ഒരു ഗിഫ്റ്റ് വാങ്ങിത്തരാൻ നിങ്ങൾക്ക് കഴിയില്ലല്ലേ?; കരച്ചിൽ നിർത്താൻ പറ്റാതെ യുവതി; പ്രശ്നം പണമോ ഭർത്താവോ എന്ന് നെറ്റിസെൻസ്; സോഷ്യൽ മീഡിയയിൽ പൊരിഞ്ഞ ചർച്ച
ഡൽഹി: 12,000 രൂപ വിലമതിക്കുന്ന ഒരു സമ്മാനം വാങ്ങി നൽകാൻ ഭർത്താവിന് കഴിയാത്തതിൽ സങ്കടപ്പെട്ട് കരയുന്ന യുവതിയുടെ വീഡിയോ സമൂഹമാധ്യമങ്ങളിൽ വൈറലായി. ഈ ദൃശ്യങ്ങൾ ദമ്പതികൾക്കിടയിലെ സാമ്പത്തിക പ്രതീക്ഷകളെയും വ്യക്തിപരമായ ആഗ്രഹങ്ങളെയും കുറിച്ചുള്ള ചൂടേറിയ ചർച്ചകൾക്ക് വഴിവെച്ചിരിക്കുകയാണ്. അമ്മയുടെ കണ്ണീർ തുടയ്ക്കാൻ ശ്രമിക്കുന്ന ഒരു കൊച്ചുകുഞ്ഞിന്റെ സാന്നിധ്യം വീഡിയോയിൽ ശ്രദ്ധേയമായി.
എക്സിലും ഇൻസ്റ്റാഗ്രാമിലും ഉൾപ്പെടെ നിരവധി ഡിജിറ്റൽ പ്ലാറ്റ്ഫോമുകളിൽ പങ്കുവെക്കപ്പെട്ട വീഡിയോയുടെ തുടക്കത്തിൽ യുവതി ഭർത്താവിനോട് "നിങ്ങളുടെ കൈയിൽ പണമില്ലേ?" എന്ന് ചോദിക്കുന്നത് കേൾക്കാം. തനിക്കിഷ്ടപ്പെട്ട ഒരു സാധനം വാങ്ങാനായി കടയിൽ ഏറെനേരം കാത്തുനിന്നുവെന്നും, ഇപ്പോൾ തന്റെ ഇഷ്ടാനിഷ്ടങ്ങൾ ഭർത്താവിന് അറിയില്ലെന്നും യുവതി പരാതിപ്പെടുന്നു. പ്രണയത്തിലായിരുന്നെങ്കിൽ തന്റെ ആഗ്രഹങ്ങൾ ഭർത്താവ് തിരിച്ചറിഞ്ഞേനെയെന്നും അവർ പറയുന്നുണ്ട്. ഈ സംഭാഷണത്തിനിടെ ഒരു പുരുഷൻ ക്ഷമ ചോദിക്കുന്നതും വീഡിയോയിൽ വ്യക്തമാണ്. യുവതിയുടെ മടിയിലിരിക്കുന്ന കൊച്ചുകുഞ്ഞ് അമ്മയെ സമാധാനിപ്പിക്കാൻ ശ്രമിക്കുന്ന ദൃശ്യങ്ങൾ കാഴ്ചക്കാരിൽ പലരെയും ആകർഷിച്ചു.
ഈ വീഡിയോ വ്യാപകമായി പ്രചരിച്ചതോടെ സമൂഹമാധ്യമ ഉപയോക്താക്കൾക്കിടയിൽ വലിയ ചർച്ചകൾക്കാണ് ഇത് വഴിവെച്ചത്. ഭൂരിഭാഗം പുരുഷന്മാരും യുവതി ഭർത്താവിനേക്കാൾ പണത്തെയാണ് സ്നേഹിക്കുന്നതെന്ന് അഭിപ്രായപ്പെട്ടു. യുവതി ഈ സമ്മാനം അർഹിക്കുന്നില്ലെന്ന് ചിലർ വാദിച്ചു. ഭാര്യമാരുടെ ആഗ്രഹങ്ങൾ നിറവേറ്റാൻ കഴിയാത്തവർ വിവാഹം കഴിക്കരുതെന്ന് ചിലർ പ്രതികരിച്ചപ്പോൾ, കുടുംബത്തിനുവേണ്ടി സമ്പാദിക്കാത്ത സ്ത്രീകൾ അമിതമായ ആഗ്രഹങ്ങൾ വെച്ചുപുലർത്തരുതെന്നായിരുന്നു മറ്റ് ചിലരുടെ വിമർശനം. യുവതി ആവശ്യപ്പെട്ട 12,000 രൂപയുടെ സമ്മാനം എന്താണെന്ന് വീഡിയോയിൽ വ്യക്തമല്ല.
