അമ്മാവന്റെ പിസ്റ്റള്‍ എടുത്ത് കളിക്കുന്നതിനിടെ അഞ്ചു വയസുകാരന് വെടിയേറ്റു; താടിയെല്ലിന് പരിക്കേറ്റ കുട്ടി ചികിത്സയില്‍
പിസ്റ്റള്‍ എടുത്ത് കളിക്കുന്നതിനിടെ അഞ്ചു വയസുകാരന് വെടിയേറ്റു
പട്‌ന: ബിഹാറില്‍ പിസ്റ്റള്‍ ഉപയോഗിച്ച് കളിക്കുന്നതിനിടെ അഞ്ചുവയസുകാരന് വെടിയേറ്റു. പട്‌നയിലെ പര്‍സ ബസാര്‍ ഏരിയയില്‍ ശനിയാഴ്ചയാണ് സംഭവം. അമ്മാവന്റെ പിസ്റ്റള്‍ എടുത്ത് കളിക്കുന്നതിനിടെ കുട്ടിക്ക് അബദ്ധത്തില്‍ വെടിയേല്‍ക്കുകയായിരുന്നുവെന്ന് സദറിലെ സബ് ഡിവിഷണല്‍ പൊലീസ് ഓഫീസര്‍ രഞ്ജന്‍ കുമാര്‍ പറഞ്ഞു.
ശിവ്‌നഗര്‍ പ്രദേശത്തെ വീട്ടില്‍ അമ്മാവന്റെ പിസ്റ്റളുമായി കളിക്കുന്നതിനിടെ അഞ്ച് വയസുള്ള ഒരു കുട്ടിക്ക് വെടിയേറ്റതായി ശനിയാഴ്ച രാവിലെയാണ് വിവരം ലഭിച്ചതെന്നും പൊലീസ് സ്ഥലത്തെത്തിയപ്പോഴേക്കും കുട്ടിയെ കുടുംബാംഗങ്ങള്‍ അടുത്തുള്ള ആശുപത്രിയിലേക്ക് കൊണ്ടുപോയിരുന്നുവെന്നും ഉദ്യോഗസ്ഥര്‍ പറഞ്ഞു.
ലോഡ് ചെയ്ത പിസ്റ്റളുമായി കളിക്കുന്നതിനിടെ താടിയെല്ലില്‍ വെടിയേല്‍ക്കുകയായിരുന്നു. കുട്ടി അപകടനില തരണം ചെയ്തതായി റിപ്പോര്‍ട്ടുണ്ട്. കൂടുതല്‍ അന്വേഷണം തുടരുകയാണെന്നും പിസ്റ്റള്‍ വീണ്ടെടുക്കാന്‍ ശ്രമിച്ചുകൊണ്ടിരിക്കുകയാണെന്നും പൊലീസ് പറഞ്ഞു.
