തിങ്കളാഴ്ച കുവൈറ്റിൽ മുന്നറിയിപ്പ് സൈറൺ മുഴങ്ങും; ആരും പേടിക്കരുത്; എല്ലാം മുൻകരുതലിന്റെ ഭാഗമായി; ജനങ്ങൾക്ക് ജാഗ്രത നിർദ്ദേശവുമായി അധികൃതർ

കുവൈത്ത് സിറ്റി: കുവൈത്തിലെ സിവിൽ ഡിഫൻസ് മുന്നറിയിപ്പ് സൈറണുകളുടെ പരീക്ഷണ പ്രവർത്തനം ജനുവരി 19 തിങ്കളാഴ്ച രാവിലെ 10 മണിക്ക് നടക്കും. പൗരന്മാരും രാജ്യത്തെ പ്രവാസികളും ഇതിൽ ആശങ്കപ്പെടേണ്ടതില്ലെന്ന് ആഭ്യന്തര മന്ത്രാലയം അറിയിച്ചു.

ഈ പരീക്ഷണം പൂർണമായും സാധാരണവും മുൻകരുതലിന്‍റെ ഭാഗമായുള്ളതുമായ നടപടിയാണെന്ന് മന്ത്രാലയം വ്യക്തമാക്കി. സുരക്ഷാ സംവിധാനങ്ങളുടെ കാര്യക്ഷമത ഉറപ്പാക്കുന്നതിനും പൊതുസുരക്ഷ ശക്തിപ്പെടുത്തുന്നതിനും സൈറൺ സംവിധാനങ്ങളുടെ സാങ്കേതിക സന്നദ്ധതയും പ്രവർത്തനക്ഷമതയും ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.

കൂടാതെ, എല്ലാ മാസവും ആദ്യ തിങ്കളാഴ്ച രാവിലെ 10 മണിക്ക് ഇത്തരം പരീക്ഷണങ്ങൾ സ്ഥിരമായി നടത്തുമെന്നും ആഭ്യന്തര മന്ത്രാലയം കൂട്ടിച്ചേർത്തു. രാജ്യത്തിന്‍റെ സുരക്ഷാ ക്രമീകരണങ്ങൾ ശക്തിപ്പെടുത്തുന്നതിന്‍റെ ഭാഗമായാണ് ഈ പതിവ് പരീക്ഷണങ്ങൾ നടത്തുന്നത്.