിനൽ കോടതി അഞ്ച് വർഷം കഠിന തടവ് ശിക്ഷ വിധിച്ചു. കുറ്റം തെളിയിക്കപ്പെട്ട പ്രതിയെ ഇറാഖി അധികൃതരാണ് കുവൈത്തിന് കൈമാറിയത്.

കേസിന്റെ വിശദാംശങ്ങൾ അനുസരിച്ച്, പ്രതി തന്റെ ഭാര്യയെ വീട്ടിൽ വെച്ച് ക്രൂരമായി മർദ്ദിക്കുകയായിരുന്നു. ഈ മർദ്ദനത്തെ തുടർന്നാണ് യുവതിക്ക് ഗുരുതരമായി പരിക്കേൽക്കുകയും പിന്നീട് മരണം സംഭവിക്കുകയും ചെയ്തത്. സംഭവശേഷം പ്രതി ഇറാഖിലേക്ക് കടന്നുകളഞ്ഞു.

തുടക്കത്തിൽ, പ്രതിക്കെതിരെ പൊതു പ്രോസിക്യൂഷൻ പൂർണ്ണമായ ആസൂത്രണത്തോടെയുള്ള കൊലപാതകം എന്ന കുറ്റമാണ് ചുമത്തിയിരുന്നത്. എന്നാൽ, കേസ് അന്വേഷണത്തിനൊടുവിൽ കോടതി പ്രതിക്ക് കൊലപാതക ഉദ്ദേശ്യം ഇല്ലായിരുന്നു എന്ന് കണ്ടെത്തുകയായിരുന്നു. തുടർന്ന്, അനന്തരഫലമായുണ്ടായ മരണം എന്ന കുറ്റം ചുമത്തിയാണ് ശിക്ഷ വിധിച്ചത്.

കുവൈത്ത് ആഭ്യന്തര മന്ത്രാലയത്തിലെ ഇന്റർനാഷണൽ കോ-ഓപ്പറേഷൻ ജനറൽ ഡയറക്ടറേറ്റ് പുറപ്പെടുവിച്ച കുറ്റവാളിയെ കൈമാറാനുള്ള വാറണ്ടിന്റെ അടിസ്ഥാനത്തിലാണ് ഇറാഖിൽ വെച്ച് പ്രതിയെ പിടികൂടി കുവൈത്തിലേക്ക് കൊണ്ടുവന്നത്.

പ്രതിശിക്ഷാവിധികുവൈറ്റ്

സ്വന്തം ലേഖകൻ