വീണ്ടും ഡിജിറ്റല്‍ അറസ്റ്റ്: എഴുപത്തിയൊന്നുകാരന് നഷ്ടമായത് 1.92 കോടി രൂപ; ആധാര്‍ കാര്‍ഡ് ദുരുപയോഗം ചെയ്തതിന് കേസെന്ന് വിശ്വസിപ്പിച്ചു തട്ടിപ്പ്; ഹൈദരാബാദില്‍ മൂന്ന് പേര്‍ അറസ്റ്റില്‍
വീണ്ടും ഡിജിറ്റല്‍ അറസ്റ്റ്
ഹൈദരാബാദ്: 'ഡിജിറ്റല്‍ അറസ്റ്റ് തട്ടിപ്പിനിരയായ 71 കാരന് നഷ്ടമായത് 1.92 കോടി രൂപ. ആധാര്‍ കാര്‍ഡ് ദുരുപയോഗം ചെയ്തതുമായി ബന്ധപ്പെട്ട് കേസ് രജിസ്റ്റര്‍ ചെയ്തിട്ടുണ്ടെന്ന് വിശ്വസിപ്പിച്ചായിരുന്നു തട്ടിപ്പ്. സംഭവത്തില്‍ സൈബര്‍ ക്രൈം പൊലീസ് മൂന്ന് പ്രതികളെ അറസ്റ്റ് ചെയ്തു. ഹൈദരാബാദ് സ്വദേശികളായ പാണ്ഡു വിനിത് രാജ്, ജി തിരുപ്പതയ്യ, ഗൗണി വിശ്വനാഥം എന്നിവരാണ് അറസ്റ്റിലായത്.
സിബിഐ ഓഫീസര്‍മാരാണെന്ന് പരിചയപ്പെടുത്തിയാണ് പ്രതികള്‍ ഇദ്ദേഹത്തെ സമീപിച്ചത്. മുംബൈയിലെ കാനറാ ബാങ്കില്‍ ആധാര്‍ കാര്‍ഡ് ഉപയോഗിച്ച് ഒരു അക്കൗണ്ട് തുറന്നിട്ടുണ്ടെന്ന് തട്ടിപ്പുകാര്‍ പറഞ്ഞു. ഇതിന്റെ തെളിവായി കാനറാ ബാങ്ക് എടിഎം കാര്‍ഡിന്റെ ചിത്രവും, ഡല്‍ഹി ക്രൈം ബ്രാഞ്ചിന്റെ വ്യാജ എഫ്‌ഐആറും വീഡിയോ കോളിലൂടെ തട്ടിപ്പുകാര്‍ കാണിച്ചുനല്‍കി.
കേസ് അവസാനിപ്പിക്കാന്‍ പണം ആവശ്യപ്പെട്ടതോടെ, നവംബര്‍ 7 മുതല്‍ 14 വരെയുള്ള ദിവസങ്ങളിലായി വൃദ്ധന്‍ 1,92,50,070 രൂപ വിവിധ ബാങ്ക് അക്കൗണ്ടുകളിലേക്ക് നിക്ഷേപിച്ചു. താന്‍ കബളിപ്പിക്കപ്പെട്ടെന്ന് മനസ്സിലായതോടെ അദ്ദേഹം പൊലീസില്‍ പരാതി നല്‍കുകയായിരുന്നു. രാജ്യത്തുടനീളം ഇവര്‍ ഉള്‍പ്പെട്ട അഞ്ച് കേസുകള്‍ കണ്ടെത്തിയിട്ടുണ്ട്. അതില്‍ രണ്ടെണ്ണം തെലങ്കാനയിലാണ്. കേസിലെ മുഖ്യപ്രതിയായ സനീപ് (അലക്സ്) ഒളിവിലാണ്. വിനിത് രാജ് അക്കൗണ്ടുകള്‍ നല്‍കിയ ആളും, തിരുപ്പതയ്യയും വിശ്വനാഥവും ജോയിന്റ് അക്കൗണ്ട് ഉടമകളുമാണ്.
ഇന്ത്യന്‍ നിയമത്തില്‍ 'ഡിജിറ്റല്‍ അറസ്റ്റ്' എന്നൊരു നിയമപരമായ രീതി നിലവിലില്ലെന്ന് പൊലീസ് വ്യക്തമാക്കി. പൊലീസ് വീഡിയോ കോളിലൂടെ ആരെയും അറസ്റ്റ് ചെയ്യില്ല. ഒരു അറസ്റ്റ് യഥാര്‍ത്ഥത്തില്‍ നടക്കുമ്പോള്‍, ഉദ്യോഗസ്ഥര്‍ കൃത്യമായ വാറന്റുമായി സ്ഥലത്ത് നേരിട്ട് എത്തുമെന്നും പൊലീസ് അറിയിച്ചു.
