കാസർകോട്: കാസർകോട് ജില്ലാ കളക്ടർ കെ. ഇമ്പശേഖറിന്റെ പേരിൽ വ്യാജ വാട്സാപ്പ് അക്കൗണ്ട് നിർമ്മിച്ച് ഉദ്യോഗസ്ഥരിൽ നിന്ന് പണം തട്ടാൻ ശ്രമം നടന്ന സംഭവത്തിൽ അന്വേഷണം ഊജ്ജിതമാക്കി പോലീസ്. വിയറ്റ്നാമിലെ ഒരു അന്താരാഷ്ട്ര ഫോൺ നമ്പർ ഉപയോഗിച്ചാണ് തട്ടിപ്പുകാർ കളക്ടറുടെ ചിത്രം അടക്കമുള്ള വിവരങ്ങൾ ദുരുപയോഗം ചെയ്ത് വ്യാജ അക്കൗണ്ട് ഉണ്ടാക്കിയത്. സമാനമായ തട്ടിപ്പ് ശ്രമം വയനാട് ജില്ലാ കളക്ടറുടെ പേരിലും നടന്നിട്ടുണ്ട്. സംഭവത്തിൽ നടപടി സ്വീകരിക്കാൻ കളക്ടർ കെ. ഇമ്പശേഖർ പോലീസിനോട് ആവശ്യപ്പെട്ടു.

വ്യാജ അക്കൗണ്ടിൽ നിന്ന് കളക്ടറുടെ കോൺടാക്ട് ലിസ്റ്റിലുള്ള ഉദ്യോഗസ്ഥർക്ക് സന്ദേശങ്ങൾ അയക്കുകയാണ് ചെയ്യുന്നത്. വാട്സാപ്പിലെ കോൺടാക്ട് വിവരങ്ങൾ ചോർത്തിയതിനെക്കുറിച്ചും സംശയങ്ങൾ ഉയർന്നിട്ടുണ്ട്. ആദ്യം ക്ഷേമം അന്വേഷിക്കും, തുടർന്ന് എവിടെയാണെന്ന് തിരക്കും. ഉദ്യോഗസ്ഥർ പ്രതികരിക്കുന്നതോടെ, താൻ അടിയന്തര യോഗത്തിലാണെന്നും തിരക്കിലാണെന്നും പറഞ്ഞ് സാമ്പത്തിക സഹായം ആവശ്യപ്പെടും. ആവശ്യപ്പെടുന്ന പണം ഉടൻ അയച്ചാൽ വൈകാതെ തിരികെ നൽകാമെന്നും ഉറപ്പുനൽകിക്കൊണ്ടാണ് തട്ടിപ്പ് ശ്രമം.

ഈ സംശയാസ്പദമായ സന്ദേശങ്ങളെക്കുറിച്ച് ചില ജീവനക്കാർ കളക്ടർ കെ. ഇമ്പശേഖറിന്റെ ശ്രദ്ധയിൽപ്പെടുത്തിയതോടെയാണ് തട്ടിപ്പ് ശ്രമം വെളിച്ചത്തുവന്നത്. വിവരം അറിഞ്ഞയുടൻ കളക്ടർ പോലീസിൽ ഔദ്യോഗികമായി പരാതി നൽകുകയും സമഗ്രമായ അന്വേഷണം നടത്താൻ ആവശ്യപ്പെടുകയും ചെയ്തു. സൈബർ കുറ്റകൃത്യങ്ങൾ കൈകാര്യം ചെയ്യുന്ന പ്രത്യേക വിഭാഗം ഈ കേസുകൾ പരിശോധിക്കുമെന്നാണ് പ്രതീക്ഷ. തട്ടിപ്പിൽ ആർക്കും പണം നഷ്ടപ്പെട്ടിട്ടില്ലെന്നാണ് വിവരം

കാസർകോട്ജില്ലാ കളക്ടർവ്യാജ വാട്സാപ്പ് അക്കൗണ്ട്

സ്വന്തം ലേഖകൻ