മുന്നിലൂടെ പോകുന്ന ഒരു ബെൻസിന്റെ നമ്പർ പ്ലേറ്റിൽ ഇടംപിടിച്ച് 'പ്രിൻസ്'; 'കിയ'യിൽ കണ്ടത് മറ്റേതോ ഭാഷ; പിന്നാലെ പൂനെ ഭരണകൂടത്തിനെ ട്രോളി നെറ്റിസെന്‍സ്

പൂനെ: പൂനെ നഗരത്തിൽ ഔദ്യോഗിക രജിസ്‌ട്രേഷൻ നമ്പറുകൾക്ക് പകരം 'PRINCE', 'YUG' എന്നിങ്ങനെയുള്ള വാക്കുകൾ ഉപയോഗിച്ച് വ്യക്തിഗതമാക്കിയ നെയിം പ്ലേറ്റുകൾ പ്രദർശിപ്പിച്ച വാഹനങ്ങൾ വ്യാപകമായതിനെതിരെ സമൂഹ മാധ്യമങ്ങളിൽ പ്രതിഷേധം ശക്തമാകുന്നു. ഇത്തരം നിയമലംഘനങ്ങൾക്കെതിരെ അധികൃതർ നടപടിയെടുക്കുന്നില്ലെന്ന് ആരോപിച്ച് ജനങ്ങൾ രംഗത്തെത്തി.

പൂനെയിലെ യൂണിവേഴ്‌സിറ്റി റോഡിൽ രജിസ്‌ട്രേഷൻ നമ്പറിന് പകരം "PRINCE" എന്ന് എഴുതിയ ഒരു വെളുത്ത മെഴ്‌സിഡസ് കാറിൻ്റെ ചിത്രം വ്യാപകമായി പ്രചരിച്ചതോടെയാണ് വിഷയം ശ്രദ്ധ നേടിയത്. ഈ നിയമലംഘനങ്ങളെല്ലാം നിയമസംവിധാനത്തെ കാറ്റിൽപ്പറത്തുന്നതിന് തുല്യമാണെന്ന് നെറ്റിസൺസ് ചൂണ്ടിക്കാട്ടി.

പൊതുജനങ്ങളിൽ പലരും പൂനെ സിറ്റി പോലീസിനെയും മോട്ടോർ വാഹന വകുപ്പിനെയും ടാഗ് ചെയ്ത് നടപടി ആവശ്യപ്പെട്ടെങ്കിലും, ഉദ്യോഗസ്ഥർ പ്രതികരിക്കുകയോ നടപടി സ്വീകരിച്ചതായി ഔദ്യോഗികമായി അറിയിക്കുകയോ ചെയ്തിട്ടില്ല.