പട്ന: മിണ്ടാപ്രാണിയോടുള്ള കരുണയാണോ അതോ സുരക്ഷാ മാനദണ്ഡങ്ങൾ ലംഘിച്ചുള്ള കടുംകൈയാണോ എന്ന് സോഷ്യൽ മീഡിയ ചോദിക്കുന്ന ഒരു വീഡിയോയാണ് ഇപ്പോൾ ഇന്റർനെറ്റിൽ തരംഗമാകുന്നത്. ബീഹാറിൽ നിന്നുള്ളതാണ് ഈ ഞെട്ടിക്കുന്ന ദൃശ്യങ്ങൾ. 40 അടിയോളം താഴ്ചയുള്ള ഒരു കിണറ്റിൽ വീണുപോയ ആട്ടിൻകുട്ടിയെ രക്ഷിക്കാൻ ഒരു കൊച്ചുബാലനെ തുണിയിലും കയറിലും കെട്ടി കിണറ്റിലേക്ക് താഴ്ത്തുകയായിരുന്നു ഒരു കൂട്ടം ആളുകൾ.

തുറന്നിട്ട ഒരു കിണറ്റിലേക്ക് അബദ്ധത്തിൽ ആട്ടിൻകുട്ടി വീഴുകയായിരുന്നു. കിണറിന് വലിയ ആഴമുള്ളതിനാൽ മറ്റാരും അതിലിറങ്ങാൻ തയ്യാറായില്ല. തുടർന്നാണ് നാട്ടുകാർ ഒരു ബാലന്റെ സഹായം തേടിയത്. കുട്ടിയുടെ അരക്കെട്ടിൽ കയറുകളും തുണികളും സുരക്ഷിതമെന്ന് തോന്നുന്ന രീതിയിൽ കെട്ടി. മുതിർന്നവർ എല്ലാവരും ചേർന്ന് ആ കയർ മുറുകെ പിടിക്കുകയും കുട്ടിയെ സാവധാനം കിണറിന്റെ ആഴങ്ങളിലേക്ക് താഴ്ത്തുകയും ചെയ്തു.

ഏകദേശം 40 അടി താഴ്ചയിൽ എത്തിയ കുട്ടി ആട്ടിൻകുട്ടിയെ കൈകളിൽ കോരിയെടുക്കുകയും മുകളിലുള്ളവർക്ക് സിഗ്നൽ നൽകുകയും ചെയ്തു. തുടർന്ന് അതീവ ജാഗ്രതയോടെ കുട്ടിയെയും ആടിനെയും മുകളിലേക്ക് വലിച്ചുകയറ്റി. ഇരുവരും സുരക്ഷിതമായി കരയിലെത്തിയതോടെ കണ്ടുനിന്നവർ ആവേശത്തോടെ ആർപ്പുവിളിച്ചു.

വീഡിയോ വൈറലായതോടെ സമ്മിശ്ര പ്രതികരണങ്ങളാണ് ലഭിക്കുന്നത്. കുട്ടിയുടെ ധൈര്യത്തെയും മൃഗത്തോടുള്ള സ്നേഹത്തെയും അഭിനന്ദിച്ചുകൊണ്ട് ഒരു വിഭാഗം എത്തുമ്പോൾ, മറ്റൊരു വിഭാഗം രൂക്ഷമായ വിമർശനമാണ് ഉയർത്തുന്നത്.

"ജീവജാലങ്ങളോടുള്ള അനുകമ്പയുടെ മികച്ച ഉദാഹരണം," എന്നാണ് പലരും കുറിച്ചത്. കുട്ടിയുടെ സാഹസികതയെയും നാട്ടുകാരുടെ ഏകോപനത്തെയും ഇവർ പ്രശംസിക്കുന്നു.

ഒരു മൃഗത്തിന്റെ ജീവൻ രക്ഷിക്കാൻ ഒരു കൊച്ചു കുട്ടിയുടെ ജീവൻ പണയപ്പെടുത്തിയത് ശരിയായില്ലെന്ന് ഇവർ വാദിക്കുന്നു. കയർ പൊട്ടുകയോ ബാലന് ശ്വാസതടസ്സം അനുഭവപ്പെടുകയോ ചെയ്തിരുന്നെങ്കിൽ വലിയൊരു ദുരന്തമാകുമായിരുന്നുവെന്നും മതിയായ സുരക്ഷാ സംവിധാനങ്ങളില്ലാതെ ഇത്തരമൊരു പ്രവർത്തിക്ക് പ്രോത്സാഹനം നൽകുന്നത് തെറ്റായ സന്ദേശമാണെന്നും വിമർശകർ ചൂണ്ടിക്കാട്ടുന്നു.

എന്തായാലും അപകടമൊന്നും കൂടാതെ ആട്ടിൻകുട്ടിയെയും ബാലനെയും രക്ഷിക്കാൻ കഴിഞ്ഞതിന്റെ ആശ്വാസത്തിലാണ് നാട്ടുകാർ. ഈ സംഭവത്തിന്റെ വീഡിയോ ദൃശ്യങ്ങൾ ദശലക്ഷക്കണക്കിന് ആളുകളാണ് ഇതിനോടകം കണ്ടു കഴിഞ്ഞത്.

കുട്ടികിണർരക്ഷപ്പെടുത്തൽ

മറുനാടൻ മലയാളി ബ്യൂറോ