ബോറടി മാറ്റാൻ ഒന്ന് നടക്കാനിറങ്ങി; പെട്ടെന്ന് കൺമുന്നിൽ കണ്ടത് കൂറ്റൻ മുതലയെ; ചുറ്റും ആരുമില്ലെന്ന് ഉറപ്പുവരുത്തി യുവാക്കളുടെ അതിരുവിട്ട പ്രവർത്തി; കൈയ്യോടെ പൊക്കി പോലീസ്
വഡോദര: ഗുജറാത്തിലെ വഡോദരയിലെ കർജാൻ താലൂക്കിലെ ഛോർഭുജ് ഗ്രാമത്തിൽ അഞ്ചടിയിലേറെ നീളമുള്ള മുതലയെ അതിക്രൂരമായി തല്ലിക്കൊന്ന സംഭവത്തിൽ രണ്ട് യുവാക്കളെ വനംവകുപ്പ് അറസ്റ്റ് ചെയ്തു. ഈ ക്രൂരതയുടെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതിനെത്തുടർന്നാണ് അധികൃതർ നടപടി സ്വീകരിച്ചത്. ജനുവരി 17-ന് നടന്ന സംഭവത്തിൽ ബിപിൻ നായക്, വിത്തൽ നായക് എന്നിവരെയാണ് അറസ്റ്റ് ചെയ്തത്.
രാത്രിയിൽ ഗ്രാമത്തിലെത്തിയ മുതലയെ ഇവർ ചേർന്ന് ആക്രമിക്കുകയായിരുന്നു. പുറത്തുവന്ന ദൃശ്യങ്ങളിൽ, ഒരാൾ വടി ഉപയോഗിച്ച് മുതലയെ ആവർത്തിച്ച് തല്ലുമ്പോൾ മറ്റൊരാൾ ടോർച്ച് അടിച്ച് വെളിച്ചം നൽകുന്നത് വ്യക്തമാണ്. ആക്രമണത്തിന് ശേഷം അഞ്ച് വയസ്സോളം പ്രായമുള്ള മുതലയുടെ മൃതദേഹം സമീപത്തെ കുളത്തിൽ ഉപേക്ഷിച്ചു. ജനുവരി 21-ഓടെയാണ് ഈ വീഡിയോ സമൂഹമാധ്യമങ്ങളിൽ വൈറലായത്.
ഇന്ത്യൻ വന്യജീവി സംരക്ഷണ നിയമം 1972-ലെ ഷെഡ്യൂൾ 1-ൽ ഉൾപ്പെടുന്ന അതീവ സംരക്ഷിത ജീവിയാണ് മുതല. ഈ വിഭാഗത്തിൽപ്പെട്ട ജീവികളെ കൊലപ്പെടുത്തുന്നത് ജാമ്യമില്ലാ കുറ്റമാണ്. കുറ്റം തെളിഞ്ഞാൽ മൂന്ന് മുതൽ ഏഴ് വർഷം വരെ തടവും അഞ്ച് ലക്ഷം രൂപ വരെ പിഴയും ലഭിക്കാവുന്നതാണ്. അറസ്റ്റിലായ യുവാക്കളെ വെള്ളിയാഴ്ച കർജാനിലെ സബ് ജയിലിലേക്ക് മാറ്റിയിട്ടുണ്ട്.
ഈ സംഭവത്തിന് ഏതാനും ദിവസങ്ങൾക്ക് മുൻപ് ഇതേ ഗ്രാമത്തിൽ നിന്ന് മറ്റൊരു മുതലയെ വനംവകുപ്പ് പിടികൂടിയിരുന്നു. നദികളിലും തടാകങ്ങളിലുമാണ് സാധാരണയായി മുതലകളുടെ ആവാസ കേന്ദ്രങ്ങൾ. 1960-ലെ കണക്കുകൾ പ്രകാരം വിശ്വാമിത്രി നദിയിൽ 50 മുതലകളുണ്ടായിരുന്നത് നിലവിൽ 400 ആയി വർധിച്ചിട്ടുണ്ട്. വഡോദരയിൽ മാത്രം ഡേവ്, ദാദർ, നർമ്മദ നദികളിലായി ആയിരത്തോളം മുതലകളുണ്ടെന്നാണ് കണക്ക്. മുതലയുടെ ആക്രമണത്തിൽ കൊല്ലപ്പെടുന്നവരുടെ കുടുംബങ്ങൾക്ക് സർക്കാർ നാല് ലക്ഷം രൂപ ധനസഹായം നൽകാറുണ്ട്.
