കമ്പനിയിലെ പങ്കാളിയാണെന്ന് പറഞ്ഞ് തെറ്റിദ്ധരിപ്പിച്ചു; കുവൈത്തി പൗരനെ പറ്റിച്ച് തട്ടിയെടുത്തത് 12,000 ദിനാർ; പ്രവാസിയെ കൈയ്യോടെ പൊക്കി പോലീസ്
കുവൈത്ത് സിറ്റി: കുവൈത്തിൽ ഒരു കമ്പനിയുടെ പങ്കാളിയാണെന്ന് തെറ്റിദ്ധരിപ്പിച്ച് തദ്ദേശീയനായ പൗരനിൽ നിന്ന് 12,000 കുവൈത്തി ദിനാർ തട്ടിയെടുത്ത കേസിൽ പ്രവാസി അറസ്റ്റിൽ. കരാറുകളിൽ ഒപ്പിടാൻ തനിക്ക് അധികാരമുണ്ടെന്ന് വിശ്വസിപ്പിച്ചാണ് ഇയാൾ തട്ടിപ്പ് നടത്തിയത്.
സംഭവത്തെക്കുറിച്ച് ലഭിക്കുന്ന വിവരങ്ങൾ അനുസരിച്ച്, പ്രതി ഒരു കരാർ കമ്പനിയുടെ പങ്കാളിയാണെന്ന് തെറ്റായി അവകാശപ്പെടുകയും, തുടർന്ന് അൽ-ശാബ് പ്രദേശത്തുള്ള പരാതിക്കാരൻ്റെ വീടിൻ്റെ അലങ്കാര ജോലികൾക്കും അലുമിനിയം, വാതിൽ നിർമ്മാണത്തിനും 12,000 ദിനാർ കൈപ്പറ്റുകയുമായിരുന്നു. എന്നാൽ വാഗ്ദാനം ചെയ്ത ജോലികൾ പൂർത്തിയാക്കിയില്ല.
തട്ടിപ്പിന് ഇരയായ വ്യക്തി മൈദാൻ ഹവല്ലി പോലീസ് സ്റ്റേഷനിൽ പരാതി നൽകിയതിനെത്തുടർന്നാണ് അന്വേഷണം ആരംഭിച്ചത്. കേസ് ഹവല്ലി ഇൻവെസ്റ്റിഗേഷൻസ് വിഭാഗത്തിന് കൈമാറി. പ്രതി സ്വമേധയാ അന്വേഷണ ഉദ്യോഗസ്ഥർക്ക് മുന്നിൽ ഹാജരാകുകയായിരുന്നു. ചോദ്യം ചെയ്യലിൽ, താൻ തട്ടിപ്പ് നടത്തിയതായി പ്രതി സമ്മതിച്ചു. കേസിൽ തുടർനടപടികൾക്കായി അന്വേഷണ വിഭാഗം പ്രതിയെ കസ്റ്റഡിയിലെടുത്തിട്ടുണ്ട്.
