മുംബൈ: ടെമ്പോയും ട്രക്കും കൂട്ടിയിടിച്ച് വൻ അപകടം. സംഭവത്തിൽ എട്ട് പേർ കൊല്ലപ്പെട്ടു. മഹാരാഷ്ട്രയിലെ നാസിക് ജില്ലയിലാണ് ദാരുണ സംഭവം നടന്നത്. അപകടത്തിൽ നിരവധിപേർക്ക് പരിക്കേറ്റു. ഇവരിൽ പലരുടെയും നില ഗുരുതരമാണെന്നാണ് ലഭിക്കുന്ന റിപ്പോർട്ടുകൾ. നാസികിലെ ദ്വാരക സർക്കിളിലാണ് സംഭവം നടന്നത്.

പതിനാറ് പേർ സഞ്ചരിച്ചിരുന്ന ടെമ്പോയാണ് ട്രക്കുമായി കൂട്ടിയിടിച്ചത്. മത ആഘോഷം കഴിഞ്ഞ് മടങ്ങിവരുന്നവരായിരുന്നു ടെമ്പോയിൽ ഉണ്ടായിരുന്നവർ. യാത്രയ്ക്കിടെ ടെമ്പോ ഡ്രൈവർക്ക് വാഹനത്തിന്റെ നിയന്ത്രണം നഷ്ടമാവുകയും മുന്നിലുള്ള വാഹനത്തിലേക്ക് ഇടിച്ചുകയറുകയുമായിരുന്നു. ഇരുമ്പ് കമ്പികൾ കൊണ്ടു പോവുകയായിരുന്ന ട്രക്കാണ് ടെമ്പോയ്ക്ക് മുന്നിൽ ഉണ്ടായിരുന്നത്. ഇതിന്റെ പിൻഭാഗത്തേക്കാണ് ടെമ്പോ ഇടിച്ചു കയറിയത്.

ടെമ്പോയിൽ ഉണ്ടായിരുന്ന പലരും സംഭവ സ്ഥലത്തു വെച്ചു തന്നെ മരിക്കുകയും. പരിക്കേറ്റവരിൽ പലരും അതീവ ഗുരുതരാവസ്ഥയിലാണെന്ന് പോലീസ് വ്യക്തമാക്കി. പോലീസും അഗ്നിശമന സേനയും പരിസരത്ത് തടിച്ചുകൂടിയ നാട്ടുകാരും ചേർന്നാണ് രക്ഷാപ്രവർത്തനം നടത്തിയത്.

അപകടംഎട്ട് പേർകൊല്ലപ്പെട്ടുനാസിക്

സ്വന്തം ലേഖകൻ