'എന്റമ്മോ..മടുത്തു.'; സമയം ലാഭിക്കാൻ വേണ്ടി വന്നിറങ്ങിയത് ബാംഗ്ലൂർ സിറ്റിയുടെ ഒത്ത നടുവിൽ; ടാക്സിക്കായി കാത്തിരിക്കേണ്ടി വന്നത് മണിക്കൂറുകൾ; വൈറലായി പോസ്റ്റ്

ബംഗളൂരു: ബംഗളൂരു കെംപെഗൗഡ അന്താരാഷ്ട്ര വിമാനത്താവളത്തിൽ ടാക്സി ലഭിക്കാൻ മണിക്കൂറുകളോളം കാത്തുനിൽക്കേണ്ടി വരുന്ന സാഹചര്യം യാത്രക്കാരെ വലയ്ക്കുന്നു. ഈ വിഷയത്തിൽ ബംഗളൂരു നിവാസിയായ ദിഷ സൈനി എക്സ് പ്ലാറ്റ്‌ഫോമിൽ പങ്കുവെച്ച വീഡിയോ സാമൂഹിക മാധ്യമങ്ങളിൽ വ്യാപകമായി പ്രചരിക്കുകയാണ്.

കഴിഞ്ഞ ദിവസം രാത്രി വിമാനത്താവളത്തിൽ എത്തിയ തനിക്ക് ടാക്സിക്കായി രണ്ട് മണിക്കൂറിലധികം കാത്തുനിൽക്കേണ്ടി വന്നതായി ദിഷ സൈനി വീഡിയോക്കൊപ്പം കുറിച്ചു. വിമാനത്താവളത്തിലെ ഊബർ പിക്കപ്പ് പോയിന്റിൽ ടാക്സികൾക്കായി കാത്തുനിൽക്കുന്ന യാത്രക്കാരുടെ നീണ്ട നിരയാണ് വീഡിയോയിൽ കാണുന്നത്. ഈ അവസ്ഥ കഴിഞ്ഞ കുറച്ച് മാസങ്ങളായി കെംപെഗൗഡ വിമാനത്താവളത്തിൽ സ്ഥിരം കാഴ്ചയായി മാറിയിട്ടുണ്ടെന്ന് സ്ഥിരം യാത്രക്കാർ പറയുന്നു.

"കഴിഞ്ഞ 8 മാസത്തോളമായി ഇതാണ് സ്ഥിതി. അതിനുമുമ്പ്, പകൽ ഏത് സമയത്തും അല്ലെങ്കിൽ രാത്രി വൈകിയും ക്യാബുകൾ ലഭ്യമായിരുന്നു. ഇപ്പോൾ ടാക്സി, ഊബർ, റാപ്പിഡോ തുടങ്ങിയ ആപ്പ് അടിസ്ഥാനമാക്കിയുള്ള ടാക്സികൾക്ക് ക്ഷാമമുണ്ട്," ഒരു ഉപഭോക്താവ് അനുഭവം പങ്കുവെച്ചു.

യാത്രക്കാർക്ക് ബദൽ മാർഗ്ഗമായി കെംപെഗൗഡ അന്താരാഷ്ട്ര വിമാനത്താവളത്തിൽ (KIA) എ.സി ബസ് സർവീസുകൾ ലഭ്യമാണെന്നും, അവ നഗരത്തിന്റെ വിവിധ ഭാഗങ്ങളിലേക്ക് പോകുന്നുണ്ടെന്നും, ടാക്സികളെ അപേക്ഷിച്ച് സൗകര്യപ്രദവും ചെലവ് കുറഞ്ഞതുമാണെന്നും ചിലർ നിർദ്ദേശിക്കുന്നു. മറ്റ് ചില നഗരങ്ങളിൽ നിന്ന് വ്യത്യസ്തമായി, ആളുകൾ ശാന്തമായി ക്യൂവിൽ കാത്തിരിക്കുന്നത് കാണാൻ സന്തോഷം നൽകുന്ന കാര്യമാണെന്ന് ചിലർ അഭിപ്രായപ്പെട്ടു. ജനറൽ പിക്കപ്പ് ഏരിയയിൽ നിന്ന് റാപ്പിഡോ ബുക്ക് ചെയ്താണ് ചിലർക്ക് ഈ ബുദ്ധിമുട്ടിൽ നിന്ന് രക്ഷപ്പെടാനായത്.