മണിപ്പൂർ വീണ്ടും അശാന്തം; എസ്പി ഓഫിസിന് നേരെ വ്യാപക ആക്രമണം; എസ്പി ഉൾപ്പെടെ പോലീസുകാർക്ക് പരിക്ക്; പ്രദേശത്ത് സുരക്ഷാ സേനയെ വിന്യസിച്ചു; പിന്നിൽ കുക്കികളെന്ന് സംശയം
ഇംഫാൽ: ഒരു ഇടവേളയ്ക്ക് ശേഷം മണിപ്പൂർ വീണ്ടും അശാന്തമാകുന്നു. ഇപ്പോൾ എസ്പി ഓഫിസിന് നേരെ നടൻ വ്യാപക ആക്രമണത്തിൽ എസ്പി ഉൾപ്പെടെയുള്ള പോലീസുകാർക്ക് പരിക്ക്. കാങ്പോക്പി ജില്ലയിൽ വെള്ളിയാഴ്ച വൈകീട്ടാണ് സംഭവം നടന്നത്. സംഭവത്തിന് പിന്നിൽ കുക്കികളാണെന്നാണ് പോലീസ് പറയുന്നത്.
സായ്ബോൾ മേഖലയിൽനിന്നും അർധ സുരക്ഷാ സേനകളായ ബിഎസ്എഫിനെയും സിആർപിഎഫിനെയും പിൻവലിക്കണമെന്ന ആവശ്യവുമായി കുക്കികൾ രംഗത്ത് വരുകയായിരിന്നു. ഈ പ്രതിഷേധമാണ് സംഘർഷത്തിൽ ഒടുവിൽ കലാശിച്ചത്.
ഡിസംബർ 31ന് സുരക്ഷാ സേനയുമായുള്ള ഏറ്റുമുട്ടലിൽ നിരവധി വനിതാ പ്രതിഷേധക്കാർക്ക് പരിക്കേറ്റിരുന്നു. ഇതിൽ പ്രതിഷേധിച്ചായിരുന്നു വെള്ളിയാഴ്ച വൈകീട്ടുണ്ടായ പ്രകടനം. പ്രതിഷേധക്കാരുടെ കല്ലേറിൽ കാങ്പോക്പി എസ്പി മനോജ് പ്രഭാകറിന് തലയിൽ ഒന്നിലധികം മുറിവേറ്റിട്ടുണ്ടെന്ന് ഔദ്യോഗിക വൃത്തങ്ങൾ അറിയിച്ചു. മറ്റു ചില പോലീസുകാർക്കും പരിക്ക് പറ്റിയിട്ടുണ്ട്.
കുക്കികളുടെ സംഘടനയായ കമ്മിറ്റി ഓൺ ട്രൈബൽ യൂനിറ്റിയുടെ നേതൃത്വത്തിലായിരുന്നു പ്രതിഷേധം നടന്നത്. ഇവർ എസ്പി ഓഫീസിന് നേരെ കല്ലുകളും പെട്രോൾ ബോംബും എറിയുകയായിരുന്നുവെന്ന് പോലീസ് പറയുന്നു. തുടർന്ന് സുരക്ഷാ സേനയെ വിന്യസിച്ച് സ്ഥിതി ശാന്തമാക്കിയതായും പോലീസ് വ്യക്തമാക്കി.
