ലഹരി പദാര്‍ഥങ്ങള്‍ ഉപയോഗിക്കുന്നത് പൊലീസിനെ അറിയിച്ചതില്‍ വൈരാഗ്യം; വര്‍ക്കലയില്‍ ക്രിസ്മസ് രാത്രിയില്‍ 60 കാരനെ വെട്ടിക്കൊലപ്പെടുത്തി; മുഖ്യപ്രതി പിടിയില്‍
വര്‍ക്കലയില്‍ ക്രിസ്മസ് രാത്രിയില്‍ 60 കാരനെ വെട്ടിക്കൊലപ്പെടുത്തി
തിരുവനന്തപുരം: വര്‍ക്കല താഴെവെട്ടൂരില്‍ ക്രിസ്മസ് രാത്രിയില്‍ ഗൃഹനാഥനെ വെട്ടിക്കൊലപ്പെടുത്തി. വര്‍ക്കല താഴെവെട്ടൂര്‍ ചരുവിളവീട്ടില്‍ 60 വയസ്സുള്ള ഷാജഹാനാണ് വെട്ടേറ്റ് മരിച്ചത്. സംഭവത്തില്‍ ഒരാളെ പൊലീസ് പിടികൂടി. താഴെവെട്ടൂര്‍ സ്വദേശി ഷാക്കിറിനെ പൊലീസ് പിടികൂടിയത്.
താഴെവെട്ടുര്‍ പള്ളിക്ക് സമീപം ക്രിസ്മസ് രാത്രിയാണ് സംഭവം. ലഹരി ഉപയോഗിച്ചതിന് യുവാക്കള്‍ക്കെതിരെ പൊലീസില്‍ പരാതി നല്‍കിയതിനാണ് ഗൃഹനാഥനെ വെട്ടിക്കൊന്നത്. ചൊവ്വാഴ്ച ഉച്ചയ്ക്ക് മൂന്നംഗ സംഘം താഴെവെട്ടൂര്‍ പള്ളിക്ക് സമീപത്ത് ലഹരിപദാര്‍ത്ഥങ്ങള്‍ ഉപയോഗിക്കുന്നത് ഷാജഹാന്‍ പൊലീസിനെ അറിയിച്ചിരുന്നു.
തലയ്ക്ക് ആഴത്തില്‍ മുറിവേറ്റ വയോധികനെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. സംഭവത്തില്‍ പ്രധാന പ്രതിയെന്ന് സംശയിക്കുന്ന താഴെ വെട്ടൂര്‍ സ്വദേശി ഷാക്കിര്‍ എന്നയാളെ വര്‍ക്കല പൊലീസ് പിടികൂടി. മറ്റ് പ്രതികള്‍ക്ക് വേണ്ടി തെരച്ചില്‍ തുടരുകയാണ്.
