സുരേന്ദ്രനഗർ: പിക്കപ് വാനും ട്രെക്കും കൂട്ടിയിടിച്ചുണ്ടായ അപകടത്തിൽ ഒരേ കുടുംബത്തിലെ നാല് സ്ത്രീകൾ മരിച്ചു. ഗുജറാത്തിലെ സുരേന്ദ്ര നഗറിൽ തിങ്കളാഴ്ച രാത്രി 10.30ഓടെയാണ് അപകടമുണ്ടായത്. സംഭവത്തിൽ 16 പേർക്കാണ് പരിക്കേറ്റിട്ടുള്ളത്.ഛോട്ടിലയ്ക്ക് സമീപത്ത് വച്ച് 20 യാത്രക്കാരുമായി പോവുകയായിരുന്ന വാൻ ട്രെക്കും കൂട്ടിയിടിക്കുകയായിരുന്നു. ട്രെക്ക് ഡ്രൈവറുടെ അശ്രദ്ധയാണ് അപകടം ഉണ്ടാകാൻ കാരണമായത്.

ലിബാഡി താലൂക്കിലെ ഷിയാനിയിൽ നിന്ന് സോമ്നാഥിലേക്ക് പോവുകയായിരുന്ന വാനാണ് അപകടത്തിൽപ്പെട്ടത്. ട്രെക്കുമായി കൂട്ടിയിടിച്ച വാൻ പൂർണമായി തകർന്നു. ഇടിയുടെ ആഘാതത്തിൽ മുകൾഭാഗം മറച്ച പിക്കപ്പ് വാനിൽ ഇരുന്നവരിൽ പലരും റോഡിലേക്ക് തെറിച്ച് വീഴുകയായിരുന്നു.

രണ്ട് പേർ സംഭവ സ്ഥലത്തും രണ്ട് പേർ ആശുപത്രിയിൽ ചികിത്സയിലിരിക്കെയുമാണ് മരിച്ചത്. അശ്രദ്ധമായി ട്രെക്ക് ഓടിച്ചതാണ് അപകടത്തിന് കാരണമായത്. എതിർ ദിശയിൽ വരികയായിരുന്ന ട്രെക്ക് പെട്ടെന്ന് റോഡ് സൈഡിലെ ചായക്കട കണ്ട് നിർത്താനായി വലത് വശത്തേക്ക് തിരിച്ചതോടെയാണ് വാനുമായി കൂട്ടിയിടിച്ചത്. സോമ്നാഥിൽ വച്ച് പിതൃ തർപ്പണ കർമ്മം അനുഷ്ടിക്കാനായി പോയവരുടെ വാനാണ് അപകടത്തിൽ പെട്ടത്. 65 മുതൽ 72 വയസ് വരെ പ്രായമുള്ളവരാണ് മരിച്ചത്.

അപകടംസുരേന്ദ്രനഗർഗുജറാത്ത്

സ്വന്തം ലേഖകൻ